حوار خاص - محمد مكي : اى حد يشوف الحوار ده يدعى للكابتن محمد عبد الوهاب الله يرحمه

اتكلمنا من فترة مع الكابتن محمد مكي نجم فريق حرس الحدود واللي برز معاه في السنين اللي فاتت وكان أكتر مثال للأخلاق والإلتزام وحتى في لحظات التألق عمره ما عمل مشاكل ... اتنقل كابتن مكي لفريق وادي دجلة وهو بيتمنى التوفيق لناديه السابق حرس الحدود وبيتمنى يتألق في دجلة علشان ينقذه من موقفه في الدوري ويبقى طريق لإحترافه في ليرس البلجيكي.. وكان لينا الحوار ده مع النجم الخلوق..
في البدايه عرفنا بيك؟
محمد شعبان محمد محافظه الفيوم / سنورس .. السن 29 سنه .. والشهره محمد مكى .
كلمنا عن بدايتك تلعب كورة؟
البدايه كانت فى مركز شباب سنورس لمده سنتين.. وبعدها لألمونيوم سفاجا لمدة سنتين كمان.. وبعدها رحت بتروجيت لعبت هناك 3 مواسم وعقدى خلص وكان جايلى أكتر من عرض بس انا فضلت حرس الحدود لأنه كان مسمع في الوقت ده .
إزاى وصلت لحرس الحدود؟
كان فى ماتش بينا وبين القناه والكابتن "حلمى طولان" كان مرشحني أنا و"محمد الهردة" وحضر المباراة الكابتن طارق العشرى وأختارنا وانتقلنا للحرس انا والهرده في سنه واحده.
شعورك ايه وانت لابس شارة الكابتن؟
اكيد طبعا هي مسؤليه والكابتن محمد حليم أصّر انى البس شاره الكابتن كتكريم ليا .. وأكيد انك تلبس شاره الكابتن دى مسؤليه كبيره والحمد لله ان فيه حب وألفه بينا.
أيه النادى الى الكابتن محمد مكى أتمنى انو يلعب فى صفوفو غير الحرس؟
متقدرشى تقول دلوقتى بتمنى ألعب ف النادى الفلانى لأن كل الأنديه بقت متساويه والمستوى واحد.. ودى مش أجابه دبلوماسيه لأن فعلا انت لو حبيت تختارهتحتارلأن مفيش نادى راكب فوق نادى قوي والأمور قريبه.
هل لو الكابتن طارق العشرى ساب الحرس دا هيأثر على الفريق؟
أكيد طبعا مفيش شك لأن الكابتن طارق العشرى معانا بقالو خمس سنين واحنا اصبحنا اسره واحده والمدرب الى هييجى جديد هيحتاج وقت لحد لما يحصل تألف بينه وبين اللعيبه.. والكابتن طارق من افضل المدربين فى مصر وهيضيف لأى فريق سواء الحرس او غيره.
ليه محمد مكى منضمش للمنتخب لحد دلوقتى مع أنو أفضل من لعيبه كتير راحو المنتخب؟
للأسف أنا معنديش أجابه على السؤال ده بالذات لأنى مش عارف السبب.
مين أحسن مدرب في مصر من وجهة نظرك؟
مينفعشى تقيسها كده لان النتيجه هي الى بتحكم لو المدرب عمل نتايج كويسه مع فرقته بيكون كويس والعكس.. زى الفرود لو ماجابش جون بنقول انه مش كويس مع انه ممكن يكون بذل مجهود اكترمن ناس كتير فى الملعب.
مين المدرب الى ليه فضل عليك؟
أى مدرب قابلتو ليه فضل عليا لأن كل واحد منهم فادنى فى حاجه معينه وكل حاجه خدتها منهم استفدت بيها ف المرحله الى بعدها وأكتر حد ليه فضل عليا هوا الكابتن "محمود الدناوى" لانى بعتبره زى والدى وهو اللي مربيني وأثر فيا بشكل كبير .
هل فكرت ف الأحتراف؟ ولو جتلك فرصة للإحتراف هتقبلها؟
أكيد أى حد يتمنى الأحتراف لكن فى ظروف بتقابلك هي الى بتوقفك... يعني مثلا ازاى انا ملعبتش منتخب وهفكر في الاحتراف المنتخب هو اللي بيسوق اللعيب..
يعنى لو اللعيب ملعبش في المنتخب مينفعش يحترف؟
هاتلى أمثله حد احترف من غير ميكون لعب فى منتخب مصر لو لقيت هيكون واحد او اتنين كل الى بيحترف بيحترف عن طريق المنتخب.
دا معناه ان المنتخب هو طريق اى لاعب للأحتراف؟
أكيد دى حاجه مافيهاش اى شك.. والدليل ان علشان اى لاعب يحترف فى انجلترا لازم يكون لعب 75 % من مباريات منتخب مصر.
هل حسيت وقت الاصابه انك ممكن متلعبش كوره تانى؟
وقت الاصابه ظروف قاسيه جدا ويارب محدش يتعرض ليها سواء لاعب او اى حد تانى .. والمشكله مش في الاصابه المشكله انى مكنتش اعرف انا عندى أيه .. ورحت لدكاتره كتير وكله بيقول مفيش حاجه وانا مش قادر وتعبان وفي الوقت ده حسيت انى ممكن ملعبش كوره تانى .. بس الحمد لله فى دكتور عرف المشكله.. والاصابه اخدت 15 يوم وبقيت كويس الحمد لله وقدرت ارجع الملعب تانى بمستوى كويس.
ايه الى اتعلمه محمد مكى من الاصابه؟
اولا اتعلمت الصبر.. وحسيت بالناس اللي حوليا وعلمتنى ازاى اقدر افكر كويس فى اى قرار هاخده.. لان وانت بعيد عن الكوره فى ناس بتبعد عنك والسؤال بيقل فا بتقدر تعرف مين الكويس من الوحش وبتقدر تفنط حياتك تانى من جديد.. لأن قبل الاصابه ناس وأندية كتير كانت بتكلمنى وبعد الاصابه الناس بعدت.. وده علمنى انى مضحيش علشان حد بشكل كبير، ممكن اضحى بس مجيش على نفسى لأنى اكتشفت انى كنت بلعب بقى لى 4 شهور وانا مصاب فأتعلمت انى لما اكون تعبان اريح .
هل شايف ان الحرس هيقدر ينافس على الدورى الموسم دا؟
الفرق كلها السنة دى متقاربه في المستوى لأن كله دعَم فرقته بشكل كويس .. لكن انا مقدرش اقول اننا هناخد الدورى لأن المنافسه بتحتاج حاجات تانيه كتير وممكن تكون وجهة نظرى غلط.. لكن بأذن الله هنحاول نكون في المقدمه... وفي النهايه دا توفيق من عند ربنا .
هل شايف ان مستوى الفرق ضعيف السنة دى وبالأخص الفرق الكبيره؟
هو المستوى مش ضعيف لأن باقى الفرق هي اللي بقت قويه وكلها دعمت.. ممكن يكون فى انخفاض في مستوى فرق كبيره بس لما بتتفرج على اى ماتش مش بتقدر تتوقع النتيجه.. الأول مثلا الاهلى كان بيلاعب حرس الحدود كان المعروف ان الاهلى هوا اللي هيكسب لكن دلوقتى مبقاش ينفع تتوقع مين هيكسب..
ودلوقتى المستوى اصبح متقارب لأن كل الفرق بقت مؤسسات.. وده معناه ان الفرق الكبيره مش هي اللي ضعفت انما الفرق الصغيره هي اللي بقت أقوى.
مين المثل الأعلى للكابتن محمد مكى؟
فى لعيبه كتير انا بحب لعبها لكن انا اتمنى انى اوصل لمستوى الكابتن احمد حسن او محمد بركات.. وبعشق الكابتن حسام حسن من وقت ما كان لعيب لأنه مثال للروح والنشاط .
مين اقرب لاعب ليك حاليا؟
الكابتن محمد حليم كابتن فريق حرس الحدود
علاقتك بالكابتن محمد عبد الوهاب الله يرحمه كانت عامله ازاى؟
والله دى حاجه انا مقدرش اوصفهالك وفعلا انا مفتقد محمد جدا لحد دلوقتى لأن محمد انا كنت اكبر منه بسنتين او تلاته لكن كنت بحس انه زى ابنى...
كان احساسي ناحيته كان نفس احساسى ناحية مريم بنتى.. انا كنت ممكن أأكلو زي ما بأكل مريم.
وفاة الكابتن محمد عبد الوهاب اثرت فيك ازاى وعلمتك ايه؟
علمتنى انى مرتبطش بحد تانى زى ما كنت مرتبط بمحمد لان بموته انا حسيت ان الدنيا كلها فضيت..
دلوقتي ممكن اقرب من الناس وكل حاجه بس مش بنفس الطريقه الى كنت بيها مع محمد .
امتى ممكن تقول كفايه كوره كدا؟
انا لسا ملعبتش علشان ابطل.. لكن هعمل ده لما احس اني مش قادراكمل علشان محدش يقول مكى مش قادر يلعب.
اوقات كتير بنشوفك فى كذا مكان ف الملعب، ايه المكان الى بتكون مرتاح اكتر فيه او بتقدر تأدي فيه اكتر؟
انا بحاول اجتهد في المكان الى المدير الفنى بيلعبنى فيه.. انا ممكن المدرب يدينى تعليمات بنزل اطبقها واخرج ... اما انا فا برتاح فى اى مكان فيه الكوره .. وبستمتمع لما بلعب حر فى وسط الملعب .
تحب توجه رساله لأى حد من خلال المجله؟
اولا انا بشكرك وبشكر كل الناس القائمين على المجله.. وبقول لكل للناس كل سنه وانتو طيبين.. واتمنى ان اى حد هيشوف الحوار ده يدعى للكابتن محمد عبد الوهاب الله يرحمه ويقرأ ليه الفاتحه .