كنباوى وكنباوية.. حلقة رقم (79).. لمس أكتاف !!

كنباوية يبدو عليها التوتر هذه الأيام منزعجة شاردة ساهمة تتحدث مع نفسها كثيرا ثم تصمت طويلا وتنتابها ردود فعل تبدو عنيفة على كنباوي لذا قرر مصارحتها بما يراه فيها لمحاولة معرفة أسباب تغييرها المفاجئ فذهب إليها مداعبا.
كنباوي: مال القمر الساطع والبدر المنور سرحان في إيه ؟ وبيفكر كتير ليه ؟ يا ترى شريكة عمري وحياتي محتاجة فلوس ؟ والميزانية الشهر ده خرمت منك ؟ قولي ما تتكسفيش الأشية معدن وأنا سداد وقدها وقدود.
كنباوية: هو أنا من امتى يا كنباوي كانت قلة الفلوس بتشغلني أو بتزعلني ؟
كنباوي: ما هو علشان كده أنا مستغرب طباعك اليومين دول وردود أفعالك وأقوالك مع العيال والشخط والزعيق دايما على الفاضي والمليان مالك إيه جرالك إيه اتغير فيكي ؟ فين صبرك ؟ وطولة بالك ؟
كنباوية: قرفانة يا كنباوي قرفانة بقيت خايفة على مصر أوي الأيام دي
كنباوي: من إيه ؟
كنباوية: من الإخوان
كنباوي: ما الإخوان ماسكين البلد من سنة فاتت اشمعنى الأيام دي ؟
كنباوية: علشان يوم 30 يونيو قرب خلاص وماعدش فاضل غير كام يوم والإخوان بيعملوا اللي يقدروا عليه علشان اليوم ده يبوظ ويبقى زيه زي أي يوم عادي ويطلع فشنك زوبعة في فنجان وساعتها يبقى الدنيا خربت والإخوان ما حدش حيقدر عليهم بعد كده وحيركبونا ويدلدلوا رجليهم وحنبقى مألستهم ومسخة يتريقوا عليها في كل مكان وزمان
كنباوي: بقى ده اللي مخليكي متوترة ؟
كنباوية: فيه إيه أكتر من كده ؟ ده آخر حلم للمصريين أنهم يتخلصوا من كابوس الإخوان لو الشعب ما نزلش كله يطلب رحيلهم يبقى الثورة ضاعت واتسرقت بجد
كنباوي: اطمني الشعب كله نازل وحتحصل مدعكة بس حتنتهي على خير إن شاء الله
كنباوية: يا ريت يا كنباوي بس دول مش حيفرطوا في الحكم بسهولة والشعب بيغلي منهم
كنباوي: الجيش حيجبرهم على ترك الحكم إذا لزم الأمر
كنباوية: وايش ضمنك أنهم الجيش حيبقى ضد مرسي ؟ ما يمكن أمريكا عايزة مرسي ولو مش عايزة مرسي فهى برضه مش عايزة الجيش
كنباوي: أمريكا عايزة اللي يضمن مصالحها حتى لو كان الشيطان نفسه ما تفرقش معاها الأسماء زيد أوعبيد أومرسي أو السيسي
كنباوية: يا ريت يا كنباوي لأن الناس استجارت خلاص من حكم الإخوان
كنباوي: ومين سمعك ؟ دول ملاعين ولاد ملاعين ربنا ينصرنا عليهم
كنباويه: أنا بيني وبينك مش شايفة خلاص لا في الجيش غير كده الإخوان مش حيسيبوا البلد
كنباوي: أنا سامع أن التعابين عاوزين يقعدوا مع حمدين علشان يتوصلوا لحل معاه علشان يفوتوا يوم 30 على الثوار
كنباوية: اللي بيسعى دايما للتفاوض بيبقى حاسس بضعفه وفشله وهم دلوقتي حاسيين بكده بس حمدين فاهم وواعي للحيل بتاعتهم دي ومش حيقبل ده
كنباوي: انتي عرفتي صفوت حجازي بيهدد المصريين وبيقول إن اللي حيرش مرسي بالميه هو حيرشه بالدم
كنباوية: سمعته ده متخلف ومش واعي للي هو بيقوله سيبك منه
كنباوي: وحازم أبو إسماعيل ما هو كمان كلها كام يوم ويلم أنصاره ويعادي الثوار والمعارضة زي ما بيحصل كل مرة
كنباوية: المرة دي التيار شديد على أبو إسماعيل وأنصاره مش حيقدر لا هو ولا أنصاره يعملوا أي حاجة
كنباوي: فكرك كده ؟
كنباوية: أيوه أنا مش قالقني أبو إسماعيل ولا أنصاره أنا اللي قالقني اصطدام المصريين ببعض كل حرب ولها خسايرها ودي حرب يا كنباوية لازم تفهمي ده كويس وما تزعليش ومفيش حلاوة من غير نار
كنباوية: بس ده دم المصريين يا كنباوي
كنباوي: مرسي اللي عايز كده عايز يحكمنا غصب عنا رغم إرادتنا مش راضي يعترف بفشله نعمل له إيه ؟ راكب دماغه زي صدام وزي بشار ومصيره أغبر ونهايته وحشة بإذن الله ويبقى هو اللي جابه لنفسه
كنباوية: حد مش بيفهم وعنده غباء سياسي تعمل له إيه بقى ؟
كنباوي: أشيله من الحكم وده اللي المصريين ناويين يعملوه يوم 30 بإذن الله
كنباوية: تفتكر حننجح ؟
كنباوي: على قد زهقنا من الإخوان حننجح وهم زهقونا بما فيه الكفاية
كنباويه: وده أملي برضه يا كنباوي
كنباوي: بإذن الله أملك وأمل المصريين حيتحقق في اليوم ده وحيجي علينا رمضان واحنا زي الفل وحنعيد بجد وبفرحة ما بعدها فرحة لما يغور مرسي والإخوان
كنباوية: يا رب يا كنباوي، يارب