تامر حبيب عن الخطيب: «عمري ما وقفت مبهور وسعيد أمام لاعب غيره»

حرص الكاتب والسيناريست تامر حبيب، على تهنئة الكابتن محمود الخطيب، على فوزه برئاسة النادي الأهلي، وذلك من خلال صفحته الشخصية على موقع "إنستجرام".
وكتب "تامر"، "أنا عمري ما كان ليا في الكورة ولا بأفهم فيها بالمرة، بس اخترت من صغري لما يسألوني أنا أهلاوي ولا زملكاوي، إني أكون أهلاوي، وعشان أسباب مالهاش أي علاقة بالكورة، أولًا لأن صالح سليم بطل فيلم الشموع السوداء أهلاوي، ثانيًا لأني كنت باروح النادي الأهلي زمان مع أهلي وصحابي اللي كانوا بيلعبوا كورة هناك، ثالثًا لأني أحب اللون الأحمر، رابعًا لأن الأهلي طول عمره كان بيكسب أكتر من الزمالك".
وأضاف: "وعمري ما كنت أعرف من لعيبة الكورة إلا اللي مثلوا في السينما أو عملوا إعلانات أو اتجوزوا فنانات، وعمري في حياتي ما شفت لاعب كرة وحبيت أتصور معاه ولا أفضل مراقبه ومنصت ليه في أي حاجة بيقولها حتى لو بيتكلم في الكورة اللي أنا ثور لاهي في برسيمه فيها، ولا عمري كنت سعيد ومبهور بلاعب كرة إلا أمام هذا الرجل، طول عمري من صغري إلى الآن بافرح وأنا باشوفه في أي حاجة، بكيت في ماتش اعتزاله وهو بيقول: ألف شكر، عمري ما سمعت حد عرفه واتكلم عنه كلام غير حميد ووصفه بأنبل الصفات.. محمود الخطيب مش نجم كورة، محمود الخطيب نجم في كل حاجة... مبروك للنادي الأهلي رئيسه المناسب، المشرف، الخلوق".