كنباوى وكنباوية.. حلقة رقم (95)..المصالحة الوطنية مرفوضة شكلا وموضوعا !

كنباوي: إيه رأيك يا كنباوية في حكاية المصالحة الوطنية دي اللي بيقولوا عليها؟
كنباوية: أي تنازلات من الحكومة أو الرئيس للإخوان حيعتبرها الإخوان خوف ومداهنة وأنا وكل العاقلين حنعتبرها ابتزاز سياسي الحكومة حتقبله لرأب الصدع وفض المتظاهرين ودول مالهمش أمان ولا حد يقدر يآمن لهم تاني دول عاوزين كل حاجة يا بلاش مش حيرضوا بأي عطايا تقدم لهم، همه عاوزين الكعكة كلها عاوزين مصر وحكم مصر، يبقي أي تفكير في مصالحة وطنية هبل سياسي وحتيجي علينا بالخراب إزاي تآمن للتعالب والذئاب إنها تحرس مزرعة أرانب؟
كنباوي: عندك حق المفروض السيسي يكون حكيم ويعرف أن الإخوان الذوق مش حينفع معاهم ولا المدادية ولا المسايسة، دول لازم يتاخد معاهم موقف حازم وحل قاطع الحلول الوسط والحلول اللي بترضي جميع الأطراف بتبقي فاشلة في النهاية وما بتوصلش لأي شىء مجدى بالعكس دي بتضر أكتر ما بتنفع.

كنباوية: الابتزاز الإعلامي الغربي والمطالبة بالافراج عن مرسي ده حيعرقل مسيرة مصر نحو البناء والخروج من الأزمة الاقتصادية الطاحنة اللي احنا فيها لازم السيسي يوجه رسالة للعالم كله يقول فيها إن مصر لا تقبل أي تدخل أجنبي في شئونها أو ما تراه في الصالح العام ولا تملي أي دولة شروطا على مصر وقادتها وأن مصر لن تعمل إلا ما يتماشي مع مصلحة شعبها علشان العالم كله يبطل يتدخل في شئونا كفاية بقي وصاية من الغرب.

كنباوي: عندك حق أنا خايف من دعاوي المصالحة اللي انتشرت الأيام اللي فاتت دي وخايف من طيبة الرئيس الجديد الناس لازم تفهم أن الإخوان مش حيرضوا بأي بديل عن كرسي الحكم إذا كان المصريين عاوزين يدوهم الحكم تاني يكملوا في موضوع المصالحة ده ويا إما يتعاملوا مع الإخوان زي أي جماعة إرهابية.

كنباوية: لازم محاسبة الإخوان على جرايمهم وعلي تحريضهم على العنف والناس اللي ماتوا في المظاهرات وشباب الإسكندرية اللي اترمي من فوق السطوح، لازم يا كنباوي
كنباوي: الأول لازم يتم القبض على البلتاجي وصفوت حجازي لازم دول أُس الفساد ورأسه وأكبر المحرضين على الاصطدام مع الجيش همه مش حيحكمونا بالعافية كفاية بقي.

كنباوية: دول حيتمادوا في التطاول والإرهاب لو الحكومة فضلت ساكتة عليهم والسيسي هو كمان أنا مش عارفة ليه ساكت عليهم.
كنباوي: السيسي صابر وبيتشاور وماحدش عارف هو بيفكر في إيه
كنباوية: المفروض مايعديش شهر رمضان علينا إلا وموضوع الإخوان ده منتهي كفاية بقي عايزين نشوف حالنا ولا حنفضل كدة ندادي فيهم العمر كله؟ دول لازم ياخدوا على دماغهم علشان يعرفوا أن الإرهاب نهايته وحشة.

كنباوي: اهدي يا كنباوية وطولي بالك شوية الحكاية مش قفش كله بالصبر
كنباوية: صبرنا كتير على بلاويهم حنصبر أكتر من كدة إيه تاني للصبر حدود يا كنباوي واحنا خلاص فاض بينا.
كنباوي: الصبر، الصبر يا كنباوية
كنباوية: انت يا راجل عايز تجنني انت عاوز صبر أكتر من اللي صبرناه عليهم لازم السيسي يتحرك وينهي مهزلة الإخوان دي والمظاهرات دي.

كنباوي: المظاهرات السلمية حق مكفول للجميع
كنباوية: السلميه يا كنباوي لكن مظاهرات الإخوان عمرها ما كانت سلمية دول معاهم سلاح يسد عين الشمس.
كنباوي: دول مسكوا عربيتين مليانين بالسلاح في طريقهم لرابعة العدوية
كنباوية: آديك قلت بنفسك اهه يعني همه مش ناويين على خير
كنباوي: أيوه مش ناويين على خير وناويين على شر
كنباوية: يبقي همه ناويين على شر واحنا نقف نتفرج عليهم لازم الجيش ياخد موقف وسريع كمان كفايانا بطء وسكوت كفاية السرعة مطلوبة في المواقف دي
كنباوي: اهدي وقومي حضري لنا الفطار
كنباوية: حاضر ياكنباوي ربع ساعة ويكون الفطار على السفرة
كنباوي: صحي العيال اللي بتقوم على آدان المغرب دي انا مش عارف هو ده يبقي صيام وهمه واخدين اليوم كله نوم ؟
كنباوية: معلش ربك بيسامح والدين يسر مش عسر
كنباوي: على قولك ربنا كريم وبيغفر للعباد يلا صحي العيال
كنباوية: حاضر ياكنباوي !