أطرف تعليقات النشطاء على «قول كلمة لأمك».. مصطفى: «والله مانا اللى سبت لمبة الحمام شغالة».. فرح:«أرجوكي متعمليش سبانخ تاني».. أمجد: «ليه مش بسمع كلمة حبيبي غير وأنا شايل الزبالة».. وشروق:«مبحبش العدس»

جذب إيفينت "قول كلمة لأمك" عبر موقع التواصل الاجتماعى "فيس بوك"، آلاف المشاركين الذين وجهوا كلمات الشكر والإعجاب لأمهاتهم، وتخلل تلك الدعوات الصادقة والكلمات الرقيقة بعض الطلبات الطريفة التي وجهها الأبناء لأمهاتهم.
- أبوس إيدك فتشي هدومى قبل الغسيل
قال أيمن: "أبوس إيدك قبل ما تغسلي لبسي، فتشي فيه عشان بنسى فلوس ومناديل في الجيب قولتلك مية مرة"، وأضافت نهى: "ربنا يخليكي ليا يا أغلى وأحلى حاجة في حياتي، وأعوذ بالله من حياة تخلو منك".
- المروحة والنوم
وقال محمد: "بطلى تطفي المروحة وأنا نايم يا بركة".
- هتجوز بس اهدى واصبري
وأضافت إيمان: "للى عملناه فيكي بط بط وإحنا كبار عيالنا ابتدوا يعملوه وز وز، وهما لسه صغيرين داين تدان بس من بدرى أوى".
وقالت مارتنيا: "متخفيش هتجوز بس إنتى اهدى واصبري كدا على رزقك، وبكرا هنتجوز أنا وإخواتي وبابا وناهد وكلنا".
وأضاف فادي: "هتفضلي لحد إمتى تقوليلي ذاكر ياموكوس".
- مفتاح الشقة مش عليه عنوان بيتنا
وقالت شهد: "مفتاح الشقة لو ضاع متخافيش عشان مش مكتوب عليه عنوان بيتنا فين".
وأضافت أمنية: "يعني هي المروحة بتاعت أوضتي بتتعب ولازم تستريح، والتلاجة والتليفزيون مش بيتعبوا؟".
- مابحبش العدس
وقالت شروق: "والله مابحبش العدس وبقالى 24 سنة عايشة معاكو وكل مرة تقولى لا بتاكليه، وآه مش بحضر هدومي من بليل وبقالى 24 سنة عايشة معاكو وبدور كل يوم الصبح على حاجة ألبسها ومش بحضرها من بالليل، أنا كده ومش هتغير خالصين".
وأضاف أمجد: "ليه مش بسمع كلمة حبيبي غير وأنا شايل الزبالة ونازل بيها".
وقالت فرح:"ماما أرجوكي متعمليش سبانخ تاني باي".
- طقم روميو وجولييت
وأضافت سارة: "مامتى حبيبتي بطلى تعملى نفسك مش سامعة لما أطلب منك فلوس زيادة ".
وقالت نرمين: "طقم رميو وجوليت ورحمة أبويا الموضة بتعته ماتت وادفنت، وذرعو فوقها صبارة".
- كرسي الصالون معلهوش قسط
وأضاف عمر: "مش كل وقفة عيد هشيل وأفك ستاير أنا"، وقالت سارة أحمد: "نفسي أقولك أن الكرسي بتاع الصالون مش عليه قسط يعني عادي لو قعدت عليه".
وقال مصطفى: "والله ما أنا للى سبت لمبة الحمام شغالة.. حاضر هقفل المروحة لما آجي أخرج من الأوضة.. عارف أن الموبايل لو بيتكلم كان هيقولى ارحمني.. وعارف إننا لو جايبن خدامة بالفلوس هنرحمها اكتر منك.. وعارف أن حد دعا عليك دعوة عشان كدا جبتينا أنا وإخواتي.. وحاضر هحلق شعري عشان لما آجي أمشي جمبك في الشارع الناس متقولش دا ابنها دا.. طيب هو شعره عالى ليه كد.. وعارف أن أنا وإخواتي مفيناش أي موهبة ولا حد رسام ولا حد صوته حلو.. وحاضر هنشف الحمام بعد ما استحمى".