لما تبقى أكيد الثورة جاية

لما دمك يبقى مَيه
تبقى أكيد بعت القضية
ونسيت دم اللى راحوا
واللى هتكوا واستباحوا
شرف الوطن وعرض الصبية
لما أقرب الناس يخونك
تهرب الدمعة فى عيونك
ومصيرك يتقرر بدونك
تبقى خلاص بعت القضية
لااااااااااااااااااااااا يا صاحبى
لما شبابك يروح هدر فى ماتش كورة
لما "عين العقل" فى بلدنا تبقى عورة
"تمسك" فى "الشهيد" و"تسيب" البلطجية
تبقى أكيد الثورة جاية
لما الحقيقة تسد "عين الشمس"
ويقولولك "بُكرة" أحلى من "النهاردة"
تقول "الأمس"
لما تشوف الصورة "بالمقلوب"
وتتجرف الأرض "الخصوب"
وتنشف البقرة "الحلوب"
أكيد خلاص الثورة جاية
لما تمشى جنب الحيطة تتشد اشتباه
ويبقى "السجن للجدعان"
والحرية للجُناة
لما محكمتك يا مدنى تبقى عسكرية
ومحاكمة "فرعون" تبقى "تمثيلية"
تبقى أكيد فيه ثورة جاية
لما تتلم "المعونة"
من ست شقيانة طول النهار
واللى "باعونا"
واشتروا فينا حساباتهم بالدولار
لما يبقى صوت المؤامرة والسلاح
أقوى من صوت الحوار
أكيد أكيد الثورة جاية
بس ساعتها يا صاحبى اكتب لابنك "وصية"
قوله أنا "المذكور أدناه"
أقر وأعترف بالخيبة القوية
يا ابنى لما تقوم بثورة
إوعاك تغلط غلطتى
تمشى وتسيب الميدان
إوعاك تاخدك تفاصيل الحياة
وتضيع خطاويك فى كل اتجاه
تمشى تشحت الحرية تانى
وتدوب كعابك من اللف فى مظاهرة أولها فين؟
وآخرها تاه!!
إوعاك تصدق اللى يقول حميتك
الحامى ربك هو سيدك
وإيمانك بالقضية طوق النجاة
يا ابنى لما تقوم بثورة
حاسب تغطى عينك غشاوة
أو تعشش فى عقلك غباوة
أو تتمكن من قلبك قساوة
أو يغريك كرسى
بمنصب أو بِ جاه
واطلب العون من الإله