كنباوية تتحدث مع ابنها كنبة الذي قلما تواجد في البيت وقت النهار فهو اعتاد أن ينزل مبكرا ويعود ليلا وهم نيام ووجوده في نهار اليوم على غير عادة مما لفت ذلك انتباه أمه كنباوية فراحت تستشف الأمر الذي بدا عليها غريبا وغير مألوفا كنباوية: إيش بيك يا موكوس ؟ قاعد شايل طاجن ستك ليه على راسك ؟ سبت الشغل ولا دخلت بالتوك توك في حيطة ولا عامود نور ولا سرقوه منك ؟ يا مدهول، إيه يا واد اللي مانزلكش الشغل النهارده ؟ وإيه اللي قعدك في البيت ؟ مش عوايدك، لو عاوز فلوس أنا أنضف من الصيني بعد غسيله وما حلتيش حاجة غير مصروف البيت ويا ريت بيكفي لحد آخر الشهر ده بيخلص قبل تلتين الشهر ما يهل علينا وبدبرها أنا بقدرة ربنا وبركته. كنبة: يامه أنا بخير لا سبت الشغل ولا التوك توك جرى له حاجة كل ما في الأمر إني مخنوق شوية وزهقان ومش طايق نفسي وحاسس أن الدنيا سودة في وشي ومتقفلة بالضبة والمفتاح. كنباوية: ليه يا ضنايا؟ ليه ده كله ؟ هي البت خطيبتك مزعلاك ؟ ولا أمها مضيقاك في حاجة ؟ كنبة: خطيبتي يا أمه زهقت من الانتظار وعوزاني اتجوزها النهارده قبل بكره وأنا كمان مابقتش صغير وتعبت من المشي معاها في الشوارع نلف على رجلينا نفسي أتلم أنا وهى في بيت واحد بس منين ما انتي عارفة البير وغطاه واللي جاي على قد اللي رايح هو الحال خافي عنك ما انتي راسيه على الدور كله. كنباوية: احمد ربنا أن انت عندك شقتك انت أحسن من غيرك كنبة: حمده بس كمان فيه غيري أحسن مني كنباوية: انت معاك كام ؟ كنبة: معايا ستر ربنا كنباوية: إيه يا منيل انت مش محوش حاجة خالص ؟ كنبة: منين يا أمه أنا اللي بيطلعلي من شغلانة التو توك يا دوبك أكل وسجاير ولبس كنباوية: ما انت يا واد بتتسمم في البيت أكل إيه بقي اللي انت بتصرف فلوسك عليه؟ كنبة: أنا باكل في البيت بالليل لكن طول النهار باكل في الشارع كنباوية: انت إيه مشكلتك بالظبط عاوز إيه ؟ كنبة: عاوز أوضة نوم وأنتريه وسفرة وتليفزيون وتوضيب الشقة لسه ناقصها كتير سيراميك وبياض وحاجات خايبة كده بس للأسف مفيش فلوس خالص كنباوية: خلاص اتنيل على عينك أنا حساعدك وأحلهالك بس افرد وشك ده اللي عامل زي الجزمة البنص اللي صاحبها لابسها من غير شراب كنبة: حتحليها منين وانت صفر اليدين كنباوية: أنا كنت داخلة جمعية علشان جهاز اختك شلتة حقبضها الشهر اللي جاي خدها انت كلفت بيها نفسك ويعدلها ربنا وأعمل واحدة تانية لجهاز اختك وبعدين مفيش فرق بينكم هي بنتي وانت ابني كنبة: والجمعية دي حتحل المشكلة ؟ كنباوية: يا واد دول 10 تلاف جنيه، جنيه ينطح جنيه اشتري العفش بالقسط وربك يعدلها في السداد كنبة: كتر خيرك يامه انتي كده تبقي نجدتيني الله يديكي الصحة وطولة العمر وما يحرمنا منك ولا من حنانك كنباوية: بطل غلبة يا واد ده أنا أمك وانت ابني الحيلة ما ينفعش أقف أتفرج عليك وانت غرقان كده وحيران كنبة: كده أنزل أشتغل بنفس كنباوية: استني يا واد لما تتغدى علشان ما تضيعش فلوسك بره على الأكل كنبة: أنا كده شبعت من كلامك ومش محتاج أكل سلام يا أمه كنباوية: سلام يا مسروع خد بالك من نفسك كنبة: حاضر يا أمه كنباوية: غلبان الجيل ده ومتبهدل الله يكون في عونهم ويخرب بيت الإخوان ومرسي همه اللي خلوا عيشتنا كده مهببة، الله يهبب عيشتهم جاتهم القرف كنباوي: بتشتمي مين يا كنباوية ؟ كنباوية: انت صحيت يا كنباوي ؟ كنباوي: من بدري وسمعت كل كلامك مع الواد كنبة كتر خيرك على اللي انتي بتعمليه معانا كلنا كنباوية: هو أنا لىّ غيركم ده انتوا أهلي وناسي وكل اللي لىّ في الدنيا ديا كنباوي: واحنا مالناش غيرك يا نوارتنا كنباوية: أحضر لك الأكل ؟ كنباوي: يا ريت يا كنباوية أصلي قايم من النوم جعان أوي كنباوية: ليه كنت بترضع وانت نايم ؟ كنباوي: لأ لا رضاعة ولا حاجة من دي خالص بس أنا النهارده ما فطرتش قبل ما أنزل الصبح وما أكلتش أي حاجة بره خالص كنباوية: من عنيا دقايق والأكل يكون جاهز انت تؤمر يا كنباوي كنباوي: كتر خيرك يا كنباوية وربنا ما يحرمنا منك ولا من حنيتك واهتمامك بينا يا ست الكل يا غالية
