أغنية العبد والشيطان.. أول حوار غنائى بين إبليس والإنسان!

الصراع بين الإنسان والشيطان ملحمة تفاصيلها كتير، ناس كتير ألفت كتب ومراجع عشان ترصد تفاصيل تلك المعركة، عشان تعرف نهاية الصراع بين إبليس والإنسان، وناس كتير اعتبرت إن اللى بيحصل بين الإنسان والشيطان لعبة مسخرة عاملة زى القط والفأر.. وكالعادة الناس فى الشوارع المصرية كان ليها رأى مختلف تحليل آخر لفلسفة الخير والشر، تفسير جديد لصراع إبليس والبنى آدم من خلال أول حوار غنائى بين الشيطان والإنسان، مجرد أغنية بسيطة أكيد سمعتها وإنت متشعبط فى أتوبيس أو قاعد فى ميكروباص أو راكب جنب تاكسى، أو بتجرى جنب توك توك، أو على الأقل سمعتها فى أى فرح من بتوع البيرة والحشيش عينى عينك كده.. الأغنية لمطرب شعبى اسمه محمود الحسينى والأغنية نفسها اسمها العبد والشيطان.. طبعا مش محتاج أفكركم إن الأغنية دى بيغنيها المطرب الفنان فى أفراح الحشيش والبانجو وفى الكابريهات ووراء الراقصات كمان.. اسمع واتعظ.
أول كلامى انا على المصطفى صلى
هقول حكاوى وعبر واحفظ وفسرلى
شيطان وقال للعبد طول عمرك بتصلى
وتسبح وتصوم طول عمرك مشغولى
بالحى القيوم
اتبحبح روح سينما العبلك دور دومنة
الجارة اللى قصادك
بتشاغلك عمرها
من تقلك وعنادك قربت تطيرها
قول يا حسينى قول سمعهم كده ع طول
العبد قال للشيطان
يا عدو الإنسان يا طريد الرحمن
من ضمن الأحاديث لنبينا المختار
كام حكمة يا إبليس للجارة والجار
الشيطان قال للعبد
لو تشرب يا منيل
هتحس إنك عيل
بقزازة كونياك الهم هينساك
العبد قال للشيطان
جاى تضحك على دقنى وأنا راجل أستاذ
أحسنلك تفارقنى لاديك بالعكاز
مش عيب لما اطوح
واتمرمغ ف الطينة
واتسب كل ليلة
من أهلى ومن جارى
باسم الإله باديت وأنا بغنى
استغفر الله العظيم على ما جرى منى
شيطان قال للعبد وريتك الدنيا وألوانها
وبعت الآخرة علشانها وبقيت تخاف تخرج منها
ونسيت كمان الصلاة والفرض
فى الأول جرجرتك
من خبتك خدرتك
وبقيت تعرف تكذب وبتلعب على جارتك
بقيت تلعب بوكر وبتشرب جون واكر
العبد قال للشيطان
من بعد ما طاوعتك مبقتش عارف أعيش
ودتنى لحد النار وهناك معرفتنيش
الشيطان قال للعبد
متنفض وتهلس متهرتل وتفيس
لو عايز تتنمرد طب م انتا كده كويس
طب م انتا كده كويس
ما طلع وتبقشش أما انت ابن لذينا
ومتولع وتحشش ولا احنا فى بنزينا
العبد قال للشيطان
هسيبلك المعاصى وأصون رسول الله
وإن جيتلى هابعدك بآيات كتاب الله
وما دام هرجع أصلى مش هتعرف توصلى
والناس بقى تتعلم من كل اللى حصلى من كل اللى حصلى