ماذا تعرفون عن المنطق؟

كل أمنياتى أن يتم تدريس المنطق فى المدارس المصرية منذ أولى ابتدائى.. لقد فقدنا المنطق تماما فأصبحنا نعيش فى دولة عبثية تشبه مسرح العبث بتاع صمويل بيكث واصبحنا جميعا فى انتظار جودو.. فلا شىء منطقى ولا سبب أو مبرر يرقى إلى درجة الاقتناع وكأننا تعلمنا الكلام للتو فأصبحنا نتكلم ولا نسمع إلا أنفسنا ولا منطق يحكمنا.
يخرج علينا منذ أيام منافقو الثورة بأن خسائر البورصة والسياحة والاحتياطى النقدى ليست بسبب الثورة، فالثورة لم تحكم.. يا عمى عبد الناصر لما وجد إنه وشباب يوليو صغار السن جابوا محمد نجيب حكموا باسمه عدة سنوات - ثورة يناير لم تنجح فى ذلك - من يدفع الثمن أنا المواطن البسيط أم البورصة أم أصحاب الثورة واللا محمد نجيب؟؟
الرئيس الوطنى الذى نحمل صوره على الأعناق هو الذى ترك مصر محتلة ومفلسة، بينما الرئيس الذى ترك احتياطى 37 مليار دولار ومصر حرة لا احتلال فوق شبر منها ده حرامى وبنحاكمه؟
مصر لا ولن تنافس فى مجال السياحة وجذب الاستثمارات الأجنبيه إلا بالأمن الراسخ بين ربوعها.. ومن غير أمن سنتحول إلى صومال آخر فى شهور قليلة.. وماذا تعنى كلمة وطن إلا مرادفا للأمن؟
صديقى العزيز المعارض الشهير بقاله يومين شادد الدنيا على التمويل الأجنبى والفلوس الخارجية.. والسؤال المنطقى هى فلوس الأخ العقيد كانت داخلية واللا خارجية؟؟؟... يا عم وأنا مالى ما هى دى الثورة وده ابنها (البكرى) ريح نفسك.
أقترح وضع المثلث وشنطة الإسعاف فى متحف الداخلية بالقلعة باعتبارهم كانوا المسمار الأول فى نعش الأمن فى مصر.. وبذلنا فيهم من الوقت والمجهود فى المناقشة ما أسعف أعداءنا فى الوصول إلينا بمنتهى السهولة.. أين المنطق فى قصة المثلث وشنطة الإسعاف؟؟؟
لقيت صورة واحد معرفهوش مغرقة اللوحات الإعلانية فوق كوبرى أكتوبر.. سألت سواق التاكسى مين ده؟؟؟ قالى باينه مغنى تركى منزل شريط بيحب مصر.
سؤال حيجننى.. هو مذيع أو مذيعة التوك شو وهو رايح الاستوديو بيقول يا رب عدى اليوم على خير على بلادى وأهلى واللا بيقول يا رب تولع خلينا نشتغل؟؟؟؟ بجد عاوز إجابة.
عزيزى شيخ الأزهر الفاضل.. عزيزى مدير مجمع اللغة العربية الكريم.. ممكن تعريف كلمة شهيد.
كل يوم نسمع عن ظبطيات لكميات من السلاح.. مش مهم اللى كانوا شايلينه.. لازم حد يقولنا السلاح ده كان رايح لمين.
ومينفعش واحد يتمسك ببندقية قناصة يقول أصل كان عليه تار لو كل واحد عليه تار شال بندقية قناصة.. البلد كلها حتبات فى الشارع.
واحد صاحبى يسارى اشتراكى مهبول كل ما أقابله كان يكلمنى عن لينين 4 ساعات.. قابلته بعد سنوات انقطاع من كام يوم بيتكلم نفس الكلام ونفس الأحداث بس عن ساكشفيلى.. قلتله أحب فيك ولاءك الجغرافى يا موحه.
حاحكى لبنتى إن الموتسيكلات زمان كان ليها أرقام وكانت بتترخص من المرور.. آه يا بابى تتصورى.. ومكانش عمره التوك توك يدخل المدينة ولا كان أبدا الموتوسيكل يمشى من غير رخصة.. ونهاره أسود لو كان من غير خوذة... أقولك حاجة.. شارعنا ده كان اتجاه واحد.. هاهاهاهاهاهاهاهاهاها ده صوت ضحك بنتى بعد كام سنة كده.. هم كمان ما بيدرسوش منطق... بس اتعلموه من ع النت.
أرجوكم أتوسل إليكم ... لا تلوثوا التاريخ 6 أكتوبر بقى مزايدات ولا مليونيات ولا مظاهرات فئوية ضيقة.. ده عيد ميلاد مصر
يا عم وأنا مالى هى بلدى لوحدى.