صلّوا عالنبى! دلوقتى الوضع منيّل بستّين نيلة، السياسة الإخوانية عمّالة تزوّد الاستقطاب كل يوم لحد ما بقى الناس بيقولوا حرب أهلية عادى كده؛ واحنا مانقدرش عليها اصلا، واللى يلعب بالنار ويفتكر انّه حيطفّيها وقت ما يحب يبقى أحمق؛ بنعلّم عيالنا كده! الوضع الاقتصادى حاجة بقه إيه؛ بكاء بالدموع والدم فمش عايز اجيب سيرته؛ والفقراء المساكين فى ربوع مصر بعشرات الملايين والعيشة عمّالة تغلا ولو انفجرت البومبة دى فى وشّنا، وخصوصا والبومبة التانية مستوية على آخرها، حنتمرمط كلّنا، مش حيبقى فيه وطن أصلا، ده احنا 90 مليون نفر. حلو كده؟ قول حلو. بعيدا عن كل تفاصيل الإعلان الدستورى المنيّل بستين نيلة، مع افتراض إخلاص النية! (مش متأكّد ازاى)، يبقى عالأقل لإنّه عمل فى مصر كده، فى وقت المفروض نبقى فيه بنستدير «جميعا، سويّا» نحو قبلة المستقبل اللى اتأخّرنا عليه بفظاعة والله أعلم حنلحقه ولّا لأ. وبعيدا عن الإعلان الجستورى اللى أصدره الرئيس من غير حتى ما يقول «مش ياخد رأيهم لا سمح الله»، يقول حتّى لمستشاريه ولا لأحد من مؤسسة الرئاسة اللى كثيرا ما يتردّد إسمها! وبعيدا كمان عن الخناقة الغريبة جدا اللى دخّل فيها الرئيس نفسه فى مواجهة واستعداء مع قضاة مصر كلّهم فى مشهد عجيب بيخلّ بمفهوم الدولة كلّه؛ وبعيدا عن «لن يتراجع قيد أنمله!» وبعيدا عن «مش انتو نزلتو الميدان امشوا بقه امّا نيجى احنا كمان عشان نشوف بقه مين فينا أكتر بقه» فى مشهد يدل على إن الإسلام السياسى فى مصر لم يتعلّم أى درس واحد وحيد عبر كل العقود اللى عاشها على هذه الأرض؛ تصرّفات طفولية ساذجة لدرجة القرف! تجعل الواحد فعلا يستغرب كيف يثق أى صاحب عقل وضمير فى هؤلاء! بعيدا بقه عن كل «القرف» ده، الدستور بقه حنعمل فيه إيه؟ دى أجواء نحط فيها دستور دى؟! 26 شخص وكيان من أساسيى اللجنة انسحبوا، وناس قاعدين زى مايكونوا بيسرقوا لحد الساعة اتنين بالليل يكتبوا الدستور بسرعة عشان يلحقوا بقه ينفّذوا الخطة الإخوانية اللى بتتردد على المسامع؛ «خلّص الدستور والرئيس هو اللى يحلّ اللجنة»، مع إن الإعلان المشئوم مدّلهم شهرين يشتغلوا فيهم ها!! ومش عارف الحقيقة خناقة القضاء مع السيد الرئيس الحريص على مجلس الشورى «بتاعه» اللى حيبقاله سلطات فى الدستور بتاعه، عشان يقدر يعطّل بيها اللى مايعجبوش من شغل مجلس الشعب عشان مابقاش مضمون يبقى بتاعه!) مش عارف الخناقة دى موقفها حيبقى ازاى، بس المهم ان حيُعرض بقه الدستور للاستفتاء بسرعة بسرعة قبل ما يغلى (عشان نخلص من الإعلان إيّاه بقه!) وطبعا الشعب يقول نعم عشان هو الشعب ده بيحب الكلمة دى، ونلبس كلّنا سلطانية من الحجم الإخوانى العائلي!! ليه كده!! ليه ده كلّه؟ كل ده عشان الإخوان والسلفيين يبقوا مبسوطين من الدستور «بتاعهم» ليه كده ليه؟ وليه بقه دلوقتى مانخلّصش المشهد المؤسف ده؟ عشان كرامة السيد الرئيس؟! قد إيه تمن المفروض مصر تدفعه تمنا لكرامة السيد الرئيس عشان كلمته ماتنزلش الأرض تانى أبدا؟! ولمّا يبقى فيها دم بقه بين المصريين وبعض لو استمر العبث ده (دم بدأ على خفيف بالفعل ها!)، قد إيه دم حينفع يبقى تمن لكرامة سيادة الرئيس!؟ فى كلمتين؛ عندنا دستور 71 ودستور 54 كمان؛ يتنضّف الأوّل ممّا ألحقه به حسنى مبارك ورجاله من أذى؛ ونعمل محطة تليفزيون تشرح فى ساعتين الفرق بين الاتنين ويفضلوا يتعادوا ليلا نهارا؛ والرغى بتاع برامج التليفزيون يشتغل، والمقالات تنزل ترف، ويحصل استفتاء على نستعمل مين فيهم؛ بلاش، الاتنين كده حاجة تلخبط؟ خلّى الدستورية العليا، أو مجلس القضاء الأعلى، أو لجنة من عشر قضاة دستوريين أو أى حد يعجبكو ينقّيلنا واحد؛ واستفتوا عليه الناس؛ وحيقولوا نعم برضه لعلمكو! أو ماتعملوش استفتاء خالص؛ لو كل رموز القوى الوطنية من كل التيّارات طلعت قالت للناس إنّهم راضيين بهذا الدستور هى الناس حتبقى مرضيّة؛ همّ دول الناس اللى بيبنوا قرارهم على آراءهم كده كده! وبالمرة نوفّر فلوس وأمن مش عارف حيشتغل ازاى فى العجينة اللى احنا فيها دي؛ وقضاة ماعرفش حيشرفوا عالاستفتاء ازاى وهمّ عندهم خناقة مع الرئيس! ولّا سيادة الرئيس حيخلّى الإخوان يشرفوا عالاستفتاء؟! ونبقى خلصنا من حكاية الدستور دى مؤقّتا؛ نوقّف الدولة على رجلها، وتعمل أى إنجاز؛ أى إنجاز يا سيادة الرئيس عوضا يعنى عن طائر النهضة اللى طلعنا لسه ماصطادناهوش أصلا! وبعدين احنا قاعدين يعنى، أوّل ما نبقى بنى آدمين كده وتبقى دى دولة لامؤاخذة مش دار حضانة نبقى نكتب أحسن دساتير العالم لو عايزين! لو عَنَد الرئيس ونفّذ فعلا تلك الخطّة وطلع كل موضوع الإعلان الدستورى (بتاع اللعب بالنار ده هه!) هو تمويه بس لتمرير الدستور بهذه الطريقة اللا أخلاقية، أطالب قادة جبهة الإنقاذ الوطنى بالإعتصام هم أنفسهم ودعوة أنصار الجبهة جميعا بفروعهم للاعتصام معهم، إعتراضا على الطريقة دى اللى بتعتمد على تفريق المصريين وقسمتهم ولوى ذراع الكثير منهم؛ كيلا تُقرّ طريقة زى دى على إنّها الطريقة الشرعية اللى بتدار بيها شِبه الديمقراطية دى، وشِبه الدولة دى. اللهم اهدنا إلى ما فيه خيرنا «جميعا»؛ فأنت أعلم منّا بما ينفع.