كريم فتح الله.. لاعب خلوق ومحترم.. ممكن نقول عليه رحالة الكرة المصرية.. لف في أكتر من 6 أندية وفي الآخر استقر في الاتحاد السكندري.. بدأ في طنطا وراح الأهلي.. وبسبب ظروف الاهلي معرفش يحافظ عليه.. ودلوقتي الأهلي بيحاول يرجعه تاني.. تعالوا نقرا ونعرف عنه أكتر.. اولا نتكلم عن بدايتك فى الكورة؟ انت لعبت فى اكتر من نادى قبل الاتحاد؟ فعلا انا بدأت فى نادي طنطا فى الاشبال لغاية سن 15 سنة وجتلى عروض من كذا نادى وانا صغير ابرزها الاهلى وفعلا روحت الاهلي ولعبت سنة هناك مع الكابتن بدر رجب والعرض كان عن طريق الاستاذ/احمد درويش قعدت لمده سنة وبعد كدة حصلت مشاكل بين طنطا والنادى الاهلى على المقابل المادى ورجعت طنطا تانى ولعبت وتألقت وبعد كده رجعت مفاوضات الاهلى تانى معايا ومع النادى ورجعت الاهلى تانى مع الكابتن صالح وعادل عبد الرحمن بس الاهلى معرفش يخلصونى من طنطا ولا ينهو التفاوض النهائى من طنطا. فى الفترة الى قضتها مع الاهلى كان فى حد بيتكلم عليك من الفريق الاول يعنى؟ لا انا ساعتها كنت لسه صغير وماكنش فى اهتمام باللعيبة الصغيرة وقتها زى دلوقتي كان الكل بيعتمد على الشراء من برة. طيب ولما رجعت طنطا تانى؟ رجعت طنطا ولعبت كان عندى 19 سنه سعتها وطلعت فريق اول وكان الكابتن علاء فتح الله وفضله كبير جدا عليا بعد ربنا، هو اللي طلعنى فريق اول وكان على طول (يزق) فيا علشان اظهر وابان فى الماتشات وصعدت ولعبت مع الكابتن طارق يحي والكابتن حمادة مرزوق ولعبت فى النادى سنتين والحمد لله ظهرت فيهم وصعدنا للدورى الممتاز.. وبعد ما نادى طنطا صعد الدورى الممتاز كان دورك ايه بعد كده؟ أول ماصعدنا الدورى الممتاز النادى اشترى لعيبة كتير من برة عندهم خبرة فى الدورى الممتاز فطلبت من النادى انى امشى علشان الاقى فرصة اعارة فى اى نادى والعب وطلعت فترة اعارة فى نادى اسمو الحناوي مع الدكتور احمد عاشور لمده 4 شهور، بس فى الفترة دى الكابتن محمد صلاح كان بيدرب فريق طنطا وكان فى ماتش بين الحناوي ونادى طنطا شافنى الكابتن محمد كان فاكرنى لعيب من بره مش مصرى فكان عايز يشترينى فى شهر واحد وطلب فعلا ده فى ساعتها وكان متمسك بيا جدا فا كان ساعتها مهاب سعيب بيلعب فى طنطا فا قال له ياكابتن دا ناشئ اصلا من ناشئين نادى طنطا، وفى فترة اعارة فطلب الكابتن من الادارة والمنسق العام انهم يقطعوا الاعارة وارجع النادى تانى، وفعلا دة الى حصل قطعت الاعارة ورجعت تانى طنطا كنا لسة فى الدورى الممتاز كملت معاهم الدور الاول ولعبت الدور التانى الحمد لله ومحصلش نصيب ان احنا نكمل فى الممتاز، نزلنا الممتاز ب فالنادى الاولمبى طلبني من طنطا وروحت الاولمبى وبعد كده روحت على فريق نبروه. انت روحت على الاتحاد من نبروه؟ فعلا انا روحت الاتحاد من نبروه بس مش من اول مرة. روحت فترة اختبار مع الكابتن طة بصرى لكن في الآخر قال لي ان القائمة عنده فيها زحمه وقال لي روح العب فى نادى يلاعبك وانا هرجعك تاني".. وده علشان اضمن انى العب وفعلا روحت لعبت فى كهرباء طلخا والداخلية بس ماكملتش فى الداخلية وفى اخر فترة القيد رجعت على طول على نبروه واتقيدت فى نبروة قبل ما القيد يقفل بيوم واحد. فى الفترة دى الاهلى كانت عينه عليك؟ ومعروف وفى كلام كتير عن الموضوع ده ان الاهلى عايز يتعاقد معاك؟ فى الفترة الاخيرة فعلا فى كلام من الاهلى كلام بس مافيش اى حاجه رسمي.. في اول الموسم ده لما بدأت مع الاتحاد حصل كلام بس فى اى عروض من اى انديه تانى؟ فى اكتر من عرض جالى من المقاصة واتحاد الشرطة بس ادارة النادى هنا والجهاز فى الاتحاد رافضين الموضوع ده نهائى وكمان انت عارف الاتحاد او المصرى اندية جماهيرية بتبقى فى صعوبة شويه في انتقال اى لاعب منهم لاى نادى تاني. مين الى طلبك فى الاتحاد؟ انا جيت عن طريق وكيل لاعبين اسمو محمد عبد الحافظ ليه علاقة بكابرال وهو اللى رشحنى للنادى وكان ليا ماتش مع سموحه والكابتن كابرال كان موجود علشان يتفرج عليا وقال لى انت لعيب كويس وعندك امكانيات كبيره وطلب CD ليا علشان يتفرج عليا تانى وشاف ال CD وطلب من المجلس التعاقد معايا. اول ماتش لعبته مع الاتحاد؟ كان مع انبى الموسم اللي فات كان اخر ماتش فى الدورى واول ماتش العبه اساسى وبعد كده لعبت ترسانة وطنطا فى الكاس وكنت اساسى. والموسم دة 2010/2011؟ بدات معظم الماتشات وبدات اساسى وماتش دجلة كنت احتياطى ومالعبتش وكنت مصاب فى ماتش الانتاج. قول لنا بقى على كواليس ماتش الانتاج؟ الماتش دا كان يوم كئيب علينا وعلى اللعيبه والجهاز والناس كلها.. بس انخفاض المستوى ده بيحصل لكل الفرق المهم انك تقوم تانى والكابتن كابرال بطبيعته لما بيحصل كده فى اى ماتش مابيتكلمش ولا بيجيب اللوم على اللعيبة . وانا الصراحه علشان مابقاش كداب... مشيت بعد الجون الخامس ماقدرتش اقعد اكمل الماتش انا كنت فى المقصورة علشان كنت مصاب فى انكل رجلى. وايه الى اتحكالك من اللعيبة لما روحت النادى بعد الماتش؟ ماحصلش حاجه هوا طبيعه الكابتن كابرال ما بيتكلمش بعد الكبوات الى زى كده بيقعد يفوق فى اللعيبة ومايرميش اللوم عليهم علشان يفوقو من الى كبوة الى حصلت دى وحالتهم النفسيه كانت متدمرة.. وهو اصلا محبوب جدا بين اللعيبة واسلوبه كويس جدا. وماتش الحرس انت بدأت فيه كله وتألقت واتغيرت اخر 10 دقائق؟ الحمد لله كان ماتش كويس وانا اتغيرت علشان اتصبت فى رجلى وكنت بادئ اصلا وانا تعبان والحمد لله على كل حال بدايتك كانت مقلقة فى الاتحاد؟صح؟ عرفت الكلام ده منين... وانا فى نبروة قبل ما اروح الاتحاد فى اخر ماتش فى الدورى كان قصاد دمنهور وانا بسخن قبل الماتش جالى شد فى الضامة فمقدرتش العب ومالعبتش فعلا الماتش وجيت على الاتحاد وكملت علاجى هناك مع الدكتور اليمانى والحمد لله خلصت العلاج فى 10 ايام وبدأت مع النادى فى الاخر بنشكرك يا كابتن وبنتمنالك التوفيق ان شاء الله فى الماتشات الجاية.. ان شاء الله تشوفو النادى فى احسن مكان اكراما لجمهور اسكندريه