احمد عفيفي يكتب : « عابدين» ابو ابوك .. ياوزير التنمية !!

مغلطتش انا في حد واللي يقدر يمسك عليا غلطة عليه وعلي النائب العام .. فسيادة الوزير الهمام اللي اسمه احمد زكي عابدين .. ابوه اسمه زكي وجده اسمه عابدين .. يبقى كمان مرة عابدين ابو ابوه .. اللي لو كان لسه عايش يبقى لازم يربي ابنه اللي هو زكي عشان معرفش يربي حفيده اللي هو احمد .. وزير على عيني وعلى راسي بس بأدب .. تتكلم بقلة ادب تاخد ب " ... " .. واذا مش عاجبك تضرب راسك في الحيط لحد ماتتفتح ونشوف ان كان جوّاها مخ ولا فردة " ... ".

فيه ايه ياعم انت .. انت وزير ولا بلطجي .. ولا اياك تكون من بتوع الطرف التالت اللي خوتوا دماغنا بيهم .. واحدة مذيعة محترمة زي ريم ماجد بتقول لك بأدب شديد ياسيادة الوزير يابتاع التنمية الناس قرفانة جدا من قرار اغلاق المحلات الساعة عشرة ، وحسب التقرير اللي اذاعته قبل مداخلة جنابك الناس بتقول ده خراب بيوت والبطالة حتزيد والبلطجة حتبقى الحل المشروع لواحد كان بياخد قرشين من محل .. قام صاحب المحل استغنى عنه .. طيب حيعمل ايه وانت حرمته بقرارك الثوري من لقمة عيشه .. حيزغرد في عبه مثلا ويقول كتر خيره الوزير ريّحنا من السهر وغلاسة الزباين .. ولا حيسب - وعنده حق - للي اخذ القرار واللي شار عليه بيه؟

فيه ايه ياعم الوزير .. ايه العصبية المنفلتة دي .. الغلبانة ريم بتنقلك اللي الناس بتقوله تقوم تقولها انت اللي بتقولي واتكلمي عدل ياروح امك وياتكم القرف فيكم كلكم وتقوم قافل السكة في وشها كأنها بتشتغل عندك جناب اللي خلفوك.

ايه القرف ده ؟ .. بقى انت وزير جه بعد ثورة .. مش طايق واحدة ياريتها حتى بتنتقدك .. دي يا ولداها بتنقل لك كلام الناس اللي حيتخرب بيتها من القرار الغبي اللي انتوا عايزين تنفذوه .. لأ والنصاحة واخده حدها معاكم للأخر .. قال ايه عايزين نوفر الكهربا .. طيب عيني في عينك كده .. بذمتك الحكاية حكاية كهربا ولا لغرض تاني في نفس يعقوب .. عايزين الناس " تتكن " في بيوتها بعد الساعة عشرة .. ولا يبقى فيه ناس قاعدة سهرانة وبتتكلم عن مهازل البلد بعد الثورة .. والكلام يجيب كلام والزن ع الودان اقوى من السحر وبعدين يحصل اللي انتوا خايفين منه .. فقلتوا بلاها سهر وكله بيتك بيتك من بعد عشرة .. ونسيت سعادتك ان فيه اختراع ابن لئيمة اسمه الفيسبوك والتويتر .. اللي بيفتح ع العالم في اللحظة والثانية ويخلي كل الناس تقول اللي هى عايزاه ويتفقوا ويعملوا ثورة من غير سهر على القهاوي ولا يحزنون.

كهربا ايه يابو كهربا .. انت متعرفش ان فيه ناس في وزارة الكهربا بياخدوا مليون جنيه في الشهر .. وفي وزارات تانية شرحه .. ده غير البنوك والمصالح الحكومية التانية .. عليا النعمة لو قصقصتوا ريش العالم دي لتوفروا فلوس اكتر بكتير من اللي حتوفروها من قفل المحلات بعد عشرة .. بس حتعملوا كده ازاى .. مانتوا كمان حتتلطوا وينوبكم م الحب جانب .. فنعمل ايه بقى؟ .. نشخط وننطر ونقل ادبنا على الخلق .. قال ايه عشان الناس تخاف وتترعب وتنام في بيوتها زي الفراخ .. ونسيت اياك ان وزير الداخلية اللي غار في مليون مصيبة تشيله هو واللي كان مشغله .. نسيت انه في السجن .

نسيت كمان ان الناس في مصر مبقتش تخاف لا من وزير داخلية ولا وزير دفاع .. يبقى حتخاف من وزير تنمية .. ياعم روح نمّي الاول عقلك وفكرك واعرف ازاى كوزير مسئول تواجه الناس بأدب وتتكلم مع الناس باحترام عشان الكل يحترمك .. هى مش صياعة ولا فردة صدر .. مش ناقصين بلطجية بدرجة وزير .. ويا ليلة كوبيا بقى لو سار على نهجك بقية الوزرا .. وبأوامر عليا من رئيس الحكومة عشان بدل ما تبقى حكومة قنديل حتبقى حكومة قنديل المقندلة والمنيلة بستين نيلة تاخدكم كلكم واحد واحد ان كانت دي سياستكم .. وان كانت دي اوامر من اللي فوق خالص .. يبقى هو كمان داهية تاخده باللي فوقه واللي تحت منه.


تعرف احلى حاجة يا سيادة الوزير تعملها انت بنفسك .. بعد الساعة عشرة تقفل بقك خالص وتوفر علينا قلة الادب وطولة اللسان .. وصدقني لو عملت كده والوزرا التانيين عملوا كده برضه البلد حتعمر وحنعرف نفكر معاكم ازاى ننهض بالغلبانة مصر من غير بجاحة ومن غير شرشحة .. ابدأ بنفسك يا وزير التنمية واقفل بقك بعد عشرة .. وخلينا احنا نسهر براحتنا وخلي الناس تاكل عيش .

مش تمشوا بمبدأ : لا ترحموا ولا تسيبوا رحمة ربنا تنزل .. اتوكل على الله .. واهو بلاغ مني على الهوا للنائب العام .. الوزير اللي حيفتح بقه بعد عشرة ، ليلة اللي خلفوه سودا لأننا حنقطع عليه الكهربا في بيتهم ونعين عسكري او امين شرطة في بيت كل وزير .. اللي حيمسك شمعة في الضلمة الكحل دي .. من حق العسكري او الامين يطفيها في الحتة اللي هو عايزها .. عشان بعد كده كله ينكتم خالص وميحطش منطق ويعرف ازاى يتكلم بأدب مع الناس المؤدبين.