بالصور.. أطرف المواقف في الخطوبة والزواج.. أم جومانة: «جالى عريس وأنا مخطوبة».. شوشو: «أخت العريس قالتلى إزاى تكتبى كتابك وتفكرى تتجوزى تانى».. وسمر: «كان عاوز ياخدنى ويطير»

شارك عدد من مستخدمي موقع التواصل الاجتماعى "فيس بوك" في "إيفينت" أطلقته صفحة "الكومنت الفصيل" تحت عنوان "مواقف الخطوبة والزواج"، سردوا خلاله أطرف المواقف التي حدثت لهم عن الخطوبة أو الزواج.
ومن بين تلك المواقف:
1- أخت العريس
قالت شوشو: "كنت مخطوبة قبل كده ومكتوب كتابي واتفسخت وفي مرة جالي عريس كان كويس في نظرى كلمنى عن طريق معارف بينا سألنى شوية أسئلة وأنا سألته، والمفروض يجي يقابل بابا قولتله على فكرة أنا كنت مخطوبة قبل كده ومكتوب كتابي قالي عادي إيه المشكلة، وبعدها فوجئت أن أخته بتكلمني تقولى إزاي يكتب كتابك وإزاي تفكرى تتجوزى تاني وكلام فعلا متخلفين، ياماما أنا متجوزتش أولا، أصلا كل الموضوع خطوبة وبعدين كتبنا الكتاب عشان هنتجوز ومحصلش نصيب، أشنق نفسي يعني حسستنى أن لازم أجيب مية نار أرميها على وشي، طبعا هي إنسانة جاهلة وتافهة ومعاها 3 بنات، وأحب أقولها من موقعي هذا كما تدين تدان ده، بالنسبة ليا أكتر موقف أثر فيا لأن أو مرة أشوف حد بالجهل دا".
2- الجزمة النحس
وأضافت نور:"يوم لما روحت أشترى دهب الخطوبة، جزمتى اتقطعت روحت اشتريت جزمة تانية اتقطعت روحت خيطتها أول مارجعت البيت اتقطعت يوم نحس".
3- ذكاء العروسة أمام والد عريسها
وتذكرت: "في يوم وأنا راجعة من الكلية وطول النهار مرمطة بقا، لقيت بابا واقف مع بابا خطيبي وعمه فأنا قولت سلامو عليكم، ووقفت أنا وبابا فبقوله هتروح نروح سوا ولا إيه قالى خلاص ماشي اسبقيني على العربية، فروحت عمالة أشد في باب العربية مش راضي يتفتح والكل فطسان على نفسه من الضحك، ولقيت باباه وعمه بيقولولي مش دى يابنتي عربيتكم أهى، رجعت لورا كده وببص على العربية وببص قدام بابا واقف جمب عربيتنا وعمال يضحك كان نفسي الأرض تنشق وتبلعنى.. وبعدها تقريبا أعجبوا بذكائي ونباهتى وشكلهم قالوا لخطيبي البنت دى دماغها طبيعي مش هتحتاج تعملها دماغ واتقدم بقا واتخطبنا".
4- فقدت الثقة في اختيارات الحاج
وروت أسماء: "أبويا جابلي عريس وقالي يا أسماء في عريس.. بصتله كده.. راحوا جايين هو وأمه وأبوه لولا ستر ربنا، أمه منتقبة طول ماهي قعدة عمالة تبصلى كده من تحت النقاب وأنا عاملة نفسي مش واخدة بالي.. بس كنت قعدة مرعوبة كنت حاسة هتقولى قومى اكسرى البندقة دى.. وهي ماشية بتسلم عليا وبتحضنى كانت هتكسر عضمى ومحصلش نصيب.. ومن ساعتها فقدت ثقة في اختيارات الحاج.. جوازات صالونات لوجيك".
5- أغرب عريس شوفته
وقالت سمر: "اتقدملى مرة عريس كانت مواصفاته كويسة ومناسبة بس لما شوفته وجالنا البيت واتكلم اتصدمت، وكان باين عليا جدا إني مش عاوزة أكمل القاعدة، ومع ذلك طول ما هو قاعد بيتكلم أنه عاوز يتجوز في أسرع وقت ومفيش داعي نستني.. وتتجوز في الدراسة وبتاع كان هيحصلى حاجة من عدم فهمه للموقف، كان هاين عليا أعيط أقسم بالله وأقوله قوم امشي، أغرب عريس شوفته، فعلا راجل طيب جدا حقيقة".
6- جالى عريس وأنا مخطوبة
وتذكرت أم جومانة: "أنا منتقبة ومرة كنت بصور جواز السفر بتاعي أول صفحة اللى فيها الصورة وكنت مخطوبة ودخلت عند أخ ملتحى عشان يصورهالى الأخ قفل المحل ومشي ورايا وبدون كلام وراح تانى يوم جيه لبابا وكان حافظ اسم بابا، وسأل عليه وأنا كنت عند صحبتي، أخويا اتصل بيا وجيه قالى في عريس في البيت تعالى وأنا ميتة من الضحك وصحبتى شرحه.. وهو لما عرف إنى مخطوبة حسيت أنه أخد صدمة الأخ دلوقتي أنا صديقة زوجته لأننا مش مشيناه إلا لما جوزناه بس كل لما أشوفه بحس بإحراج".