رباعيات محمد جنيدي

أنا زعلان من سُؤ أحوالي
أنا زعلان إيه اللي جرالي
أمته يا خويا تحسِّ بحالي
أمته هَتنسى تقول انا مالي
هُوَّه عشان شكوايا قليله
ولّا عشان مَلْياش ف. الحيله
تنسَى فقير قاعد ف.الطِّينه
وانت قصادي بتبني مدينه
قاعد مِنْ أوِّل عَمْنَوِّل
بسرح ف. الأحوال وبأوِّل
يمكن بكره ف.يوم يتحوِّل
حالي واعيش احلى من الأوِّل
مَتقولش ف. يوم كان وزماني
كان وزمان مُش راجع تاني
فَكَّرْ وما تهدرش ثواني
وان مَقدرتش حاول تاني
آه م.الدُّنيا ومن أحوالها
ماسكين فيها ومُش ضمنينها
من أوِّل لحظه ف. أيَّامها
بتطير بينا لحدِّ آخرها!
أه من جرحك لمَّا بيصحى
أه م. الظَّالم لمَّا بيقوى
أه من نفسك لمَّا بتهوى
والنَّاس على بعض كدا بتقسى
الطَّيب مُش راسي بمِينا
والأيَّام غنوتها حزينه
لو ربَّك كان راضي علينا
كان حالنا يكون دا يا أخينا
قلبي بيبكي وعمال يمشي
صابر حيل ولا صبر رحمشي
مش قادر أعتب ما بانمشي
والأحباب لسه متعرفشي
هَتْفَسَّحْ فين يا بني يا هاني
والجو بقى اسود دُخاني
النَّاس بتصوَّت آه ياني
وكَلاكْسَات صُوتها ملا وداني
بصِّيت ع. الضَّفَّه الغربيِّة
وناديت يا فلان ردَّ عليَّه
النَّاس هَتموت ميَّه لميَّه
م.الغيظ وكمان مَلهاش دِيَّه
إبني اتخرج من ست اعوام
شغال زُهْرات كدا أيِّ كلام
وبيهرب مِنْ أحلامه أوام
ما بيتمنَّاش غير انُّه ينام
وانا رايح ازور خالتي بهيَّه
احترت أجيب ليها هديَّه
الفاكهه عشان اجيبها أذيَّه
واللحمه فلوسها معَدِّيَّه
العيشه بَقِتْ حاجه تعَكْنِنْ
وف. ناس بتقول ليه مُش مُمكن
وف. ناس بتقول والله لا يُمكن
وأنا قاعد على فقري بدندن
ولا كان ع.البال ولا ع. الخاطر
تلعبِّي يا اخويا وتشاطر
لا عَمَلْت حساب ومَفيش خاطر
للدَّم وعامل مُش فاكر
أخي مش معقول تبقى بايعني
وعايزني أقولك يا نافعني
إزَّاي والنَّاس شايفين يعني
إنَّك على جُوعي مفرقعني!!
ليه يللي انت بقيت مليارير
بخلان تدفع حبَّه من الخير
ربَّك خلاك تاكل ف.فطير
واخوان ليك م.الخَسَسان بتطير!!
آه ياني وداني مضايقاني
بتقول دا صوات ولّا أغاني
مَعْذُور يللي ما عشت زماني
كان رأيك هَيْكون شيء تاني!
آه من عشاق الجيل دَوَّه
عامل فيها بالعلي فتِوَّه
وان طَلِّيت فيهم مِنْ جُوَّه
راح تبكي عليهم وبقوَّه
راح أدفع كاش ولّا بلاشي
الكاش مَجَنَاش مِنْه طَشَاشِي
وابو حاجه بلاش مَعْرِفْناشي
واللي مَلَكْناه راح ولا جاشي
دي سياسه وساسه وسَوْسَوْ لي
أكِّلْنِي يا سِيدي ولّا تقولِّي
إيه رأْيك لَوْ لَكْ أَوْ لَوْلي
شَبَّعْنِي أقولك يا حَلُوْلِّي!
العيش والعيشه وعايشنها
طوابير العيش هنموت منها
والعيشه مرار مش حمدينها
ويا ريت الناس ترضى بدينها
أم احمد إهي راكبه ف. تكتك
زهقانه عماله تتكتك
شقيانه على حل لراحتك
وجنابك مش داري بخبتك!
يا سيدي انت مكفايا الكيف دا
مسطول طول اليوم يا اخي إيه دا
لو شايف نفسك مش هتهدا
خليها تعيش بين دا وبين دا
آه يا عين قلب سي بابا وسيرته
بيفكرني بخالي وخالته
داير شايل همي وحيرته
ومفيش حل لهمي وشيلته
طب قل اعمل إيه يا سي بابا
ياما قرينا شبعنا كتابه
بعد دراسه سنين ف. كآبه
فوقنا لاقينا الدنيا خرابه
نفسي اتوظف حتى بذقه
نفسي اتجوز وأجيب شقه
بس منين وغدايا بدقه
ومفيش غير اصبر أو لأه
آه يا لهوي يا لهوي وآه يا ني
مين حاسس بححم بركاني
شبت وشاب قلبي وخلاني
راحت ولا زعلت علشاني
مستغرب من همي يا سيدنا
ولا جيت تسأل حتى ف. عيدنا
مش عايزين صدقتنا ف. إيدنا
بس انت اعمل مشروع هيفيدنا
شاغل نفسك باللعيبه
وبتدفع ملايين ف. الخيبه
واما نقول دا حرام ومصيبه
يبقى راميت ع. الباشا مصيبه!
حقي هيرجع لازم اجيبه
حقي وبس الحق حبيبه
شيله ف.بنكه حطه ف. جيبه
حقي يا ناس مش ممكن اسيبه
متخفش يا حمدي معديه
الهم ملوش فديه وديه
لو تتعب شيلني شويه
بكره هتفرج ميه لميه
لو كنت اقدر أصرخ ياني
والقى الناس صاحيه وسمعاني
لشكيت من دمعه مطوعاني
وبكيت من قسوة خلاني!!!!
يا اختي على بطه وحلاوتها
ماشيه بتمرج خطوتها
واما تبص تشوف طلعتها
هتطالبك روح جيب شبكتها
هجوز ليه ما تقولي يا عم
أنا ناقص سدة نفس وغم
سين جيم وهدايا وعايزه المم
وانا وحدي وعاتل مليون هم
لما يكون الحظ معاندك
أو أقدارك مانعه تساندك
مهما تحاول مش مكتوبلك!
أحسن سلم لله أمرك
الأسعار حاجه تهد الحيل
والله بجد ما ليها مثيل
والناس من كتر ما ديقه الويل
ما عدتش بتسأل إيه هتشيل!!
أنا شاب وشبت وشاب جنبي
جاري وجارتي وأختي وصاحبي
لو كان ع. الفقر مهوش ذنبي
العيب اني اطلب غير ربي
تسأل هيقولك دا العادي
ياكل فستق طب وولادي!
مش طايلين أشره وبينادي!!
نعمله الشاي يا دلعادي!!!
مذنب مذنوق ومذنبني
وشايللي ف. طوب عمال يبني
مش راضي يتوب ولا بيسبني
أتخن م. الفول أو من تبني!
معقوله أحبِّك.. مش عادي!
إني اطلب ودِّك وأنادي
وأقولك.. عليادي.. ويادي
طب دانتي مشيتي مع ولادي!!!
وانا لابس بدله معديه
الحاقد جوز خالتي بهيه
إتضايق ألفين ف. الميه
أم دالق على راسي الميه
تعمل إيه لما متقدرشي
ويقولوا الناس مبيعرفشي
الجأ لله متفكرشي
اللي مع الله ما بييأسشي
أنا بضرب نفسي متين جزمه
علشان أصبحت مليش لزمه
إكمني بحاول لموأخذه
واخرج من أزمه لميت أزمه
بيقول على ابوه دقه قديمه
وماشيلي بدماغ بريمه
طب قاعد ليه ف.بيته يا هيمه
وانت لولاه لا منظر ولا قيمه
رايح جاي وبيأنّبني
وطلب قرشين ممكن يعني
قلتلو طب بس اسمعني
لما اورث أو ابيعلك إبني
يا اختي على العيشه بقت طينه
بطيخ ملوخيه على طحينه
كان نفسي أطل على جنينه
وأعيش أيّامكوا يا افندينا
يخرب بيت عقلك يا وهيبه
فستانك بقى قيمه وهيبه
جبتيه منين دانتي مصيبه!
أوعي يا بنت انتي من العيبه!
بتصوصوي ليه يا ال عصفوره
ماعدتش البنت السنيوره
لبسالي محذق والصوره
عنوان لخبتها الأموره
كان نفسي يا خال متنفسشي
ولا اقول كان فين ولا أسمعشي
دي إيديك مرزبه وكان نفسي
يبقم قلمين وأقوم أمشي..
أنا أسمي عباس بن لمعي
باكتبلك بعذابي ودمعي
راح اقولك آه.. بصوتي وسمعي
وتسبني أشوف حلمي بشمعي
محمد محمد على جنيدي
عنوان 9 شارع مصطفى كامل من شارع الجمهورية / بنى سويف / مصر
محمول/ 0105785807 / 002
ت منزل وفاكس / 0020822314602
m_mohamed_genedy@yahoo.com