فانتازيا فيلم ..... دعاء الغربان - الكروان سابقًا

بطولة: المهندس ( محمد مرسى)
آمنة ( حتة من مصر بتحاول تحافظ على نفسها)، هنادى (حتة من مصر راحت فى الوبا )، الوبا ( الإخوان ) زهرة ( حزب الكنبة) زنوبة ( وسائل الإعلام)
مشهد رقم 1 ............................ فى صحراء الفيوم ......................نهار خارجى
آمنة: خبر إيه ياهنادى مالك؟
هنادى: الدنيا مقفلة فى وشى، وياويلى من غضب الله، انا فرطت فى نفسى.
آمنة: ربنا رحمته واسعة، إيه اللى تاعبك؟ ماتخليش فى قلبك شىء، تكتمى سرك عن آمنة؟
هنادى: لساكى صغيرة وجاهلة، وويلى معاكى ويلين، بدى أقولك على كل حاجة؛ لكن خايفة لكون بعتدى على سنك ولو سكت أخاف لتقعى فى اللى وقعت فيه وتشربى المر برضه وانتى فاكراه حلو.
آمنة: اوعى تكونى .......
هنادي: وشى منك فى التراب يا آمنة.
آمنة: الإخوان؟ سر هنادى عرفته، خدعوها بالحب، وبالدين، وبالدقن، وبقال الله وقال الرسول، غووها، ضحكوا عليها، غشوها، خدعوها؛ لحد ماخدوا غرضهم منها، وبعدين رموها للكلاب، والبلطجية، والجماعات الجهادية تنهش لحمها، وعرضها، وأرضها، خدوا خيرها والباقى عايزين يبيعوه للى يدفع اكتر، كان كل همهم انهم يركبوها واهم ركبوها، ماكنتش مصدقة المسطور فى الكتب اللى بتقول إن الإخوان مالهمش أمان وقربهم ومعرفتهم شقا وندم وخوف دلوقتى بس صدقت إن الإخوان شر.
مشهد 2 ...............المنصة فى مدينة نصر ..................................نهار خارجى
آمنة: وين هنادى؟ وين هنادى؟ ابعدوا عنى، ابعدوا عنى كلاتكم، حزانا علينا؟ كنتوا فين ياحزب الكنبة يوم ما اعتقلونا واهانونا وقالوا علينا مأجورين وكارهين للدين، قولولى وين هنادى؟
حزب الكنبة: هذا أمر الله.
آمنة: أمر الله ولا أمر الإخوان؟ ربنا ما أمر بالشر.
حزب الكنبة: مرسى غدر.
آمنة: وانتوا سكتوا قتلتوها معه قتلتوها انتوا الاتنين.
حزب الكنبة: هنادى حتة منى ما انى قادرة انام على جنبى وهنادى متألمة ومظلومة ومجنى عليها.
آمنة: داعيه عليكم انتم ومرسى تتعذبوا اكتر ربنا ينتقم منكم انتم ومرسى واشوف فيكم يوم، وين هنادى يامرسى؟ دارى ايدك يامرسى دم هنادى بينقط منهم.
مرسى: وبعدين وياكى وبعدهالك، ماقلنا هنادى راحت فى الوبا.
مشهد 3 ................قصر الاتحاديه ....................................ليل داخلى .
مرسى: انا بسافر كتير علشان اهرب من الوحدة والملل ومشاكل الثوار والجبهة والإعلام والرأى العام وطلبات المرشد والجماعة اللى مابتخلصش الايام كلها زى بعضها والاخوان عقولهم وقفت وافكارهم اتجمدت زى ماتكون متسجلة على اسطوانات، المرشد صاببهم فى قوالب ومرشد يروح ومرشد ييجى ياخد دور البطولة فى الحكاية الوضيعة.
آمنة: أنا ماعدتش أأمن لك تانى انت غدار وكلام الليل بتغيره بالنهار ووعودك كلها مابتتحققش انت انانى مابتحبش إلا نفسك وجماعتك.
مرسى: أحلفلك بإيه ماتخافيش منى، انا مش شايف حد غيرك فى قلبى بكرة تتفرجى على روحك لما اخليكى أحسن واحده فى الدنيا واحقق لك كل اللى نفسك فيه واكسيكى من عند الفرنوانى والدهب يبقى فى ايدك من هنا لهنا واركبك المراجيح وافرجك على جنينة الحيوانات واللونابارك والناس يتفرجوا عليكى وانت معايه فى الحنطور ويقولوا مين السنيوره دى.
آمنة: ما انت ركبت هنادى المراجيح بوعودك الكدابه كانت النتيجه إيه؟ هنادى ماتت وانت حر طليق.
مرسى: انا حبيتك يا آمنة والحب مافيهوش مقامات ولا بيعرف اى ايدلوجيات الحب مابيفرقش بين اى اخوانى وسلفى وليبرالى أو حتى شيوعى اعمل ايه تانى علشان ترضى عنى افتح لك صدرى؟ اركع لك؟
ادينى بركع اهه يا آمنة انا فى عذاب ليل ونهار بفكر فيكى.
آمنة: ما انت فتحت صدرك قبل كده لهنادى فى ميدان التحرير كانت النتيجة إيه ضحكت عليها غويتها وكدبت وسلمتها للإخوان ومكنتهم منها واغتصبوها مناوبة وهتكوا عرضها عايزنى اشرب من نفس الكاس اللى شربت منه هنادى لا ياباشمهندس انا مش حآمن لك تانى انا مش حصدقك.
مشهد4 ....................فى الطائرة .................... ليل داخلى ضميرمرسى: مالك ياباشمهندس؟ إيه شاغل بالك؟ بتحب؟
مرسى: احب ايه! واحدة ليا فيها رغبه لو اقدر امرمط بيها الارض بعد ما اطولها ما اتأخرش.
ضمير مرسى: وزعلان منها علشان بتحاول تحمى نفسها انت نيتك سوء يامرسى.
مرسى: دى مش رغبتى لوحدى دى رغبة المرشد والشاطر وباقى أعضاء الجماعة.
ضمير مرسى: ولحد امته حتفضل تنفذ رغبات الجماعة؟ دول حيودوك فى داهيه.
مرسى: ما اقدرش اخرج عن طوعهم الولاء والقسم والجميل اللى فى رقبتى.
ضمير مرسى: جميل هنادى.
مرسى: هو فيه غير همه اللى خرجونى من سجنى وخلونى احط ايدى عليها واركبها.
ضمير مرسى: وعملت ايه بعد ما ركبتها.
مرسى: ركبتهم عليها معايا.
ضمير مرسى: ياخسارة يامرسى بقيت تفكرنى ب(محجوب عبد الدايم) فى فيلم القاهرة 30 ياخسارة يامرسى.
مشهد5.................... استوديو قناة cbc ..............................ليل داخلى.
آمنة: انا زهقت ياخاله زنوبه المهندس وشه مكشوف وبيعمل حاجات مش على هوايا وبيحاول يرضى نفسه والاخوان على حسابى ومش مهم عنده زعلى.
زنوبه: قوليها تانى ما قلنالك خدى شفيق قلتى إلا المهندس دلوقتى المهندس بقى كخه؟
آمنة: ماكنتش فاكراه كده نقره من نقرى وناويلى على نية.
زنوبه: ماشاء الله وده يخليكى تزعلى التقل صنعه وبدال ما انتى عجباه تقدرى تاخدى منه اللى انتى عيازاه طالما غاويكى خلاص ماتبقيش عبيطة الرجالة زى السمك بيلقطوا الطعم ومابيشفوش السنارة، فيه راجل بيجى بالكلمه الحلوه والمسايسه وراجل بيجى بالنظره النعسانه من العيون الكحيله
آمنة: مش المهندس ده ايده بقت طايله والبلد بقت فى جيبه.
زنوبه: المكان المقفول على اتنين الجمال فيه هو صاحب السياده والراجل مهما على مقامه طالما ماحدش شايفه حيترمى تحت رجليكى ويتمرمغ اسألينى انا الحب ياما بيذل.
آمنة: انا نفسى اذله.
زنوبه: ليه الأذى ده؟
آمنة: علشان اذانى.
زنوبه: مالك يا آمنة اوعى تكونى طولتيه نفسك؟
آمنة: ودى تيجى برضه ياخاله زنوبه، ولا خليته يلمس ضفرى هو بس مابقاش زى الاول من يوم مابقى يسافر كتير وبيروح للمرشد كتير وانا حاسه انه اتغير ناحيتى مابقاش له رغبه فيا زى الاول ومبقاش مهتم بيا وحاسه انه بيفلت منى وكل ما اقول انه عقل وحيعمل اللى يريحنى وفيه الصالح ليا يعمل عكسه ويرضى المرشد والجماعة.
زنوبه: الراجل من دول اذا ماطالش المراد بيزهق بيطفش.
آمنة: اروح للشيخ مراد يعمل له عمل؟
زنوبه: العمل عملك انتى اضربى ولاقي، شدى وارخى.
آمنة: انا خايفه المرشد والجماعه يخطفوه منى.
زنوبه: شوف يا خواتى البت! ماتكونيش غاويتيه؟ ولا حليتلك اللعبة؟ القطة المغمضة فتحت، عموما زودى له الطعم شوية؛ بس خلى بالك من نفسك لا النار اللى عاوزه تحرقيه بيها تحرقك.
مشهد 6 .........................قصر الاتحاديه .............................ليل داخلى
مرسى: افتحى يا آمنة اللى حصل لا انا ولا انتى لنا دخل فيه الاخوان همه السبب همه اللى ضحكوا عليا وغرروا بيا وفهمونى لما اطولك واحط ايدى عليكى وانول مرادى منك حتركعيلى وحقدر اتحكم فيكى واعمل فيكى اللى انا عايزه.
آمنة: اللى انت عايزه ولا اللى همه عايزينه؟
مرسى: اللى همه عايزينه عندك حق يا آمنة انا كنت فاكر شعورى نحوك عاطفه حتاخد وقتها وتروح لحالها انا كنت غلطان وما اقدرش اغالط روحى اكتر من كده انا بحبك يا آمنة وانتى كمان بتحبينى.
آمنة: انى بكرهك، بكرهك، بكرهك.
مرسى: انتى بتقولى كده فكرانى بخدعك زى زمان، زمان كنت عاوز انولك وامكنك للإخوان لكن دلوقتى لأ انا عرفتهم على حقيقتهم انتهازيين وصوليين مايهمهمش إلا مصلحتهم وبس حتى لو كانت المصلحة دى على حسابك انتى وحسابى انا كمان يا آمنة انا لما فتحت لك صدرى فى ميدان التحرير كان ضميرى سليم وقلبى كان خالى من الشر لأول مره فى حياتى لكن بعد كده بعنادك وتمنعك عليا همه قوونى عليكى وحرضونى لكن انتى فوقتينى وادتينى درس عمرى ما حنساه انتى يا آمنة حبى الأول والأخير تقبلى تكونيلى طول العمر والاربع سنين الاولانيين دول تجربة جربينى ولو ما عملتش اللى انتى عوزاه خلاص يا آمنة يبقى انا ما استاهلكيش، ساكته ليه فاكرانى بضحك عليكى؟ ردى عليا يا آمنة تقبلينى؟
آمنة: يستحيل.
مرسى: ليه يا آمنة؟ ليه تحكمى عليا بالعذاب؟
آمنة: انا اللى حكمت عليك برضه بالعذاب؟ ولا انت وجماعتك اللى حكمتوا علينا بالعذاب خنتونا واتملكتوا من البلد وعملتوا كل اللى يخليكوا تحطوا ايدكم عليها وفصلتوا دستور وقوانين على هواكم واستأثرتوا بالحكم ولغيتوا كل الاحزاب المعارضه واديتوا الحكومه لرئيس وزرا فاشل ضيع البلد وخونتوا الوزارات والمؤسسات وهنتوا القضاء وحاولتوا تجروا البلد لحرب أهلية وعايزين تفرضوا الصكوك علينا وتضحوا بسينا علشان الفلسطينيين وحماس حليفتكم وقتلتوا المتظاهرين وفرطتوا فى حق الشهدا.
انا نفسى اشوفك بتتعذب اشوفك مذلول تحت رجليا هنادى اختى راحت فى وباكم.
مرسى: هنادى اختك؟
آمنة: انت حتستعبط؟ انا وهنادى ايه؟ ما احنا واحد هى حته منى وانا حته منها هى فرطت وانا مافرطتش خنتوها انت والاخوان وعايشين احرار مافكرتوش فيها يوم ومن امته الصياد بيفكر فى فريسته الفريسة دايما هى اللى غلطانه علشان ماخدتش بالها وما حافظتش على نفسها ولقطت الطعم أو ماخدتش بالها من نية صيادها والصياد ماعليهوش لوم بس ربنا كان أحن عليها منك ومن الاخوان عمرك فكرت فيها لكن حتفكر فيها ليه بعد ما اخدت غرضك منها هنادى رخيصة عندكم وعرضها مالهوش تمن.
مرسى: هنادى اختك؟ ياريتك قتلتينى بدل ماتسبينى اعيش بقيه حياتى فى عذاب.
آمنة: ده اللى كنت رايداه.
مرسى: آمنة ماتبعينيش ياآمنة، طول الليل بفكر فى الكلام اللى انتى قولتيه الحقيقة اللى عرفتها أشر من الظلام اللى كنت عايش فيه، دلوقتى مش ممكن نفترق عن بعض شقائنا غير محتمل إلا إذا احتملناه سوا مش حنقدر نشوف الطريق إلا إذا مشينا وايدينا فى أيد بعض.
آمنة: هنادى والخراب اللى حل علينا بقدومك انت والاخوان حيكون دايما بينا
مرسى: آمنة ما تخليش اللى فات يحكم علينا بالشقاء انسى اللى فات وفكرى فى اللى جاى فكرى فى المستقبل
آمنة: المستقبل مات يوم ما ضاعت هنادى.
مرسى: يعنى مش قادرة تسامحينى؟ انتى حياتى، فراقك والموت واحد لو بعتينى يبقى برضه ماعدلتيش عن الانتقام.
آمنة: انا بنتقم من نفسى لأنى خنت هنادى يوم ما فكرت انك ممكن تتصلح وحاولت معاك بالحسنى وقلت يمكن ربنا يهدى الإخوان بس كنت غلطانة الإخوان حيفضلوا طول عمرهم كده خداعين منافقين ماكرين مايهمهمش إلا مصلحتهم وبس وانت عبد الجماعه زى ما يقولوا حتعمل السلاح اللى حاولت احاربك واغيرك بيه واجرحك ماجاش فى بالى انه حيغيرنى ويجرحنى انا كمان، ماتفتكرش انى خارجه من الحكايه دى سليمة انا مجروحة.
مرسى: كنت أفضل نظرة الحقد والكره والاتهام والتخوين اللى كان فى عينيكى ليا على طول ولا انى اشعر بالشفقه اللى فى عنيكى وانتى بعيد عنى، آمنة قبل مانودع بعض قولى انك سامحتينى.
آمنة: اوعى لنفسك يامرسى، مرسى اهرب يامرسى الثوار هنا وناويين على الشر وانت اللى ابتديت.
الثوار يقبضون على مرسى ومرسى ينظر إلى آمنة بحب وهو يقول:
مرسى: حياتى مش غاليه عليكى ياآمنة وهى المهر الوحيد اللى ممكن يصالحنا على بعض!!