من غير سبب

بقلم : اميرة بهى الدين
بكرة عيد الام !!!
عادي جدا ، اصحي من النوم جوايا عياط !!!!
الحقيقه اني بقالي كذا يوم باصحي جوايا عياط ، لكن النهارده اكتر من كل يوم ، يمكن لان بكره عيد الام !!!!ا
انا قررت كده ، ان جوايا عياط لان بكره عيد الام وقررت اني لسه عايزه اصحي الصبح اكلم امي واقول لها كل سنه وانت طيبه وطبعا امي ماتت ومش حاقول لها حاجه ،اذن العياط اللي جوايا له مبرر وسبب منطقي !!!
وعشت الحاله !!! .............وفاكره اخر عيد ام عملته ليها لامي ، وكنت باقول باستخفاف وكانه لايوجعني ، كنت باقول للموجودين كلهم ، ده غالبا اخر عيد ام لماما ، كانت عيانه قوي وفيروس السي افسد كبدها والسرطان ظهر بؤر في كبدها والدكتور قال مش مهم ، الكبد لن ينتظر السرطان ولا جسدها ، فقد فسد الكبد لدرجه استدعاء الموت اسرع من السرطان وخلاياه المميته !!!
ماعلينا ... احتفلنا باخر عيد ام مع ماما وماتت ، وادي عشر سنين مروا ولسه باصحي من النوم الصبح عايزه اكلمها وافاجئها بالهديه اللي اشتريها ليها ، الحقيقه كانت لطيفه ورقيقه ولما ااقدم لها الهديه تنبسط وتتفاجيء وتنبسط اكتر ، كأني جبت لها حته من الجنه !!!وانا اتعلمت منها ده ، لما بناتي يجيبوا لي اي هديه ،انبسط والحقيقه بانبسط بجد ، يبدو هدايا الاولاد للامهات بتبسط زياده عن اللزوم ، مش الهديه نفسها ،لكن نظريه ان بناتي حبايبي بيتفكروني !!!طبعا لو كانت امي قالت لي كده كنت اتخانقت معاها ، كنت قلت لها افتكرك يعني ايه هو انا امتي بانساكي ، لكن لما بقيت ام بقيت باعتبر ان كون بناتي يفتكروني فده في حد ذاته شيء جميل يسعدني ويستحق اشكرهم عليه ....
ماعلينا ..... صحيت من النوم كلي عياط !!!!
عايزه اعيط في حضن امي ..... عايزه اشكي لها همي ، تسمعني وتبطبط علي !!!!اصل بجد مافيش زي حضن الام الواحد يحتاجه لما يكون عايز يعيط ، بس ااقولكم سر،لما كانت عايشه عمري ماعيطت في حضنها ، كنت باخاف عليها تزعل وتتضايق فاعيط بعيد ، ولما ماتت بقيت ادور علي حضنها اعيط فيه ولما مالاقيهوش ، اعيط اكتر لانها مش موجوده وبعدين ارجع ازعق لنفسي واقول انت حتستبهلي ، ماانت عارفه انها لو عايشه عمرك ماكنتي حتعيطي في حضنها ، يبقي ايه الموضوع ، بطلي استهبال !!!
وابطل استهبال طبعا واقول انا عتريس انا بلوه سوده ، انا اروع من سنجام ومن سوراج ، انا قويه انا عمود خرسانه انا اجمد مني مافيش و" ابتسم " ابتسامه واسعه جدااااااااا واقول مالي مبسوطه كده !!!!
طيب بس برضه لسه جوايا عياط !!!
مش بسبب عيد الام ، لا ، بسبب ان الحياه منرفزاني !!!!
باشتغل كتير ، ودي ميزه جميله ، ولما اكون مش باشتغل باستريح ولما باستريح بازهق ولما بازهق باقول عايزه اشتغل كتير!!!
ازهق ليه ، والله ماانا عارفه ، ماانا شويه باكتب وشويه باصور وشويه في البرنامج وشويه في المحاماة والدنيا زحمه والناس بتقولي بتجيبي وقت منين ،يعني خلاصته مش مفروض ازهق !!!!
لكني زهقانه ، مش زهقانه ، لا احيانا بازهق !!!!
احيانا بازهق ، بيجي لي احساس اني عايزه البس وانزل الشارع !!!!
البس شيك واحط روج احمر وانزل الشارع ، لكن طبعا لا بالبس ولا باتشيك ولا بانزل الشارع
ليه ؟؟؟ لاني حانزل اروح فين ، وانا ساكنه بعيد والدنيا بعيد وبارجع لوحدي بليل وبخاف من الطريق الفاضي وباكون مرهقه علي الاخر لاني طول النهار باشتغل !!!!
اذن مش حاقدر انزل الشارع فاروح البيت ، اكتب واقري واضبط الصور والعب علي النت واسمع ام كلثوم ولما الليل الغميق يجي ، الاقي روحي وحدي !!!!
حتي حكايه اني وحدي دي ، مش مشكله خالص ، او يعني مشكله حبه صغيرين ، المشكله اني مبسوطه اني لوحدي ومش عايزه حد باختصار " يقرفني " يشاركني وقتي وبيتي !!!! طبعا حد منكم حيقول و " يقرفك ليه ؟؟ " ااقول لكم "يقرفني ليه؟؟" لاني خلاص نظمت حياتي علي اني لوحدي ومعدش عندي مكان ولا زمان لحد تاني !!!!
ولاني حره ومستمتعه بحريتي !!!!
ده مربط الفرس !!!
بقيت حرة ، واللي يتعود علي الحريه صعب قوي يرجع مش حر تاني !!!
حرة ، حرة قوي ، جدا خالص ، انام وقت مااحب واتكلم وقت مااحب واقفل باب اوضتي علي وقت مااحب !!!!
ومش عايزه حد يتدخل في ده او يغيره !!!!
خلاص ياجميل ياحر ، ادفع تمن الحريه وماتقوليش بقي زهقانه !!!!
بس انا زهقانه ، ليه ، ااقولكم ليه ، لان الناس كلها مكتئبه !!!!
لما يبقي عالمي الحميم ، هو عالم الاصدقاء ، والاصدقاء مكتئبين ، ومحدش بيشوف حد ، يبقي هو ده سبب الزهق اللي انا حاسه بيه !!!!
اصدقائي ، ناس نسيتني ونسيت روحها وبقيه اصدقاءها من وقت الثورة !!!ومعرفش ايه علاقه الثورة بانك تنسي العالم كله من حواليك !!!! بعض الناس نسيتني بالعمد ليه ؟؟ لان مواقفنا مختلفه من الثورة واللي حصل بعدها ، وفجأ اكتشفت ان الثورة بقت هي معيار الصداقه ، كل مانتفق نبقي اصحاب وكل مانختلف مانبقاش !!!ومحدش بقي يقول الخلاف في الراي والود والكلام ده لان علي ارض الواقع مش صحيح !!!!الثوره اثبتت بالدليل القطعي ان معظم العلاقات اللي الواحد كان فاكرها عميقه وحقيقيه هشه وسطحيه ، لان الموقف من الثورة " مزق اوصالها " و" الغاها " تماما !!!!
طيب يبقي فيه ناس من اصحابي نسيوني بالعمد ، لاختلاف مواقفنا من الثورة !!!
والباقيين .... الباقيين بيكافحوا زيي ، الثوره عورتهم في اكل عيشهم ، حتي وهما بيأيدوها ، دخلهم قل والتزماتهم زي ماهي او زادت ، فاللي بيشتغل او كان بيشتغل عشر ساعات بقوا عشرين واللي كان بياخد اجازه يومين بقي بيشتغل 8 ايام في الاسبوع ، مين بقي وسط المحرقه دي يفكر يشوف اصحابه ويخرج ويروح ويجي ، وهو الخروج مش عايز فلوس ، والفلوس عند الفلاح والفلاح عايز فرخه والفرخه عايزه قمحه والقمحه عند النجار والنجار عايز شاكوش ، والشاكوش مكسر راسنا كلنا وبالتالي لاعارفين نروح ولا نيجي !!!!
اكلم بعض اصحابي ،الاقيهم كلهم حماس نتقابل ونخرج ، فلفصه وحلاوه روح ، ولما نحاول نعمل ده بجد ، نحدد مواعيد او امكان ، نلاقي كلنا مكسلين ومفشفشين ومكسرين ومشاكل الشغل والحياه فارمانا !!!فكله يقعد محلك سر ولايتحرك من مكانه و.......... شهر يسلم شهر يسلم شهر ...... طيب زهقانين ياجدعان !!!!عادي كلنا زهقانين ، طيب عايزين نتقابل ، مانعرفش نتفق ، وبعضنا فاضي الخميس وبعضنا فاضي الجمعه وبعضنا عايز يخرج مكان شيك وبعضنا عايز حد يسلفه و............. وفي الحقيقه محدش عايز يعمل حاجه بجد ، طيب .............خلينا زهقانين !!!
مين قال اننا زهقانين ..... مين المجنون اللي قال كده ؟؟؟
احنا مبسوطين واخر سعاده واخر مقاوحه واخر تمام و............. اتنين ستيتس علي الفيس بوك ، مساء السعاده صباح التفاؤل وبس !!!!!
طيب خلاص ، لازهقانه ولا مخنوقه ولا متضايقه وست حره تماما ومش عايزه اتنازل عن حريتي ، يبقي ايه الموضوع ، مافيش موضوع ، بس جوايا عياط !!!
جوايا عياط ، ولما شفت جنازه البابا شنوده عيطت !!!ولما سمعت اغنيه فايزه احمد ست الحبايب عيطت !!!! ولما افتكرت مليون حاجه ضايقتني من يجيي 15 سنه برضه عيطت !!!
الاول حاولت اخبي عياطي !!!ماهو باعيط يعني ليه وعلشان ايه ومين فين ، وانا مش عايزه احكي واتكلم ، الحقيقه معنديش حاجه احكيها ، اصل مش معقول حاقول باعيط علي بابا عباس !!!مين بابا عباس ، ده اخو جدي ، ومات زمااااااااااااان وكانت عمتي صغيره جدا جدا ،وكانت نكديه وتحب العياط زي عينيها (واضح ان جين النكد ده جين اصيل جوانا ) المهم ، لما يسالوا عمتي بزهق وخنقه ، بتعيطي ليه ، تقول باعيط علي بابا عباس ، اول مره صدقوها والتانيه اتريقوا عليها والعاشره عرفوا انها نكديه وبس خلاص ، عيطي ياحبيبتي علي بابا عباس وماما عباس وكل الميتين !!!! فانا جوايا عياط ، ولو حد سالني بتعيطي ليه ، حاقول علي بابا عباس !!!!
وبعدين قلت الله ، هو انا مش حره ، حره جدا لدرجه اني من حقي اعيط ومن غير مااقول اسباب !!!!عادي جدا ، هو ده منتهي الحرية !!!!
طيب نرجع لبكره ، بكره عيدالام ، وامي وحشتني لكن مش بعيط علشان كده !!!!
والنهارده جنازه البابا شنوده ، وعيطت زعلانه عليه لكن برضه لاني كنت باتلكك !!!
وامبارح ولا اول تميت 53 سنه وعيطت برضه ، بس مش لاني تميت 53 سنه ، لا لاني برضه كنت باتلكك !!!!
طيب كنت بتتلككي ليه ؟؟؟؟؟؟؟؟؟؟ لا بقي ، مش حاقول تاني واقروا النوت من الاول !!!!
ماعلينا .... انا قررت اعيط وافرغ الدموع اللي جوايا وخلاص !!!
ولا حاشرح ولا حاقول ، مش لاني عايزه اخبي ، لا ، لاني بجد جوايا عياط !!!!
وده عادي جدا ، زي مابيكون جوايا ضحك وفرحه ، ساعات يبقي جوايا شجن وعياط !!!!
لما باضحك ماببررش ليه باضحك ، عادي باضحك وبس !!!!!
لكن لما باعيط لازم اقول ليه وعلشان ايه ، طيب هو ماينفعش اعيط وبس !!!!
غالبا ينفع !!!!
اذن جوايا عياط ، ولما حاعيط حاعيط وبس ، ومش زعلانه من حد ولا عندي ازمه عاطفيه ولا مفلسه قوي ولا حاسه اني كبرت ولا اي سبب منطقي الناس حتقرر تلزقه في وتقول ده سبب العياط !!!!حاعيط لان جوايا عياط وبس !!!!
بقولكم ايه ، حاجربها واقول لكم احساسي بعد مااعيط من غير سبب !!!
لو انبسطت حاقولكم واهي تبقي تجربه ونعممها !!!العياط من غير سبب !!!!
علي فكره ، الناس زمان قالت ، الضحك من غير سبب قله ادب ، لكن عمرها ماقالت علي العياط كده !!!!
اذن ، حاعيط من غير سبب وبعد مااخلص عياط حابقي احكي لكم علي احساسي ولو انبسطت خليكم ورايا وسلموني دموعكم وادوها وماتخلوش في نفسكم حاجه !!!!!
وبس ....................