حوار مع رغيف مدعوم

بيقولوا على مصر أم الدنيا وكمان أم العجايب .. ليه بقى أم العجايب سمعنا يا خوانا عن وقفات احتجاجية وفئوية للبنى آدمين وإنما توصل إن رغيف العيش أبو شلن وحاجة كدة متعرفش ليها وش من دهر من ساعة ما سى مرسى اتكلم عنه طقت فى دماغه هو كمان يقوم بمظاهرة وخدتوا العنتظة وسد علينا ميدان التحرير حسب الموجة اللى ماشية الأيام دى وقال إيه بسلامته ليه مطالب .. يادى الواقعة السودة قلت يا واد روح أعمل معاه حوار اعرف منه إيه المطالب بتاعتوا وإيه اللى مزعلوا مننا مع أن ده السلعة الوحيدة اللى الشعب بيقف ليه طابور ويضرب له تعظيم سلام .. ياما ناس ماتت وناس أغمى عليها وهما فى انتظار سعادة حضرتوا .. المهم أخدت الكاميرا بتاعتى على كتفى وقلمى فى إيدى وقلت يا واد تعمل حوار صحفى مع رغيف العيش وده حوار محصلش قبل كدة وتقابلت مع أول رغيف عيش صادفنى وكان باين على شكلوا الشلفطة واللغبطة وكان بيتعكز على مسمارين ومخبى جواه حبة قزاز وزلط لزوم المظاهرة ما هو الأمر ما يسلمش برضوا ..سألته : أيه بقا يا سيدى طلباتك اللى أنت عامل علشانها الاردغانة دى كلها وقالب علينا الدنيا ومجرى الناس وراك طب ده أنا حسب ما اسمع انك واخد اكتر من ربع ميزانية الدولة ليك لوحدك! قال رغيف العيش: شكلك كده هتبدأ معايا بالنصب عليا .. هو أنا مضيعنى ومخلى شكلى وحش غير ربع ميزانية الدولة ونص الميزانية ؟!هو انتوا يا بنى آدمين تسرقوا الدعم بتاعى وتحطوه فى كرشكوا وتقولوا عليا باخدوا .. إنت فاكر يا بيه زمان كنت مدور وكبير وأبيض وبروح للناس لحد بيتهم, من ساعة ما عملوا ليا وزارة ومفتشين ومراقبين ووكلاء وزارة وكل واحد من دول بقا ياخد منى حته اقصد من الدعم بتاعى أى والله تسع جهات رقابية اسمهم على الورق خايفين عليا والتسع جهات دول كل يوم بيعملوا اجتماعات ولجان وكلوا من الدعم اللى جاى ليا حتى القمح بتاعى لما بيحبوا يستوردوه بيجيبوا قمح مسرطن وبسوسه وحط فى عمولات وده يخطف حته وده يخطف حبة وياريتهم بيحافظوا عليا بل إنهم بيرموننى فى شون مكشوفة وخلال رحلة وصولى للمطاحن يكون نص الجوال تراب ونص قمح مسرطن وفى الآخر عااايزنى اطلع ليكوا بشكل نظيف طيب إزاااااااااااااااى ؟!
واللى فارسنى وخارب بيت الدولة عقبال موصل لصاحب المخبز من دول الناس اللى ما عندهمش ضمير يعنى صاحب المخبز يرمى جوال الدقيق فى حلة العجين ومعاه نص جوال رمل ..ليه بقا بيحط الرمل فى العجين ؟!أقولك يا سيدى .. علشان لما يشتروا العيش يلاقوه بيقرقش بين سنانهم قوم الناس تبطل تروح المخبز ده ويشتروا عيش علشان صاحب المخبز يوفر الدقيق ويبيعوا فى السوق السوداء .. الجوال المدعم أبو 16 جنيه يتم تعبئته كما هو لأنه هو ب130 جنيه يعنى من الآخر انتوا يا بنى آدمين بتنصبوا على بعض عينى عينك واللى مطير النوم من عينى إن المسئولين عااارفين الكلام ده كلوا وعاملين ودن من عجين والتانية من تراب الفرن, وكل دة حاصلى ومش عاايزنى أقوم بمظاهرة واللى غايظنى إن أمن الدولة مسابنيش فى حالى اللى عمل فيا زى ما كان بيعمل فى البنى آدمين وعمل منى تنظيمات سرية وأسماء غريبة ما انزل الله بها من سلطان وعملوا معايا زى الأهلى والزمالك إشى رغيف مدعم وإشى طباقى وده سياحى وده شامى لما "خلونى" مسخرة قدام عيش العالم كلوا .. بالذمة يا شيخ فيه دولة فى العالم يكون العيش بها له اكتر من 15 اسم؟..طيب والنبى أنا عايزك تشرح ليا يعنى ايه رغيف محسن ويعنى ايه رغيف طباقى .. وبعدين انتوا يا مصريين الشعب الوحيد فى العالم اللى بيفرش العيش على الأرض مكشوف للذباب والتراب رغم إنكم تضعون الأحذية فى الفتارين الزجاج خايفين عليها من التراب يبقى من حقى أقوم بمظاهرة ولا مااقومش ؟!!.. لم أجد إجابة ترضى هذا الرغيف الثائر فقررت أن أبادره بسؤال آخر إلا إننى لاحظت مظاهرة مضادة من البنى آدمين على رأسهم محمود عجينة ومعاه ربابة وهو بيقسم شعارات وبيقول:
وقفنالك بالطوابير..
مع إنك فيك مسامير..
وبقيت قد اللقمة..
أهلك مالهمش ضمير..
قالوا عنك بالأنواع ..
والله ماليك تتباع..
شكلك بيزيد همومنا..
ومقلب فى الأوجاع..
بتعزز نفسك ليه..
الناس عملتك إيه..
علشان نتعذب لما..
ناخد منك بجنيه..
دوبت تلات رؤساء..
اتنين منهم ماتوا..
والتالت بيقول واء..
وسى مرسى هايربعهم..
والله ما هى طالبه عناء!