عامِك "سعيد ويكا" قصيدة لسعيد حامد شحاتة

العيد بكام النهارده ودم مصر بكام
والورد هيقوم يعيّد واللا ناوى ينام
قال المذيع للمذيعة:
................ العيد على الكورنيش
ضحكت وقالت:
....... ما جلناش من "أوباما" تمام
*************
حيّا الشهيد العلم واتوضى واتقبّل
وقف المغنى المناضل يحكى ويسبّل
حيّا الشهيد العلم واتوضّى واتّاخر
ولبس هدوم المحبّة الشفتشى الفاخر
وترك بواخر بلدنا تغنّى وتطبّل
*************
يا مصر يا أم الوجع
................طافح على الشطين
يا ضحكتين طيبين
................ ع الخد مش طايبين
يا قلب خاين
........... يا تاجر بالشهيد والدّين
العيد على الكورنيش بقفطان خيش
وأنا وأنت كوز عنّاب ولقمة عيش
دراويش فى حبّ الطيّبة وضدين
يا مصر يا أم الوجع
................طافح على العمّة
الهِمّة هِمّة بطل
.......... وإن كان ما فيش هِمّة
أنتِ المُهمّة اللى باقية وكلنا خُدّام
وإن كان قسمنا الإمام نصّين
........................ أنا وهُمّا
***********
العيد بكام النهارده ودم مصر انداس
والورد هيقوم يعيّد واللا زى النّاس
قال المذيع للمذيعة:
............... العيد وصل "قليوب"
ضحكت وقالت:
.... هاتوب لو صرّحوا ف "تكساس"
*********
يا مصر يا أم الوجع
................عامِك "سعيد ويكا"
والعيد على الباب
.............. بيلعب نُص ومزيكا
العيد على الباب
.......... وخايف يدخل الأعتاب
مستنى تصريح دخوله
................... تباركه أمريكا