ديالوج

samirelgamel@yahoo.com
على مقهى الديمقراطية بميدان الحرية الواقع بشارع الرأى العام.. التقى الأستاذ «مجلس الشوري» مع الأستاذ نقابة الصحفيين.. على غير موعد.. تبادلا نظرات فيها الكثير من الجفاء والريبة.. وأراد الشورى أن يكون صاحب زمام المبادرة أمام رواء المقهى فاقترب من النقابة وقال:
الشورى: إيه يا نقابة مالك زعلانة منى للدرجة دي!
نقابة الصحفيين: طبعا لازم أزعل.. أنا كبرت ومش ناقصة وصاية من حد!!
الشورى: على مهلك شوية.. طول عمرى وصى عليكي.. ولا نسيتى يا نقابة أيام صفوت الشريف.. ورؤساء التحرير اللى كانوا بينزلوا على الجرايد بالبراشوت ومن غير ما ناخد رأى حد ولا سبت؟
الصحفيين: خلاص انتهى الزمن ده!
الشورى: ماشي.. لكن الأصول اصول ولازم نتعاون سوا.. عشان الموهوب المحترم ياخد فرضته
الصحفيين: ومين اللى يحكم ويختار؟!
الشورى: أساتذة وشيوخ المهنة
الصحفيين: وعدم المؤاخذة عضو مجلس الشورى ماله ومال المهنة!
الشورى: لا .. هو المسئول والقانون بيقول كده.. وهدفنا نختار الأصلح.!!
الصحفيين: الكلام ده فى مسابقات ملكات الجمال.. كل واحدة تعرض نفسها واللجنة تبص على المقاسات وتختار.
الشورى: واحنا برضه بنعمل كده!
الصحفيين: ما تفرقش كتير.. فى مسابقة الملكات فيه أجسام .. ومفيش ملفات .. لكن فى مسابقة رؤساء التحرير فيه ملفات ومفيش أجسام.. لكن فيه اسماء!!
الشورى: احنا أخدنا رأى أهل المهنة.. ولا نسيتى يا نقابة!
الصحفيين: بصراحة الأسلوب غلط
الشوري: والقانون؟
الصحفيين: احنا اللى بنعمله واحنا اللى نغيره..
الشورى: وإيه اللى يريحك؟
الصحفيين: كل واحد يروح لحاله.. وزى ما دخلنا بالمعروف نخرج بالمعروف
الشورى: وعيالنا!! قصدى الصحف القومية مش حرام .. يتشردوا .. وممكن ينحرفوا ويشتغلوا فى قناة الفراعين مع توفيق عكاشة!
الصحفيين: أنا عارفة ولادى كويس ومربياهم على الغالي
الشورى: والديون المتلتلة عليكم؟
الصحفيين: ندفعها حين ميسرة.. والدولة تشيلها!!
الشورى: اشمعنى دلوقتى بتقولى الدولة.. ولا هى فى الفلوس بس مطلوبة!! وغير كده تبقى وصاية!!
الصحفيين: خلاص خلاص .. أنا هاصرف على نفسى!
الشورى: إزاى بس؟
الصحفيين: هاشتغل رقاصة!!