كنباوى وكنباوية.. حلقة رقم (76).. ( الحاوى )

كنباوية تضحك من قلبها وهى تقول: يا ابن اللاعيبة بقى كل ده يطلع منك ؟ لا بس ده مش تفكيرك ولا أسلوبك ده تفكير أكبر منك، ده تفكير المرشد أو خيرت الشاطر أو محمود غزلان أو أي حد تاني غيرك يسمعها كنباوي فيذهب إليها مندهشا متسائلا :
كنباوي: إيه يا كنباوي انتي رجعتي من تاني تكلمي نفسك ؟
كنباوية: دي حاجه تخلي الأخرس ينطق والغبي يفهم
كنباوي: إيه بس اللي حصل ؟ وإيه سبب ده كله ؟
كنباوية: مرسي الحدق فاكرنا مش فاهمين ألاعيبه
كنباوي: عمل إيه تاني ؟
كنباوية: أنا أقولك
كنباوي: قولي يا ستي هو كان حد حايشك
كنباوية: ما أنا حقول أهه اصبر عليا وطرطأ لي ودانك كويس وفنجلي عنيك
كنباوي: ادي وداني وادي عنيا يلا اتكلمي
كنباوية: كلنا عارفين أن بشار الأسد بيضرب في الشعب السوري والجيش الحر من بدري وبيقتل فيهم زي الفراخ والفيران لما مرسي محموق أوي ما اتكلمش من زمان ليه وهدد وندد وقطع العلاقات من بدري من أول ما مات أول شهيد في سوريا على أيد أنصار بشار
كنباوي: ليه ؟ أنا مش عارف
كنباوية: أنا أعرفك لأن مرسي مايفرقش معاه مين مات من الشعب السوري ولا كام واحد اتقتل مرسي ما بيفرقش معاه إلا مرسي وبس والجماعة وبس
كنباوي: أمال إيه ده اللي حصل إمبارح والحشود والجعجعة والنفخة الكدابة والحمقة ودي والعروبة والإسلام والكلام الكبير أوي المجعلص ده ؟
كنباوية: كارتون يا كنباوي كارتون، بلح يعني على رأي الشباب، أونطة مرسي كان بيسّتف الأونطة في الشنطة اللي خايف يرحل بيها يوم 30
كنباوي: مش فاهم وضحي كلامك تقصدي إيه بالظبط ؟
كنباوية: بص يا كنباوي الحكاية كلها تتلخص في كلمتين إن مرسي مرعوب من يوم 30 وواثق ومتأكد أن الإخوان لوحدهم مايقدروش يقفوا قصاد تيار المعارضة وشباب الثورة وتمرد قال يستنجد بالسلفيين والسلفيين قرفانين منه طبعا لأنه ماطبقش الشريعة اللي هى حلمهم فكر الإخوان أنهم يحاولوا يستقطبوا السلفيين وهمه عددهم لا يستهان به علشان يقفوا معاهم قصاد جحافل الشعب الثاير عليهم واللي ناوي يطلع يوم 30 علشان يطالب بإسقاط مرسي والدعوة إلى انتخابات رئاسية مبكرة يقوم يعمل إيه يعمل عمل يرضي بيه السلفية يعادي نظام بشار الأسد ويطلب عودة السفير المصري من سوريا ويطرد سفير سوريا من مصر ويقرر قطع العلاقات مع سوريا ويعمل الحبة بتوعه دول علشان يفرح السلفية ويكسب رضاهم عنه وعن الجماعة وبالتالي مش حيسيبوه لوحده يوم 30 حيقفوا جنبه وحيحاولوا يحموه ويحموا شرعيته المزعومة والصندوق اللي جابه ويا ريته ما جابه ولا كنا شوفناه من أصله وكان يوم أسود مش طلعاله شمس يوم ما ظهر لنا مرسي ده
كنباوي: مش الصندوق هو اللي جاب مرسي دي غباوتنا هى اللي جابته
كنباوية: ماعلينا احنا دلوقتي مش في مين اللي جاب مرسي احنا في اللي مرسي بيحاول يعمله ويضحك بيه على السلفية
كنباوي: طيب والسلفية حيخيل عليهم ألاعيب شيحا دي.
كنباوية: لأ طبعا بس حيقفوا معاه
كنباوي: مش كان من باب أولى يقطع العلاقات مع إسرائيل مش مع سوريا هو بشار عمل اللي ماعملتهوش إسرائيل
كنباوية: ولما هو يقطع العلاقات مع إسرائيل أمريكا كانت حتسمي عليه دي كانت نفخته هو وجماعه الإخوان وهو عاوز يكسب ودهم علشان ما يتخلوش عنه في محنته السودة دي
كنباوي: قولتيلي وانا اللي كنت مش فاهم نورتيني يا كنباوية
كنباوية: الأهم بقى أنه هدد اللي ناويين يخرجوا يوم 30 أنه حيواجههم بكل حسم هو فاكر نفسه مين ومستقوي بمين ؟
كنباوي: مستقوي بالإخوان والسلفية والجهادية
كنباوية: واحنا حنستقوى عليه بربنا وبحقنا وبعذابنا طول فترة حكمه
كنباوي: ونعم بالله
كنباوية: والأنكى من كده أنه بتجميعه للإسلاميين والإخوان بيعرف الشعب المصري اللي رافض حكمه إنهم كتير ويقدر ينزلهم وقت ما يحب ويعوز يعني كارت إرهاب للي ناويين ينزلوا يوم 30
كنباوي: كل ده يطلع منه اللي نقول عليه مرسي يطلع فرعون
كنباوية: أديك قلتها بنفسك اللي قلنا عليه مرسي طلع فرعون !