فوازير رمضان الكروية

*قرار مفاجئ للعامرى فاروق بتعيين عصام عبد المنعم رئيسا لاتحاد الكرة لمدة شهرين واقالة انور صالح رئيس اللجنة المؤقتة الحالية وقرار عصام عبد المنعم وتصريحاته القوية بان قرار المحكمة الرياضية مايساويش تعريفة وان عودة المصرى للدورى لايمكن ان تتم .. وقرار العامرى فاروق بتعيين مجلس ادارة للمصرى لمدة عام بقيادة كامل ابوعلى وهواكبر المتحمسين لعدم مشاركة المصرى فى الدورى هذا الموسم .. بصراحة انا مش فاهم .. يا ترى حد فيكم فاهم حاجة؟! ساعدونى بآرائكم بسرعة!!
*ميداليتان فضيتان هما كل نصيب مصر فى دورة الالعاب الاوليمبية بلندن لعلاء ابو القاسم وكرم جابر البطلين العظيمين .. وماذا كان يفعل المئات من الرياضيين والاداريين والمدربين ونفس الوجوه الرياضية التى نشاهدها منذ سنوات طويلة وكل مرة يعتذرون لنا بدعوى انها اول مشاركة او وزن جديد او البرد او الحر .. انها نفس الوجوه التى تكلف بلادنا الملايين دون اى عائد الا سفرية جديدة فى ال "سى فى" او السيرة الذاتية بتاع "ننوس عين" اهله وليس امامنا نحن الا البكاء والنحيب على اموالنا المهدرة.
*منتخبنا الاوليمبى الهمام فرحنا جدا وخلى رقبتنا فى السما وكلما قدم عرضا اعادوا الفضل لخطة اللعب الجهنمية التى وضعها المدرب العظيم والاداء البطولى "اللى مش عارف ايه" .. وزعلنا جدا وخلى رقبتنا قد السمسمة لما خسر من اليابان وخرجنا من الاوليمبياد الكروى من دور الثمانية وفجأة اجتمعت كل الاسباب المناوئة التى ادت للخروج كالاصابات والارهاق والاجهاد ولم يعترف احدهم بالفشل فى الخطة ولا الاداء ولا اللاعبين ولا الجهاز الفنى. حد عنده حل لهذه الفزورة!
*مع توالى الاحداث والانفلاتات الامنية داخل مصر وعلى حدودها الشرقية مع اسرائيل وقطاع غزة والاخيرة جعلتنى منذ حدوثها وحتى الان ابكى دما على ما حدث لابنائنا من جنود وضباط حرس الحدود المصريين على ايدى "مجهولين معلومين" .. ظهرتت اكبر فزورة بجد: مالذى ينتظر مصير قضيتنا الرياضية الاساسية وهى عودة النشاط الرياضى وبالذات الدورى الكروى .. طبعا اتمنى ان تنجح الجهود التى اعلنوا انها ستبدأ من اجل البحث عن مخرج للازمة الرياضية من خلال ما قراناه عن اجتماع محتمل بين وزير الداخلية احمد جمال الدين ووزير الرياضة العامرى فاروق لبحث هذه المعضلة.. انها اكبر الفوازير!!
*ارجو الا ننسى فى غمرة الاحزان والفوازير مسألة التحقيق الجاد وليس الصورى فى فضيحة "الملابس المضروبة" التى بدانا بها مشاركتنا الاوليمبية .. حققوا فى الامر جيدا حتى لا تصبح كل قضايانا مقيدة "ضد مجهول".
هايدبارك:
Genesh : قلت لى : مقال وتحليل ممتاز عجبني جملة بشرط ان يتغير لاعبو هذا النادى من داخلهم تغييرا شاملا يكفى لتغيير الخريطة وان يتغير معهم اسلوب وفكر الادارة فى النادى ..الاهلي وادارته دايما بيطلعوا للافضل حتي وهم ف اسوء الظروف حتي لاعيبةالاهلي ولوكانو مش في حالتهم ثقافةالفوز مزروعة جواهم وده طبعا نتيجةالادارة الجيدة قبل حتي المدرب اسلوب وثقافة زرعتها الادارة في اللاعيبةمن سنين طويلة وده الفرق بين الاهلي والزمالك هو الادارة واسلوب التفكير واتخاذ القرارات حتي لونشوف لاعيبةالزمالك بتفكرف الفلوس والمرتبات اكترمن تفكيرهم ف الفوز والبطولات وده عيب ادارة هي اللي زرعت جواهم الفكر والاسلوب ده وف النهايةالخاسر هو الجمهور فقط ونادي الزمالك اقصداسم الزمالك وليس المتواجدين فيه.
واقول : كلامك اغلبه سليم .. ولكن الحلول ليست مطروحة بوضوح فى الوقت الحالى.
elbrens_16914 : قلت لى : طول عمر الزمالك كده حارق دم جماهيره وعجبى.
واقول : بصرف النظر عن انتمائك فاننى اوافقك تماما على ما تقول والواقع يقول ذلك.
elbossavocato : قلت لى : ماينفعش نرمم الغلط بالغلط .. نادى الزمالك مفهوش اداره وده ناتج عن صراع الجمعيه العموميه على خطف الفرصه من الاخر للوصول لاهدافه المرغوبه بدون اى اهداف او مبادئ تحدد اى من هؤلاء يستحق فعلا اداره النادى فبالتالى الزمالك الخاسر وجماهيره.
واقول : عندك حق وليت الجمعية العمومية تدرك ذلك وتصلح غلطتها.
sami00 : قلت لى : العادى بتاعنا .. تحليل متميز كالعاده ، صحيح الاهلويه بيلعبوا على الفوز دائما وده كويس ، انما يظهر ان المشكله بقت ان الزمالك و اى فريق مصرى اخر امام الاهلى بقى عامل حسابه على الهزيمه او عارف انه فى الاغلب مهزوم ما لم تحدث مفاجأه ، منساش مره ادارى فى فريق بيتروجيت قبل ماتش مع الاهلى فى كاس مصر فى دور قبل نهائى قال الكلام المعتاد وهنلعب على الفوز و كده ، انما فى وسط الكلام قال ما معناه احنا عاوزين فى اخر ماتش لينا نسيب صوره كويسه !! يعنى هو و من قبل الماتش ما يبدأ وعامل حسابه انه هيتهزم من الاهلى و هيخرج من الكاس وان ده اخر ماتش ليهم فى البطوله وعاوزه يخرج بصوره مشرفه ؟
واقول : كلامك سليم للاسف الشديد.
minaatef_56 : قلت لى : رائع كالعادة .. أولاً: انا اشكر حضرتك على اهتمامك وتعليقك على كلامى. ثانياً: مقالك رائع كالعادة كما عهدناك فى مقالاتك فى جريدتى المحبوبة الاخبار موضوعى ومحايد وصاحب وجهة نظر واضحة. ثالثاً: انا حزين جدااااااااا لموقف نادى الزمالك الحبيب واللى فكرنى بموقف المنتخب فى تصفيات كأس العالم الأخيرة نفس الموقف وللصدفة نفس المدرب (المعلم حسن شحاتة) وبعض اللاعبين اللى كانوا مشاركين فى المنتخب وقتها, بس انا عن نفسى متفائل وحاسس ان الزمالك سيعوض ما فاته وبإذن ربنا يتأهل عن مجموعته مع الأهلى.
واقول : اشكرك جدا على اشادتك وعلى تحليلك واتمنى نفس امنيتك عشان جمهور الزمالك.
QAM : قلت لى : على الرغم من انى اهلاوى وسعيد جداً بتفوق الاهلى على كل المنافسين المحليين منهم والدوليين , ولكنى حزين من اجل الزمالك. واتمنى ان يتذكروا ان مدرب كويس ومجموعه لاعبيبن كويسين , والخبره الموجوده تخلى فيه امل. ولسه الكورة فى الملعب والمنافسه لم تحسم (وبالطبع الاهلى لم يتأهل)
واقول : شكرا على مشاعرك رغم انتمائك المختلف والامل قائم ولكن بشرط التمسك به.
زائر : قلت لى : لما لاعب يبقى أكبر من النادي أو المدرب و الناس بتطلب عودته يبقى لازم الزمالك يخسر لما لعيب أجنبي مايخدش فلوسه و الادارة بكل برود تعتقد إن الكلام المصري و الطبطبة المصري حتمشي معه طبيعي حيمشي و الزمالك يخسر لما جماهير كل ما الزمالك يخسر يطالبو بعودة حسام حسن صاحب فضيحة الأربعة في تونس و موقعة الجلابية و الدور السادس عشر في أفريقيا و شحاتة وصل الفريق دور الثمانية في أول موسم ليه و وصل الزمالك نهائي الكاس في أول شهر ليه و العميل طلع من الأهلي بثلاثة في دور السادس عشر طبيعي الزمالك يخسر لما حسن شحاتة يتهموه إنه معاه لعيبة كويسة بفلوس كثيرة و العميل فلوس قليلة تعالو نحسبها العميل جاب أبو كونيه و وجيه وعاشور الاهتم بفلوس عبس و شحاتة جاب أحمد حسن و رزاق و هاني سعيد بسلفني شكراً جلال ابراهيم لما يبقى فيه ظلم للمدرب من الجماهير و الإعلام طبيعي الزمالك يخسر لما إدارة عايزة ترفد و تلوي دراع المدرب بالعافية طبيعي الزمالك يخسر لما أعضاء النادي ينتخبو مرتضى و عباس بعد السبع سنين طبيعي الزمالك يخسر.
واقول : كلامك زين.. وياريت حد يحلله.
masry_70490 : قلت لى : الزمالك هو الفريق الاضعف حاليا ولا اقصد في المجموعه فقط انما الاضعف في البطوله ذاتها واعتقد انها ستكون من نصيب الترجي.
واقول : احترم وجهة نظرك.