أنا مش عشوائى

يا صاحبى
ولا قنبلة موقوتة
أنا شاب فدائى ومصرى
وأبويا طفحان علشانى الكوته
وبعافر علشان حقى
أنا مش عشوائى يا صاحبى
ما تهمشنيش أنا زيك
ليا الحق أعيش
وملامحى هى ملامحك
بس أنت مُصِر ما تعرفنيش
ولا تعترف إن دا وطنى
أنا مش عشوائى يا صاحبى
وإن كنت ف عشه بعيش
وإخواتى فيهم بتلغبط
فدا شىء مايعيبنيش
اللى يعيبنى إنى أغلط
أو أوافق إنى أوطى
أنا مش عشوائى يا صاح
أنا لو عشوائى المسكن
فأنا مش عشوائى الفكر
من حقى إن أنا أحلم
وتحسى بيا يا مصر
تخدى بإيدى وتعدى
أنا مش عشوائى يا صاحبى
أحلامى بسيطة وسهلة
لقمة نظيفة ..كرسى ف مدرسة
مش محتاج أى مجاملة
محتاج ف البرد أحس بدفا
أحس بإنها بلدى
أنا مش عشوائى يا صاحبى
يا ما نفسى أحس بوطن
يحضنى ولا يرفضنى
لكن إحساسى انعدم
لما حكومتك كرهتنى
وكسرت بإيديها إرادتى
أنا مش عشوائى يا صاحبى
إيدك لو هتمدها
يبقى يا صاحبى تعلمنى
وتخلينى أحبها
وبدل ما أخرب أبنى
وأحقق وياها حلمى
أنا مش عشوائى يا صاحبى
بالعلم هيبقالى بيت
وحياة كريمة وآدمية
مش بالسكر والزيت
ولا وجبة وورقة بميه
راح أبعلك كل مبادئى
أنا مش عشوائى يا صاحبى