حبيبتى هى مين؟

---------------
أقف دقيقة
أسمع كلامى وافهمه
أنسى إنت مين
يمكن تعرف هى مين
حبيبتى عروسة حلوة
وعيونها بريئة
ضحكتها صافية
من قلب عامر بالإيمان
حبيبتى غنوة رايقة
ساعة عصارى فى الميدان
حبيبتى شمس منورة
نورها يهدى الألوف
فجرها يزيح التخلف
علمها سبق الشعوب
فيها مسلم ويا مسيحي
إخوة عاشوا من سنين
حبيبتى نيلها يروي
الغريب قبل القريب
مفرقتش ده لونه إيه
ولا حتى دين
ولا حتى منصب
حبيبتى على ضفة نيلها
مركب شراعى فى المغربية
ولمة حلوة
وبنية صافية
وضحكة عالية
والعندليب صوته
يمس القلوب
صوته مصري
ودمه مصري
من زمان مكنش فيه
إلا أنت مصري
مكنش فيه أنت إخواني
ولا علمانى ولا ليبرالي
كان بس فيه إنت مصري
على ضفتك قال الأحبة
أحلى الكلام
حلموا بلقمة وعيشة هنية
وبيت صغير
ولاَّ الحب. . حرام
وأوى تنسوا خير بلادي
من سنين ما القحط
غزا فى الشعوب
مغمتش عينها
وقالت ده خيري
وليه فى خيري
يقاسمنى غيرى
كانت حبيتى فاردة جناحها
وفاضت على العالم بخيرها
وقتها خيرها كفى الشعوب
وآه عايزين يحرمونى من خيرك
على وتبقى التمشية
ويا أخويا وأمى وأبويا
ذكرى وننساها مع السنين
بس مهما يعملوا
وللعالم يصدروا
كذبة محبكة
وسيناريو مجهول الهوية
مين انضرب ومين ضرب
وإحنا يا عينى محتارين
أنت الصادق ولاَّ الكاذب
أنت الصح ولاَّ الغلط
أنت الموت ولَّا الحياة
ولاَّ أقولك
روحى بإيد اللى خلقني
مش بأيد عبد أتخدع
أنت إخواني
ولا زيى ملكش فى الأحزاب نهائي
دمى وقلبى مصري
وهافضل طول عمرى مصري
بس إيه اللى حصل
فجأة نسينا اللى جمعنا
وبالحجر والرصاص
رميت أخوك
وفى الوسط ناس مصابه
أختى وأخوك
ماتوا وسابوا وراهم
قلوب تآسى من الفرقة سنين
وآه ياعينى ما إلا فاتونا
وحقهم لسه مجاش
وعيون تبات تبكى عليهم
وأتيتمت عيون قبل ما تشوف
نور الصباح
لما ماتوا دمهم على أرضك سال
كان يومها مكنش فيه
غير أنت مصري
تسمح دقيقة وفهمني
ليه أتقسمتم
فى البيوت والميدان
بدل ما كنا إخوة عال
صورة بابتسامة بريئة
جمعتنا لما كنا فى الميدان
نهتف ارحل
وقتها مريم ويا خديجة
إيد بإيد
يحموا بعض لما الضرب
ينزل عليهم ذى المطر
وادى أحمد شايل مرقص
بصوت ارحل ارحل
وقتها كنت إيه
كنت مصري
فجأة اتقلب الميزان
والضرب ساد فى الشوارع
هما مناهم يشوفنا كده
أصل أيدنا لما كانت واحدة
اهتزت قلوبهم
عرفوا إن المصري
لسه شايل جوا قلبه
أرضه وأخوه
اللى وقت الشدة جنبك
خايف عليك
وفى الفرح ماستناش دعوة منك
قولى يا صاحبى وأختى وأمي
وأبويا وجدى روحتوا فين
هجرتم ولَّا لسه موجودين
عرفت حبيبتى هى مين
وبقت مين