كنباوي وكنباوية.. حلقة رقم (89).. الجيش عينه حمرا ومرسي عينه مكسورة

كنباوية تضحك ضحكات مدوية وهي تسمع صوت الطائرات تحلق في سماء القاهرة وفوق منزلها لطمأنة المصريين فيسمعها كنباوي فيتجه إليها مستفسرا كعادته دائما: إيه اللي بيضحكك على صوت الطيارات؟
كنباوية: الجيش بيقول لنا اطمنوا وبيوصلنا رسالة إننا في أمان ومانخافش من تهديدات الإخوان ولا من تهديدات الجماعات الإسلامية ولا من أنصار أبو إسماعيل
كنباوي: مابقاش حيلتهم غير التهديد وغير أنهم يتكلموا عن الشرعية الأفضل لهم يتكلموا عن كرسي الاتحادية لأن هو دا اللي همه خايفين عليه ومش مهم عندهم مصر ولا المصريين.
كنباوية: مرسي والشاطر والبلتاجي والعريان حيستقتلوا على الكرسي.
كنباوي: كان معاهم وفي إيديهم وهمه اللي ضيعوه منهم بصلفهم وتعنتهم وتعاليهم وغرورهم وتهميشهم وإلغائهم لكل فصايل مصر واستحواذهم على كل المناصب في الدولة.
كنباوية: عندك حق ماعرفوش يصونوا النعمة اللي كانت معاهم نسيوا أن فيه ناس تانية غيرهم بتشاركهم البلد مصر مش إخوان وبس.. مصر كل الأطياف بس همه شوية خرفان مش فاهمين طبيعة المصريين كويس.
كنباوي: همه لو كانوا عارفين طبيعة الشعب ده كانوا تعالوا عليه بالشكل ده؟ مين اللي قال إن الإسلام هو الإخوان؟
كنباوية: الإسلام في قلوب الناس وعقولها وفي تعاملاتها أنا صعبانة عليا الناس الجهلة المغيبة المضحوك عليها .
كنباوي: مايصعبش عليكي غالي دول يستاهلوا اللي بيشفوه دلوقتي وأكتر منه كمان أنتي عارفه أن إهانتهم للجيش طول الفترة اللي فاتت مش حتعدي بالساهل والإخوان خايفين من بكرة أكتر من الخوف على ضياع الكرسي عارفين أن المصريين حتحاسبهم على اللي همه عملوة طول السنة اللي فاتت طول مدة حكم محمد مرسي
كنباوية: أيوة عارفة أن ده اللي راعبهم وخصوصا أنهم فقدوا تأييد الداخلية وأنها انحازت للشعب ضدهم هي كمان ماعدش معاهم غير الحرس الجمهوري وبس وشوية المتأسلمين أنصارهم ده حتي حزب النور السلفي تخلي عنهم خليهم يشربوا بقي اللي زرع شر بيجني شر.
كنباوي: العملية بتتأزم اكتر كل شوية وخصوصا بعد ماحركوا مليشياتهم نحو الميادين.
كنباوية: مش مهم الجيش فاهم وعارف هو بيعمل ايه وكل ده مدروس ومحسوب حسابه مسبقا واللي أصعب كمان من كده الجيش ماسبهاش للاحتمالات حط خطط لكل تصور ممكن يحصل وكل شيء مدروس اطمن أنت ياكنباوي وريح بالك أنا قلت من الأول إن الجيش هو اللي حيحلها وربك معانا.
كنباوي: اللي زود عليه الطينة بلة الاستقالات اللي نزلت ترخ على دماغه زي المطرة استقالات محافظين واستقالات وزرا وهلم جرة.
كنباوية: بيلحقوا نفسهم قبل المركب ما تغرق بينطوا منها وده عين العقل علشان تفضل ليهم ذكرى حلوة في عيون المصريين اللي ما بينسوش حاجة أبدا
كنباوي: أنا قلت إن شكل السيسي في خطاب مرسي الأخير كان بيقول أنه ناوي على حاجة.. هدوؤه كان الهدوء اللي بيسبق العاصفة واهه العاصفة قامت يبقي يوريني مرسي والإخوان وأبو إسماعيل وعاصم عبد الماجد وصفوت حجازي حيوقفوها إزاي؟
كنباوية: دول ماكانش ليهم الا أمن الدولة اللي كانت حكماهم وشكماهم وملجماهم الله يرحم عبد الناصر لما قال الإخوان مالهمش أمان الله يرحمه كان عارفهم وداري بيهم قال ايه واحنا روحنا اتعاطفنا معاهم كنا مغفلين لكن ربنا فوقنا خلاص وخرجنا من جهلنا ورحمنا وحيرحمنا منهم بأذنه إن شاء الله.
كنباوي: هم وانزاح وخلاص فقدوا شرعيتهم 17 مليون أو اكتر رافضين حكمهم عايزين إيه تاني؟
كنباوية: عايزين يتهانوا أكتر من كدا إن شاء الله حيجي رمضان وهمه مش في الحكم.
كنباوي: حيبقي احلي رمضان عدا على مصر وشعب وأهل مصر.
كنباوية: نسينا في الهوجة دي نشتري ياميش رمضان .
كنباوي: التجار عملوا بلح المرشد ارخص بلح في السوق ب 2 جنيه والله ده كمان 2 جنيه كتير عليه وبلح السيسي اغلي بلح وبلح الثورة كمان غالي ده الناس مش حترحمهم حيطلعوا على عنيهم البلا زي ماقرفونا سنة بحالها ولوو دراعنا بدستورهم ومجلس شورتهم ونائبهم العام.
كنباوية: كفاية كلام عنهم وقوم نتفرج على محمود سعد ووائل الإبراشي نشوفهم بيقولوا إيه عن أحداث الساعة.
كنباوي: لا تعالي نتفرج على المسلماني وتحليله لموقف الإخوان من بيان الجيش
كنباوية: خلاص نتفرج عليهم كلهم كلهم أحسن من بعض وزي الفل
كنباوي: طيب اعملي لنا كوبايتين شاي وهاتي صينية الكيكة من الفرن ويلا بينا
كنباوية: من عنيا ياكنباوي أنت تؤمر
كنباوي: الأمر لله وتسلم عنيكي وايديكي ياكنباوية!