نائبنا صاحب إنجاز حصرى.. عايز يعمل فيس بوك مصرى

الدايرة بتاعتنا فيها شوية نواب فل الفل.. بصراحة احنا مش عارفين نودي جمايلهم فين.. خدماتهم مغرقانا.. ومفيش حاجة ناقصانا.. لدرجة إنهم مش عارفين يعملولنا إيه تانى.. فبدءوا يهرتلون ويتفرغون للشو الإعلامي.. وأنا بصراحة شايف إنهم عندهم حق.. ماهو احنا برضو مش بنطلب منهم حاجة بعد أن حققوا لنا كل أمانينا فيهم.
طبعا حد منكم هيقول لنفسه إن البااارلمنجى بيتريق على نواب الدايرة وبيسخر منهم.. وأنا هرد عليه وأقوله: لا ياسيدى أبدا خالص مالص.. يعنى حضرتك مش شايف إن السادة نوابنا أصبح الشغل الشاغل لكل منهم هو كيف أقدم طلب إحاطة يثير الرأى العام ؟!.. وطبعا كلما كان طلب الإحاطة هايف ومالوش لأزمة.. جذب برامج التوك الشو التي يلهث معدوها خلف تصريحات النواب الرنانة ليل نهار.. كلها على حساب أم اللي جاب أبونا نحن أبناء الدائرة اللى انطصينا في نظرنا وانتخبناهم.
وأنا بقى جمعتكم النهاردة يا أهل دايرتي الكرام علشان أزف إليكم بشرى بآخر طلب إحاطة تقدم به نائب دائرتنا الهمام.. الطلب ده بالتأكيد سيحقق كل أمانى أهل الدايرة بل وأمانى الشعب في بر مصر من إسكندرية لأسوان.
وبهذا يصبح نائبنا ده بالذات صاحب إنجاز حصرى.. لأنه بطلبه هذا من البرلمان يحقق لنا العيش والحرية والعدالة الاجتماعية في لحظة فارقة من تاريخ الدايرة والأمة جمعاء.. أي والله جمعااااااااااااااااء.
نائبنا بقا بيطالب الحكومة بعمل «فيس بوك» مصرى يكون مخصصا للمصريين فقط.. يعنى يكون زيتنا في دقيقنا.. وأهو بالمرة نبقى كلنا تحت المراقبة الأمنية لأن الاشتراك هيكون بالرقم القومى.. نائبنا الحصرى علشان بيحبكم يا أهل دايرتنا الكرام حابب يسلمكم تسليم أهالي للأمن.. وده لأنه طبعا نائب وطنى.. نائب دولة مش نائب شعب زى النواب إياهم.
وأخيرا أحب أقولكم: هؤلاء هم نوابكم.. وهذه هي نتيجة اختياراتكم.. اشربوا بقى خدمات.. بس متنسوش اللايكات والكومنتات.
مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.