دردشة مصرى (1)

حلم الجعان عيش . دا كلام صح فعلا. لذلك لما تيجى تتكلم مع راجل بسيط من شعبنا الطيب اللى شاف العذاب والهموم والمرض أنواع وتقوله هتنتخب مين رئيس لمصر يقولك شوف يا أستاذ أنا هنتخب اللى يخلينى محملش هم رغيف العيش ، يا سعادة البيه الأستاذ احنا لسه بنلاقى رمل فى رغيف العيش وساعات بناكل عجين مش عيش ،عشان كده هانتخب اللى يوفر لنا لقمة نظيفة ناكلها تجيب الصحة مش المرض وبينى وبينك إحنا مش ناقصين مرض كفاية الفشل الكلوى والكبد والهم اللى احنا فيه ، يا أستاذ ليه بتفكرنى دا أنا ليا أخ بيتعالج فى مستشفى حكومى حالة المستشفى تجيب المرض مش الصحة يعنى بالله عليك يا أستاذ الناس بتدخل المستشفيات تتعالج ولا تمرض أكتر ، طب اللى ممعهوش فلوس يتعالج فى مستشفى خاص يمووووت يعنى ولا أيه ؟ يبقى احنا عاوزين رئيس لمصر يكون راجل حاسس بغلابة مصر مش بأغنياء مصر الأغنياء مش محتاجين حد ياخد باله منهم لكن الغلابة نفسهم فى حد يحس بيهم كفاية لحد كده احنا اتهرينا ومعتش فينا .