ديالوج

samirelgamel@yahoo.com
فى ميدان التحرير التقى المسدس مع القلم.. كلاهما جاء يدافع عن الشرعية.. الأول بالقوة والثانى بالعقل، المسدس فى يد.. والقلم فى الأخري.. فمن تكون له الكلمة فى نهاية المطاف.
المسدس: صباح الديمقراطية يا أبو ورقة!
القلم: ومالها الورقة ياأبو عضلات.
المسدس: لا.. أتكلم بصوت هادئ ياحلو!!
القلم: بتخونى سيادتك؟
المسدس: لا العفو.. بس حضرتك قاعد تقول وغيرك يقول.. والكلام رايح جاي.. لغاية مابقت فوضي.. من غير سقف.
القلم: وماله كل واحد يقول رأيه.
المسدس: ولما الرأى تلاقيه قلة أدب مش سايب رمز ولا قيادة إلا ونازل فيه بهدلة.. يبقى إيه الفرق.. بين اللى بيكتبه القلم.. وبين فواصل الردح البلدي!.
القلم: كل واحد بيتحمل نتيجة كلامه ياعم المرعب!
القلم: احفظ أدبك!!
المسدس: الله الله.. بقينا نتكلم ولنا صوت..
القلم: طول عمرى كده.. أنت اللى كان رصاصك مغطى على كل حاجة.
المسدس: ولما بطلناه للأسف بقت هيصة وكل واحد عامللى فيها دستة رجال فى قلب بعض.
القلم: يا ابنى خلاص حكاية الخوف خلصت والعضلات من غير مخ وتفكير.. لامؤاخذة «حمورية»!!.
المسدس: مش باقولك قلة أدب.. طيب أرفع ايدك فوق واختار لى حتة حلوة تاخد فيها رصاصة الرحمة.. اللى تريحنى من صداعك.. وتريحك من الدنيا كلها.
القلم: أنا قدامك أهه اتفضل اضرب زى ما أنت عايز!.
المسدس: يعنى مش خايف تموت!
القلم: العمر واحد والرب واحد.. وبعدين انت مين اللى وراك؟ من اللى بيسلطك على الناس؟.. ومين اللى بيخوف بيك عباد الله.. غير واحد خايف ومرعوب.
المسدس: لو خايف ومرعوب.. تبقى أيده مرعوشه.. وساعتها الرصاصة ممكن تصيبه قبل غيره.
القلم: ياريت.. من بقك لباب السما!
المسدس: ماتسيبك من شغل الولايا والحريم وتسترجل!
القلم: أنا أرجل من عشرة زيك.
المسدس: يابنى أنت واحد يشتريك بجنيه.
القلم: الكلام ده تقوله لبلطجى زيك من غير الرصاص يبقى فرفور!
يهم المسدس باطلاق الرصاص ويتصدى له القلم الرصاص.. فهل يتدخل أولاد الحلال لفض الاشتباك لله وللوطن وللغلابة!!.