المُزة ما تعملش كده (حلقة 13)

يوم حلو وجميل وريحة الفسيخ والرنجة ماليه الشوارع والبيوت والدنيا ربيع والجو بديع بس المواضيع مش كلها متقفلة ..
أختى كلمتنى فى التليفون وقالتلى إن جوزها ما بيحبش الفسيخ وإنها هاتموت وتعمل حفلة فسيخ ورنجة فى البيت وهو مانعها وده كل سنة والسنة دى لما حبت تعملهاله مفاجأة رمالها الفسيخ اللى تعبت فيه من البلكونة.
وقالت: شفتى يا اختى عمل فيا إيه بقى كيلو الفسيخ أغلى من كيلو اللحمة والراجل المهبوش يرميه من البلكونة قال إيه عشان الريحة .. واحنا يعنى مش زى بقية الناس؟ !
قلت: طب ما انتى برضه غلطانة .. حد يعمل مفاجأة فسيخ؟
قالت: وانا أعمل إيه كل سنة اعدة محرومة وكل جيرانى بيضحكوا عليا وبيقولوا إنى خايبة وما باعرفش اعمل الفسيخ عشان كده باتعزم عند أى حد فيهم وكان نفسى المرة دى أوريهم العين الحمرا بقى.
قلت: جوزك على ما تعوديه .. وانتى من الأول عودتيه انك تاكلى فسيخ بره البيت لو كنتى عايزة تاكليه جوه البيت ما تعمليهاش مفاجأة .. المزة ما تعملش كده.
قالت: أمال تعمل إيه بس دبرينى؟
قلت: أقولك انا تعمل إيه:
قبل شم النسيم باسبوعين تجيبى فسيخة وتقطعيها حتت صغيرة .. وكل يوم قبل ما ييجى تزرعى حتة فى ركن فى البيت يعنى مثلا حتة تحت الكنبة هيشمها وهو بيتفرج على التليفزيون ولو سأل قوليله الريحة من عند الجيران .. ومرة تانية تحت السرير ولو زهق .. خليه ينام ع الكنبة هيلاقى الريحة برضه .. وقوليله دى من عند البواب .. ريحتهم فايحة أوى .. واعملى نفسك مش واخدة بالك .. وساعتها هو مش هيبقى أدامه حل غير اتنين .. يا يوم شم النسيم يقضيه فى اى حتة بره البيت واللى هيكون كل ريحتها فسيخ برضه .. أو يقضيه فى البيت وعادى البيت يبقى ريحته فسيخ .. وحايعدى وغصب عنه يستحمل وبكده تقدرى انتى تعملى الفسيخ وتبقى مزة المزز أدام جيرانك ..