فستان الفرح والطرحة.. وكَتب الكتاب والقايمة

أنا مخطوبة من سنة، وبحب خطيبي وهو كمان بيحبني، وخلاص حددنا الفرح وكل التجهيزات خلصت، بس يوم كتب الكتاب والقايمة كل حاجة وقفت علشان مشكلة القايمة، ومش عارفة أعمل إيه!! هو بيقول لي: إنه بيحبني، ووالده معترض على كتابة القايمة زي الدين والشرع ما حللوها، وأنا باقول له: إنه ده كلام ربنا، وهو بيقول لي: أنا بحبك.. ومش قادر آخد موقف من والدي، ومش عارفة أعمل إيه أنا باصلي استخارة وكل يوم أقوم ألاقي نفسي بحبه ومش بنساه.. يا ريت تساعدوني بسرعة؟
HAMS

صديقتنا العزيزة,
أولاً القايمة دي لا أساس لها في الشرع أصلاً, فهي عادة جرى عليها العرف وأقرّها الشرع؛ وده لحماية حق الزوجة في حالة الطلاق لا قدّر الله, واتفق الناس على أن العريس كنوع من التقدير لعروسته ولإثبات حُسن النية لها ولأهلها بيمضي على القايمة، وبيكتب على نفسه مؤخر كبير, مع العلم إنه سهل جدا التلاعب في القايمة, والراجل عموما لما يحب يتلاعب ويلعب بديله وما يديش لطليقته حقها بيلاقي ألف طريقة يهرب بيها حتى لو كان ماضي على ستين قايمة, وفيه أُسر بترفض ده ثقة في العريس وأهله، ويقيناً منهم إن فلوس الدنيا مش ممكن تعوّض بنتهم في حالة الطلاق، وإن دي عادة عيلتهم, وفيه أُسر بتصمم على ده باعتباره حق من حقوق بنتهم وحماية لها، وإن دي برضه عادة عيلتهم.
وعلى فكرة ولا دُول غلط ولا دُول غلط, بس لازم يبقى فيه تراضي من الطرفين واتفاق على مبدأ من المبدأين؛ لأنه في حالة الخلاف كل طرف هيشك في التاني, وطبعا ما ينفعش العريس يمضي القايمة من ورا أهله علشان يحل المشكلة؛ لأنها بكده هتتعقد وهيزيد شك أهله في أهل العروسة, وعرسان كتير عملوا كده تجنباً للمشاكل، فانتهى الموضوع بتصميم أهله على فسخ الخطوبة؛ لأن ده بيأكد لهم سوء نية العروسة وأهلها؛ لأنهم بيعتبروا أنهم ضحكوا على ابنهم وورطوه وطبعاً لهم حق في ده, وطالما أهله وأهلك مصممين على رأيهم, فلازم حد يتنازل؛ لأن المشكلة مش بس مشكلة قايمة المشكة دلوقتي بقت سوء ظن من الطرفين, فأهلك خافوا واعتبروا أنهم عاوزين ياخدوكِ كده وخلاص ويظلموك من الأول ويستهونوا بيك وبيهم في حين إن اللي شاري بيمضي لو حتى على بياض, وأهله بيقولوا دول مش واثقين فينا وعاوزين يحملوا ابننا فوق طاقته ويلوا دراعنا, فالحل إن حد عاقل وحكيم يدخل لإقناع الطرفين.
صديقتي فلا بد من إرضاء أهلك علشان يطمنوا عليك، ولا بد من إرضاء أهله علشان يطمنوا ليكم, فلو إن القايمة اتكتبت بأسعار الحاجات الحقيقية اللي اشتريتوها فمش عيب أبدا إنه يمضي عليها ويتدخل حَكَم من بره يحكم بالحق, ولو رفضوا يبقى الحل تكتبوا مؤخر صداق كبير وقايمة معقولة علشان أهلك يطمنوا, ولازم حد يفكرهم إنكم لسه بتتكلموا في الجواز، فإيه الداعي الناس تفكر بسوء ظن وتجيب سيرة الطلاق؟!! فهدي خطيبك وأهلك وربنا يقدّم اللي فيه الخير، واعملوا المعقول بحيث لا يظلمك ولا أنتِ تظلميه, وربنا يجمع بينكما في خير.

لو عايز تفضفض لنا دوس هنا