الرئيس "الخالد" و"المتخاذل"

بعد الأحداث الغريبة اللي حصلت في السنتين الماضيتين.. وأنا بحب أكتب وأعبر عن نفسي بدل ما انفجر.. واخترت اسم مواطن محروق دمه للكتابة - لكن بصراحة اللي ابن" العياط" عمله فوق حرقة الدم.. مش هتكلم على خطاباته اللي ديما بيطلع فيها بليل زي الخفاش..عارفين انهم تربية سجون والمعاملة في السجن أثرت فيهم كتير.. مش موضوعنا.
مش هتكلم أن ابن "العياط" عليه قضية تخابر مش قضيتي دلوقتي.. مش هتكلم أنه رئيس جيد أو سيئ مش موضوعي.. مش هقول إن نيته خير أو شر النوايا بين إدين ربنا.. مش هتكلم عن إنجازات وإخفاقات خلاص الشعب اتعود.. لكن عاوز اتكلم عن نقطة واحدة ودي اللي جابتلي الضغط.. ابن" العياط" قال إن دمه فداء الشرعية والناس صوتت وقالوا يبقا دمك يا مرسي.
لما حصلت نكسة 67 خرج الرئيس جمال عبد الناصر وقال أتحمل المسئولية كاملة وقررت أن أتنحي.. الخطاب اللي خلى الرجالة تبكي قبل الستات.. اللي خلى شعب بأكمله ينزل ويقول خليك وعاوزينك.. علشان كدا بعدها ب 6 سنين انتصرنا في حرب أكتوبر.
لكن ابن" العياط" قال دمي فداء الشرعية.. اللي هو اغتصبها أصلا.. ظلم.. ومات ناس في عهده وبسببه وبعلمه وباقتناع كامل أن هو دا الصح.. برضو الرجالة بكوا قبل الستات.. لكن علشان اختاروه.. وبرضو الشعب نزل في الشارع لكن علشان تخلعه.
بحسبة بسيطة زي اللي كنا بناخدها في مادة الرياضيات زمان.
المعطيات: مظاهرات مصر دخلت موسوعة جينس.. والناس لسة بتموت.. ومرسي لسه بيقول الشرعيه بدمي.
المطلوب: أن ابن "العياط" يعرف أن الله حق وده هيشوفه بعينيه طالما عرض دمه على الشعب.
العمل: الشعب هيعرف ابن "العياط" يعني إيه دم ويعني إيه وطن ويعني إيه شرعية.
البرهان: علشان خاطر مصر.