المروحة

الجو حر قوي =‏ فعلا عندك حق يا عمي تصدق بقالي كام يوم مش عارف أنام =‏ ليه خير أبدا‏..‏ افتكرت حماتك الله يرحمها =‏ الله يرحمها كانت ست طيبة أنا معطلك ولا حاجة =‏ لا اتفضل
بقولك بقي‏..‏ امبارح مجاليش نوم خالص‏..‏ الحر والقلق تخيل مع إني عندي تلات مرواح في الاوضة
‏=‏ ياااه تلات مراوح
أيوه تلت مراوح
‏=‏طب ما تجيب تكييف
لا التكييف مضر جدا وبيكسر العضم حتي التكييف اللي في الرسيبشن عمري ما شغلته‏..‏ المروحة اضمن
‏=‏ فعلا المروحة اضمن
بس المشكلة عندي ان المروحة اللي في السقف بتعمل صوت مزعج قوي خصوصا بعد ما تكسر البرواز الجبس اللي حواليها بحس انها ممكن تقع عليا
‏=‏ بعد الشر عليك يا عمي
الله يخليك‏..‏ المروحة التانية ياباني بحطها في آخر الاوضة وبشغلها علي رقم اتنين لأني لما بشغلها علي تلاتة بتعمل صوت زي مروحة السقف
‏=‏ ايوه فعلا المروحة لما بتشتغل علي تلاتة بتكون مزعجة وبتعمل زي وابور الطحين
كل مشكلتي في المروحة اللي بحطها جنب التليفزيون‏..‏ دي مروحة صغيرة صيني‏..‏ تخيل بقالها عندي عشرين سنة
‏=‏ يااااه عشرين سنة
أيوه بس مالهاش تايمر لأنهم ماكنوش اخترعوا التايمر ساعتها
‏=‏ يا سلام دي قديمه علي كده
بقولك بقالها عندي عشرين سنة والمشكلة في التايمر
‏=‏ بصراحة مش فاهم فين المشكلة يا عمي
هي صحيح مني فين
‏=‏ نايمة مع البنت‏..‏ اصلها كل شويه بتعيط فبتقعد معاها لحد ما تروح في النوم
ربنا يخليهالك بنتك زي القمر
‏=‏ شكرا يا عمي والله أنا نفسي تيجي تقعد معانا
أنا مقدرش اسيب بيتي وبعدين أخاف أزعجكم
‏=‏ ولا إزعاج ولا حاجة ده بيتك
طب منا قولتلك تعالوا انتوا عيشوا معايا
‏=‏ المشكلة إن بيت حضرتك في مدينة نصر وأنا شغلي في الهرم يعني هعيش في عذاب‏..‏ أنا أخذت شقة الهرم دي بأعجوبة
أصلا يبقي كده احسن
‏=‏ زي ماحضرتك تشوف
إحنا وقفنا لحد فين
‏=‏ لحد المروحة الصيني اللي بتحطها في المكتب جنب التليفزيون‏.‏
أيوه تمام‏..‏ في عز الليل بتروح واقفة‏..‏ اصحي من النوم عشان اشغلها وما اعرفش انام تاني اصلي الفجر واحاول اقرأ شوية أو اشوف أي برامج في الدش بس بتكون كلها برامج بايخه اللي بتيجي بعد الفجر
‏=‏ طب ما تجيب مروحة جديدة ياعمي وتخلص نفسك
المروحة دي ليها معزة خاصة عندي وبعدين ما هي شغالة ولا عشان قدمت ارميها
‏=‏ طب أنا عندي حل مية مية‏..‏ إيه رأيك تتجوز‏..‏ إيه أخبار البنت بتاعة الدراسات العليا اللي بتذاكر لها
يا بني دي قد مني بنتي وبعدين أنا أستاذ جامعي علي المعاش أتجوز واحدة كانت طالبة عندي
‏=‏ لا ياعمي ما تستغلهاش بس فيه بنات في سنها بيحبوا يتجوزوا الرجالة اللي في سن حضرتك زي كده لويتا بتاعة نابكوف
نابكوف مين
‏=‏ ده كاتب روسي عمل قصة جميلة جدا عن راجل كبير في السن بيحب البنات الصغيرين
أيوه يا بني بس أنا مش بحب البنت دي ولا حاجة وبعدين في واد صاحبها بييجي عشان يوصلها ساعات
‏=‏ طب خلي بالك أحسن يعملوا حاجة يا عمي‏..‏ الدنيا بقت وحشة‏.‏
لا يا بني دي بنت مؤدبة
‏=‏ يا سلام
والله
‏=‏ طب ما تتجوز واحدة من سنك يا عمي
يا بني جواز إيه وطلاق إيه‏..‏ أنا عندي سبعين سنة ومش ممكن أتجوز بعد المرحومة
‏=‏ الله يرحمها‏..‏ طب إيه رأيك تحط المروحة الياباني في المكتب والمروحة الصيني في آخر الأوضة
ما انا فكرت في كده بس المروحة الياباني كبيرة وبتسد باب البلكونة
‏=‏ معقولة
والله بيطلع عيني لو رايح اجيب الغسيل أو اشرب سيجارة لازم اشيلها واروح البلكونة وبعدين اقفل الباب وارجع اشغلها
‏=‏ مش عارف يا عمي اقولك ايه‏..‏ أنا ممكن اجيبلك حد يصلحلك مروحة السقف أو اجيبلك واحدة بدالها
لا واحدة جديدة لا نصلح القديمة
‏=‏ خلاص ماشي
وتفتكر يعني هيقدر يمنع الصوت بتاعها
‏=‏ أيوه يا عمي ان شاء الله
اوعي اكون أزعجتك
‏=‏ لا ياعمي
طيب تصبح علي خير
‏=‏ وانت من أهله
ابقي بوسلي مني والبنوته
‏=‏ حاضر يا عمي
طيب سلام
‏=‏ تصبح علي خير
‏*‏ شريف عبد المجيد‏:‏ له مجموعات قصصية منها مقطع جديد لأسطورة قديمة وخدمات مابعد البيع‏.‏