أغرب أسباب فركشة الجوازات 1

في الجمهورية بتاعتي سألنا الناس عن إيه اغرب سبب لفركشة الخطوبة وكانت المفاجأة واللي يشوف فركشة الناس تهون عليه فركشته:
- مره خطيبها قالها هتشطف وانام قالتله انت ازاي تقولي كلمة هتشطف دي وسابوا بعض.
- علشان عندها تلات أصحاب ولاد من أيام ثانوى ومش عايزة تمنع علاقتها بيهم ولا تقللها وشايفه أن كدا نداله، وساومت بينه وبين اصحابها وفركشت وقالت له احنا مش متفاهمين.
- خناقه على مين يستلم الصور بتاعة الخطوبة والخطوبة اتفركشت بعدها بأسبوع.
- واحده شافت واحد جاهز اكتر من خطيبها وفسخت الخطوبه.
- اعرف واحد طرد العريس واهله في الخطوبة علشان اتخانقوا مع بعض وكان في اوتيل مشهور ولما البنت عيطت قالها متزعليش الحفلة مكملة وكمل الحفلة من غير العريس باهل العروسة بس.
- انا كنت هسيب خطيبي بسبب أنه مصمم أن الممثل اللى في فيلم الساحر اللى كان اسمه سيد عصب ده يبقى شكرى سرحان لما كبر.
اتنين فسخوا خطوبتهم قبل الفرح بأسبوع عشان أكتشفوا انهم مش عاجبين بعض.
- عشان لما كان بيروح يزور خطيبته ريحة الشراب بتبقى وحشه.
- في واحده فسخت عشان ملمسهاش ومعملش تجاوزات.
- انا فسخت خطوبتى علشان أحمد مراد الكاتب حضرت حفلة التوقيع بتاعته وحطيت صورتى معاااه على الفيس.
- عشان اهل العروسه كانو كاتبين ف القايمه دباديب وارنوب.
- مامته مصممة أن العروسة تلبس برنيطة كبيرة يوم الفرح والعروسة موافقتش.
- علشان في مرة خرجوا راحوا الاهرمات في عز الحر وبتقولو عطشانه قالها استنى نستلف من أي حد حبه مايه مع أن كان في ناس بتبيع مايه وبعد كدا راح جاب واحدة كانز ويشرب شفطه ويديها التانيه وهى رفضت تاخد وراحت جابت واحدة لنفسها وفركشت.
- اعرف اتنين سابوا بعض عشان العروسة طلعت مرتبطة !!.
- علشان يوم الخطوبة واحد من اهل العريس اتمسحت ايده في الحيطة وام العروسة نضيفة اوي فطردتهم.
- واحدة اعرفها سابت خطيبها عشان نسي يفتح زرار البدلة لما قعد.
- عشان بلتكانه الستاره العيلتين اختلفوا ع انها تطلع فوق شويه ولا تحت شوية.
- واحده اعرفها اتقدملها واحد اسمه سيد وبعد ما كل اهلها اقنعوها أن المهم شخصيته مش اسمه وافقت عليه وبعد الخطوبه بيوم اكتشفت أن اسمه الحقيقى بدوى فسخت الخطوبه مع أن سيد من بدوى مفرقتش كتير.
- العريس بيحب ايه مصطفى والعروسه بتحب شادى سرور والنقاش تطور لشتيمه.
- عشان العروسه حلوه فطول ماهو ماشي معاها الناس بتبصلها، والمصيبه أنه قالها انا هسيبك عشان انتي حلوه.
- عشان ام العريس لما دخلت عند ام العروسة الحمام ملقتش باسكت ترمى فيه الكلينكس !!.
- كانوا في ساقية الصاوى... وقالها هعمل مكالمة وهاتيلى حمص الشام من غير شطة.. عملت فيه مقلب وحتطله شطه.. ومع أول شفطة.. شاط.. وزعقلها وقالها انا عندى البواسير... قالتله انا حبيت اتأكد من اللى قالى المعلومة... ربنا معاك... وسابوا بعض.
- خناقه ع أن هدوم العريس اترصت ف اوضه الأطفال وخواته عايزنها تترص ف اوضه النووم واتفشكلت الجوازة يوم الحنه بليل
- عشان العريس دخل ب3 كيلوا عنب بس ومجبش الرمان اللي كانت ام العروسه نفسها فيه ولمحتله كام مره.
- علشان كان فيه مواقف المفروض هي تعيط فيها ومعيطتش.مع انها كانت بتعيط ف الفون بس هو مأخدش باله وهى مرضيتش تقوله اصلا
- اتفشكلت الجوازه عشان مفتاح انبوبه ازاي متجبش معاها يعني.
- انا ليا مغامرات مع العرسان غير العريس إلى نضف منخيرة بايدة أبو فيلا... عريس جالى والتليفزيون ولع وهو عندنا والستارة اتحرقت غير أنه كان بيقولى كل شوية اية آخر 3 امنيات تتمنيها قبل متموتى دخلنى اخرة قبل مدخل دنيا ودا كان اغنى من الاولانى.
- واحده فسخت عشان شراب ام العريس كان مقطووع.
- انا فسخت مره عشان كان بياكل بصوت والتاني معفن وعايز يا كل حاجات مسمط وكمان انا اللي اعملها ومستخدمش اطباق صيني عايز اطباق الألومنيوم النتن والحمدلله دلوقتى مخطوبة لحد نضيف في اكلة.