حتى لا يطير الدبان

أصبحت تصريحات المدعو عصام العريان تمثل بالنسبة لي فاصلاً كوميدياً لا يتوقف.. ويبدو أنه مصّر على عودة البرلمان المنحل بأي شكل من الأشكال.. وعلى أي جثة كانت.. مرة على جثة الدستور بحجة استفتاء الشعب.. ومرة على جثة أهل غزة اللي الإخوان اتحزموا وبيرقصوا عليها دلوقت.. عشان ينسونا بلوتنا في فنكوشهم المغشوش.. وتصريحه الأخير أنه عايز يعمل استفتاء على عودة المنحل لمواجهة العدوان على غزة فيه نوع من الزن بشكل غريب.. دا الناس ناقص تحلفله على المصحف أنهم مش عايزنهم وهو مش مصدق.. طب دا نقوله إيه بقى..
يبدو أنه أصيب بمرض "الدبان".. فالدبانة تفقد ذاكرتها كل خمس ثواني.. يعني المسكينة طلعت صاحبة مرض مش غلسة ولا حاجة.. وأنا اللي كنت فاكرها مصّرة "تقريفنا" بالزن على ودانا.. زي واحد صاحبنا مصمم هو راخر ميتغطاش.. لكن عموما أنا عن نفسي هبطل اسمعه تاني.. حتى لا يطير الدبان ويزن.. يزن.. يزن.