أغرب_العرسان_في_التاريخ‬

الهاشتاج ده كان على على تويتر .. بس فيه حاجات عجيبة !!
ودول شوية حاجات منتقاة من على وش القفص.
* واحدة صاحبتي اتخطبت لواحد نزلوا يشتروا جزم قعد يقول لها خدي دي ودي وبعدين سابها تدفع وطلع المحل بتاع صاحبه وبينفعه.
* عريس ومراته داخلين الشقة بعد الفرح، لاقوا فار معدي من قدامهم العروسة صوتت قالها متخافيش هو دخل يمين واحنا هانخش شمال.
* واحد كان متقدم لخالتي وكان الجو شتا ببص عليه لاقيته لابس بنطلون بيجامة مخططة تحت بنطلونه.. طبعا قولت لها وباظت الجوازة.
* واحد كان هيتقدم لصحبتي ف 2004 وقبل ما يروح يتقدم قال لها مش هينفع نكمل سوا ده كل حاجة غليت وإزازة الزيت بقت ب 7 جنيه.
* بيحكيلى عن حبه لصاحبته قلت نفسي حد يحبنى بالطريقة دى زيهم، فركشوا واتجوزنا وخلفنا.
* أبويا وهو كل يوم يستنى أمي ويمشي وراها بالعربية لحد ما وصل لبيتها واتقدم كتيير واترفض أكتر بس وبعد 10 سنين اتجوزوا.
* واحدة أتقدملها واحد طلق مراته.. أبوها عرف منه أسباب الطلاق وراح لمراته وصالحهم على بعض.
* أول مرة أبويا شاف أمي بالصدفة بتقدم على شغل بمكتب صاحبه قال لها امشي ده نصاب سلم عليها وقال لها سعيد بمعرفتك هنتجوز امتى؟.
* حضرت فرح لواحد بيتجوز تانى مرة، أهل الأولانية خطفوه وخدوه يطلقها
وأخوه كمل الفرح بداله "ببدلة برتقانى".
* أبو العروسة شاف العريس لأول مرة حضنه وقال دا ابني وقال لبنته لو ما اتجوزتيش الراجل ده مش ح أعرفك!
العريس أبويا.
* اشتغل فى مدرسة إنترناشيونال.. راح اتقدم لأبوها وقال له أنا اشتغلت ممكن توافق.. قال له؟.. لما تحوش شوية.
* بيعرف نفسه: اوعي تفتكري إن شخصيتي مهزوزة.
* عروسة بتهزر مع عريسها يوم الفرح طلبت من الدي جي يشغل "بحبك يا حمار" وقعدت تغني معاها وتشاور عليه.. طلقها والفرح باظ.
* سألني: حد مسك إيدك قبل كده؟ آه والله.
* قلت له عاوزة اشتري سمك من محل السمك الزينة قال هجيبهوملك أنا وجابلي سمك بلطي وقال لي ده أفيد.
* واحد صاحبي فركش عشان خطيبته ساكنة بعيد وبيتعب في السواقة لما يزورها"
* أخت صاحبتي الصغيرة جالها عريس باباها حب يرفضه بذوق قال له مش هأجوّز الصغيرة الأول.. راح جاب صاحبه يخطب الكبيرة.
* أهله كانوا متضررين، أهلها قالوا احنا بنشتري راجل.. أمه ردت: واحنا ما بنبعش ضنانا
وباظت الجوازة.
* بنت خالتي جالها عريس بيسألها بتحبي رياضة إيه؛ قالتله التنس.. ضيق عينيه وقالها "ممم تنس.. أبو مضارب ده؟".
* مامته قالتلي معندناش بنات بتدخل على النت أوعي تكوني بتقعدي على النت قولتلها لأ هو النت اللي بيقعد عندنا.
* ابن خالتي أم العروسة قالتله انت والله مافيك حاجة تتعيب بس انت أول واحد يتقدملها لازم نرفضك عشان الناس ماتكلش وشنا.
* عريس بنت عمي لما فركشت الخطوبة حاسبهم على اللي صرفه عليها في الخروجات والكافيهات والمطاعم.
* واحدة صاحبتي اتخطبت لواحد كان بيبعتلها رسائل باللغة العربية الفصحى "لماذا تعامليني هكذا" والجوازة باظت للسبب ده.
* عريس جه من طرف جارتنا وأول القاعدة قال لى ممكن أشوف شهادة الثانوية وكارنيه الكلية بتاعتك ايش ضمنى إنك في صيدلة.
* واحد دخل البيت رسمي وهو عارف إني مهندسة وقعد يتكلم وفي وسط الكلام لقيته بيقول :المهندسين دول حمير O_o.
* اتقدملي عريس صالوناتي وفي أول قعدة لينا قال لي إنه هيعرفني على "الجيرل فريند" بتاعته البولندية عشان تعرفني هو قد إيه حنين.
* عريس مدير شركة ومحترم جداً جه يخطب أختي.. وبعدها قال لهم ممكن أبدل وأطلب أختها.. كان داخل ينقي قوطة.
* مرة رفضت واحد عزيز عليا جدا ولقيته بيكلمني يقول لي أنا آسف أنا عملت كارثة! أنا عملتلك عمل ورحت ألغيه طلع مينفعش.
* العريس بيسأل ليكي صحاب ولاد؟ قالتله آه قال لها طب لو اتحطيتي فى موقف تختاري بيني وبين حد من صحابك قالتله هختار صحابي.
* صاحبي من أوائل دفعته ومعاه ماجستير من ألمانيا وبيعمل دكتوراه في إنجلترا وأبو العروسة رفضه علشان ملوش مستقبل.
* الست أمه سألتني مرتبي كام والشركة عملالي عقد ولا لأ؟.
* واحد عجبته واحدة اتقدملها طلعت مخطوبة.. قالتله على فكرهة أنا عندي أخت توأم.. راح خطب أختها!!!
* قال لخطيبته "صور الخطوبة طلعت، هاتي فلوسها لما نتقابل، هزرت في المقابلة بتديله الفلوس-أخدها!! أسرع فسخ في التاريخ.
* واحدة صديقتي واحد كان متقدملها.. بيقول لها بتعرفي تجيبي العنكبوت بالزعافة؟.
* واحد اتقدم لواحدة صاحبتى قال لها: "أنا وكيل نيابة يعنى البيبان المقفولة كلها هتتفتحلك".
* واحد خطب واحدة صحبتى بس مبيكلمهاش خالص ولا يسأل عليها و لما سألته عن السبب قالها "والله مبيجيش ف بالى".
* عريس جاى يخطب صاحبتى المنتقبة..ماتفقش مع ابوها على حاجة ولا شاف العروسة وفى الاخر سأل ابوها:من الاخر بنتك حلوة؟
* قال لها: امي عايزة تشوف رجليكي !
قالت له: ليه ؟!
قال لها: لو رجليكي تخينة تبقى طيبة..لو رفيعه تبقي خبيثة.