وشدى الحيل كفاية بقى دا البيت بيت أبونا والغٌرب بيبهدلونا ويهزءونا وفى الآخر يقتلونا، يا مصر قومى كفاية بقى دا الصهاينة مخلوش ولا بينكسفوش يا مصر قومى امتى بقى هتشدى حيلك ما كفاية بقى اللى جرى، ولادنا اندبحوا وراح دمهم بلاش واللى قتلهم خسيس ميسواش، طب ليه وعشان أيه نفسى أفهم يا عالم هو أحنا دمنا رخيص ليه وملوش ثمن ولا أيه. يا مصر قومى ما كفاية بقى بهدلة ومرمطة وقلة قيمة، دا الخسيس هيفضل خسيس يا مصر قومى دا الخسيس ملوش عزيز، طب حد يقول لى هو أحنا ساكتين ليه هو أحنا مش عارفين نعمل حاجة ليه، طب فاضل أيه، طب ونسكت ليه، يا مصر دا أنت كبيرة أوى ليه بس كده، دا اللى ما بيشوفش من الغربال يبقى أعمى، هقول أيه بس منهم لله، الولاد اندبحوا يا مصر قومى ما كفاية بقى. ولولا الراجل الطيب رجب طيب الله يستره ويعمر بيته لما طرد ابن ولاد الإيه سفير الغبرة اللى اسمه أيه، ووقف وقال اوعوا تفتكروا أن أنا طيب أنا مش طيب ولا هفرط فى دم ولاد بلدى عشان خاطركم، الله فى سماه دم الشهدا ما هيروح هدر دا أنا نويت لكم والنية خالصة، علاقات بنا مفيش، سفير لكم عندى يغور مليزمنيش، مناورات وتدريبات وسلاح انسوا خلاص بقى مفيش، الله يستره الرجل الطيب رجب طيب لما وقف، وقال وأوعوا تفتكروا أن أنا طيب أنا مش طيب، الله فى سماه لجيب عاليها واطيها ومبقاش رجب طيب وابقى صحيح راجل طيب لو عدى عليكم يوم بعد النهارده من غير ما تحلفوا بحياة رجب طيب. الله عليك يا طيب أسد يا ابنى من يومك، على الله اللى مبيتكسفوش وعلى دمهم مابيختشوش يعرفوا أن رجب طيب مش راجل طيب ده سبع يا ابنى من يومه، يا مصر قومى وشدى الحيل وشوفى الراجل الطيب رجب طيب نفسنا يكون عندنا راجل طيب زى رجب طيب يعرف يجيب حقنا وحق ولادنا، ومش عايزين راجل طيب أحنا بس عايزين رجب طيب. يا فرحة أمك بيك يا رجب طيب، والله من حقها تقف وتقول أنا خلفت ويا زين ما خلفت راجل ملو العين، يا مصر قومى وشدى الحيل، رجب طيب بقولك أيه متخدنيش عندكم شهر ولا اثنين أعيش وسطكم وأسكن حيكم واقعد وسطكم، يمكن أرجع من عندكم بعد ما أسكن حيكم رجب طيب زيكم، تعبت من الكتابة نفسى أعيش عندكم وأحس أنى واحد منكم نفسى أشرب من نبعكم، نفسى يجرى فى عروقى دمكم نفسى بقى ابقى زيكم، وأجيب حق ولادنا زيكم، ما أنا مش اقل منكم، ده أنا زيكم وأكثر شوية بس هو البخت اللى مش زيكم. يا مصر قومى بقى متشمتيش فينا العدا، يا مصر قومى متشمتيش فينا اللى مبيتكسفوش وعلى دمهم مابيختشوش، يا مصر قومى بقى، يا مصر فضك بقى من اللى بعوكى ورموكى، يا مصر فضك بقى من اللى كلوكى ورموكى، يا مصر قومى.
