إِلْبَلَدْ بِتضِّيعْ يَا رَيِّسْ مِنِّنَا

1.لأْ يَا رَيِّسْ مِشْ كِوَيِّسْ دَا كَلامْ؟ ‍
غِيرْ لِهِيبْتَكْ دَا أنْتَ رَيِّسْنَا الْهُمَامْ
2.مِشْ كِوَيِّسْ تِبْقَى سَاكِتْ عَ الإسَاءَةْ ‍
عَ الْمَهَانَةْ وِالإهَانَةْ وِالْبَذَاءَةْ
3.مِشْ كِدَهْ الْحُرِّيَّةْ مِشْ حَقْ التَّظَاهُرْ ‍
يِهْجِمُوا عَ الْقَصْرْ وِيْدُقُّوا الْمَزَاهِرْ
4.خَبْطْ رَزْعِ وْشَدْ قَلْعِ وْهَدْ سُورْ ‍
يِهْتِفُوا وِبْأَعْلَى صُوتْ: ارْحَلْ وِغُورْ
5.ضَرْبِ نَارْ خَرْطُوشْ وِحَيِّ وْأَبْصَرْ ايهْ ‍
يِضْرَبُوا الأَمْنْ اللِّي حَارِسْ ذَنْبُوا إِيهْ؟
6.كُلّ حَاجَةْ مُسْتَبَاحَةْ فْ كُلِّ حِتَّةْ ‍
وِالتَّحَرُّشْ بِالْبِنَيِّةْ حِتَّةْ حِتَّةْ
7.وِاغْتِصَابْ عِشْرِيْنْ وِلِيَّةْ فِ الْمِيدَانْ ‍
هِيَّهْ ثَوْرَةْ بْجَدْ وَالَّلا دَا جِنَانْ
8.وِالْبَلاكْ بُلُوكْ كَمَانْ قَالْ يَعْنِي نَاقْصَةْ ‍
وِالْقِنَاعْ عَ الْوِشْ وِعْيُونْ خَلْفُهْ بَاصِّةْ
9.دُولْ شَبَابْ فَاهِمْ وَعَارِفْ هُوَّا مِيْنْ؟ ‍
وَالَّلا جِيْلْ تَافِهْ شِوَيِّةْ مَخْدُوعِينْ؟
10.مُسْلِمِينْ وَالَّلا نَصَارَى وَالَّلا دُولْ ‍
مِينْ وَرَاهُمْ مِينْ مَعَاهُمْ مِيْنْ يِقُولْ؟
11.جَبْهِةِ الإِنْقَاذْ كِنِيْسَةْ أَمْ فُلُولْ ‍
أَمْنْ دَوْلَةْ وَالَّلا دِي أُمْ الْخُلُولْ؟
12.قُوْمْ يَا رَيِّسْ خُدْ قَرَارَكْ شِدّ حِيلَكْ ‍
لِيْهْ مِحَسِّسْنَا انَّكْ ضَعِيْفْ وِانِّكْ بِطُولَكْ؟
13.مِشْ حَنَانْ انِّكْ تِقُولْ: لأْ دُولْ وِلادِي ‍
اِوْعَى تِضْرَبْ يَا حَرَسْ حِسَّكْ تِعَادِي
14.مِشْ حَنَانْ لأ دَهْ جِنَانْ ذُلِّ وْخُنُوعْ ‍
لِلْمَطَامِعْ مِشْ تَوَاضُعْ دَهْ خُضُوعْ
15.شَايِفْ الإعْلامْ عَمِيلْ صُهْيُونْ جَبَانْ ‍
يِخْفِي حَقِّ وْيِجْعَلِ الْبَاطِل يِبَانْ
16.وِالْحَقِيْقَةْ تِبْقَى زِيْفْ وِالْعَدْلِ ظُلْمْ ‍
وِالضَّلالْ يِبْقَى هُدَى وِالْجَهْلِ عِلْمْ
17.يِعْمِلُوا مِ الْحَبَّةْ قُبَّةْ وْقُبِّتِينْ ‍
وِالْكَوَارِثْ يِذْكُرُوهَا فْ كِلْمِتِينْ
18.لِيلْ نَهَارْ بِيْشَوِّهُوا فْ صُورْتَكْ وِفِينَا ‍
يِسْخَرُوا وِالنَّاسْ بِتِتَّرْيَقْ عَلِينَا
19.خُدْ قَرَارَكْ وِاخْرِسِ الإعْلامْ دَا غُولْ ‍
اِبْرَاهِيمْ وَالَّلا أَدِيْبْ وِامُّ الْفُلُولْ
20.وَالَّلا وَائِلْ وَالَّلا بَاسِمْ وَالَّلا جُودَةْ ‍
وَيَّا مَحْمُودْ سَعْدْ وَيَّا يُسْرِي فُودَةْ
21.شِيْلْ مُنَى وِلَمِيسْ وِدِيْنَا شِيْلْ جِيهَانْ ‍
دُولْ مَكَانْهُمْ خَلْفْ أَسْوَارِ الِّليْمَانْ
22.وَالَّلا غِيْرْهُمْ فِيْنْ ضَمِيرْهُمْ دُولْ بَاعُوهْ؟ ‍
وَالَّلا ضَاعْ مِنْهُمْ وِيِمْكِنْ مَوِّتُوهْ
23.طَهَّرِ الإعْلامْ دَهْ أَصْلِ الْمُشْكِلاتْ ‍
كُلُّوا مَكْرِ وِكِدْبِ سِحْرِ خْزَعْبَلاتْ
24.مِينْ هِنَاكْ قُولْ يَا مُرَاسِلْ حَاصِلْ ايهْ ‍
قُنْبِلِةْ غَازْ وَالَّلا وِلْعَةْ وَالَّلا إِيْهْ
25.قَالْ حَرِيْقَةْ وِالنِّيرَانْ فُوقْ فِ السَّمَا ‍
جُوَّةْ جَامِعْ مِنْ مُلُوتُوفْ اتْرَمَى
26. وَالسَّبَبْ فِيْهَا حَرَايِقْ فِ الْخِيَامْ؟ ‍
لَمَّا فَضِّ الأَمْنِ يَعْنِي الاعْتَصَامْ؟
27.أَيْوَةْ صَحْ الأَمْنِ هُوَّوا الِّلي عَمَلْهَا ‍
يِضْرَبِ الثُّوَّارْ وَهُوَّوا الِّلي افْتَعَلْهَا
28.قَالْ مُذِيعِ التِّيْتْ يِنَادِي هِيَّا هِيَّا ‍
زِيِّ مَا كَانِتْ وِلِسَّةْ الدَّاخِلِيِّةْ
29.شُوفْ كَمَانْ فِي إِيْهْ هِنَاكْ قُولْ لِي قَوَامْ ‍
يَا خَبَرْ يَا نْهَارْ مِدَهْوِلْ يَا حَرَامْ
30.إِلْحَقُونَا يَا بَشَرْ دَا خَبَرْ وَعَاجِلْ ‍
شَكْلُوا ثَائِرْ وَاتْسَحَلْ وِالأَمْنِ نَازِلْ
31.أَيْوَةْ نَازِلْ ضَرْبِ فِيهْ بِيْجَرْجَرُوهْ ‍
فِ الشَّوَارِعْ مِنْ هُدُومُهْ جَرَّدُوهْ
32.إِلْحَقُونَا يَا بَشَرْ هُوَّا احْنَا فِينْ ‍
دِي بَلَدَْنا مَصْرِ وَالَّلا مَصْرِ مِينْ؟
33.يِبْقَى مُرْسِي بَرَّةْ يِمْشِي دَهْ خَسِيْسْ ‍
إِلِّلي عَرَّانَا دَهْ عِرَّهْ مِشْ رَئِيْسْ
34.طَبْ يَا حِلْتُ امَّكْ وِأُمُّهْ وْأُمَّهَا ‍
كَامْ بِنَيِّةْ فِ الْمِيْدَانْ رَاحْ عِرْضَهَا؟
35.كُنْتُو فِينْ وِسْكِتُّوا لِيْهْ لَمْ تِنْطَقُوا ‍
فِينْ عُيُونْكُوا تْشُوفْ وِصُوتْكُوا تْزَعَّقُوا؟
36.إِرْحَمُوا مَصْرِ الْكَرِيْمَةْ السَّيِّدَةْ ‍
دَا احْنَا فِيْهَا أَوْلَى بِيْهَا عِيْبْ كِدَهْ
37.وِاحْذَرُوا غَضْبِةْ شُعُوبْ مِتْعَذِّبَةْ ‍
مِنْ وُجُودْكُوا وِلْفُجُورْكُوا مْكَدِّبَةْ
38. قُومْ يَا رَيِّسْ دَا الزَّمَانْ مِشْ لِلطَّرِي ‍
الزَّمَانْ دَا لِلْقَوِي وِالْمُفْتَرِي
39. خُدْ زِمَامَكْ فُوقْ حُصَانَكْ وِانْطِلِقْ ‍
وِبْحُسَامَكْ إِضْرَبِ الْبَاطِلْ زَهَقْ
40.إِلْبَلَدْ بِتضِّيعْ يَا رَيِّسْ مِنِّنَا ‍
وِانْتَ نَايِمْ وَالَّلا وَاجِمْ مِشْ هِنَا
41.وَالَّلا تَايِهْ وَالَّلا خَايِفْ مِنُّهُمْ ‍
قُولْ يَا رَبِّ الرَّبِّ فُوقْهُمْ كُلُّهُمْ
42.وِاحْنَا بَعْدِ الرَّبِّ شَعْبَكْ نُنْصُرَكْ ‍
بَسْ قُومْ وَرِّينَا فِيْهُمْ هِمِّتَكْ
*كارم السيد حامد السروي
إمام وخطيب بوزارة الأوقاف المصرية
أرسل مقالك للنشر هنا وتجنب ما يجرح المشاعر والمقدسات والآداب العامة
page2almesryoon@yahoo.com