من "باسكت الحمام" ل"دباديب القايمة".. أغرب أسباب فسخ الخطوبة فى مصر

بأعصاب مشدودة تنعقد جلسة "القايمة" الشهيرة قبل "كتب الكتاب"، ويتوقع الجميع أن تنتهى "الجوازة" فى ثوان، بعد أن تكرر هذا المشهد وانتهت زيجات كثيرة فى هذه الليلة، ولكن يبدو أن الوضع تغير كثيرًا فى مصر، فهناك أسباب أسخف وأغرب تقضى على الخطوبة أو "الجوازة" حتى لو بعد شهور وسنوات طويلة من الحب.
ومن إجابات الشباب على سؤال "إيه أغرب سبب للفركشة شوفته فى حياتك" الذى طرحته إحدى الصفحات على "فيس بوك" رصدنا أغرب 10 أسباب لفسخ الخطوبة فى مصر..
1. "علشان أم العريس دخلت الحمام فى بيت أهل العروسة ما لقيتش باسكت ترمى فيه المناديل".
2. "علشان فى مرة خرجوا راحوا الأهرامات فى عز الحر وبتقوله عطشانة قالها استنى نستلف من أى حد حبة ميه رغم إن كان فى ناس بتبيع ميه فى المكان".
3. "فركشوا عشان العروسة مصرة تحط الدباديب والأرانب فى القايمة".
4. "فسخوا الخطوبة علشان هو بيحب صدور الفراخ وهى كمان بتحبها وعاوزاه ياكل الوراك".
5. "خطوبتى اتفسخت علشان حطيت لها كاتشب ومايونيز فى الساندويتش من غير قصد، وهى مش بتحبهم، وبكده هى اكتشفت إنى مش بحبها".
6. "واحد ساب خطيبته علشان قررت تسيب الشغل قبل الفرح بشهر ومش هتشتغل تانى وقالها إنه كان عامل حسابه إن مرتبها هيكون قسط العربية اللى هيشتريها بعد الجواز".
7. "واحدة أعرفها اتقدملها واحد اسمه سيد وبعد ما كل أهلها أقنعوها إن المهم شخصيته مش اسمه، وافقت عليه وبعد الخطوبة بيوم اكتشفت إن اسمه الحقيقى بدوى ففسخت الخطوبة".
8. "واحدة خطوبتها اتفسخت علشان ما رضيتش تجيب ماكينة الآيس كريم فى الجهاز".
9. "واحدة سابت عريسها عشان شافته وهو بيعمل حمام فى الشارع".
10. "قبل الخطوبة بشهر عشان مامته قالت صبغة الشعر على العروسة.. وأم العروسة قالت لها عايزانى أروح للكوافير أقوله بكام الصبغة عشان أدفع حقها".
"القشة التى قصمت ظهر البعير"..
ورأى بعض الشباب أن هذه الأسباب التافهة ليست الحقيقة، وقال أحدهم "عمر ما كان السبب التافه هو العامل الرئيسى لفسخ الخطوبة... أكيد كان فى مقدمات كتير أدت لكده.. والسبب التافه ده بيكون القشة التى قصمت ظهر البعير".
وقال آخر "كل الأسباب المكتوبة تبان تافهة وسخيفة لكن لو فكرت فيها بزاوية تانية هتلاقى إن السبب دايمًا غياب التقدير والاحترام والعند والندية"، وقال ثالث "كل الأسباب السخيفة دى مش هى الأسباب الحقيقية للفركشة، المعادلة بتقول (فيه حب مافيش تلاكيك مافيش حب فيه تلاكيك)".