صحيح عنده حق جمال بخيت عندما كتب : دنيا متولة تولة .. بترفه ع العتاولة .. وبتدي المستريح .. حتى من غير محاولة .. اللي تديله دولة .. واللي تديله جولة .. واللي تديه مقاولة اكبر من الهرم " .. وعنده حق اسماعيل يس لما قال زمان : فيه ناس بتكسب ولا تتعبشي وناس بتتعب ولا تكسبشي " .. اللي حاصل في رمضان السنة دي والسنوات اللي فاتت يصيب بالغثيان .. شعاره هذا العام تحديدا " استهبل فيها وخد فلوس " .. تهريج في تهريج وضحك ع الدقون ، وفي الاخر اقبض ألوف وطرّي على قلبك يا عطشان .. برامج تافهة وغبية وتقطعها إعلانات بالهبل .. يعني فيه ناس بتتفرج واتفه من اللي بيتفرجوا عليهم.
مثلا " رامز ثعلب الصحراء " .. الكاميرا الخفية اللي بيقدمها رامز جلال .. هذا البني ادم الغريب اللي مش عارف إيه حكايته بالضبط عشان كل رمضان يتحفنا بتخلفه العقلي وحركاته القرعة ، اللي ميضحكش عليها غير واحد أهبل أو ساذج .. بيفكرني بواحد من كام سنة كان دمه يلطش مديرية واسمه ممدوح موسى ، وكان مقرر علينا في كل رمضان .. كأن صومنا مش نافع اذا ماشفناش سي ممدوح .. راح فين دلوقتي؟ الله اعلم .. قعد كام سنة يستهبل فيها وياخد فلوس وعملهم على قلبه زكايب .. وبعت لنا رامز جلال " نفس سحنته " ليكمل هو الأخر غلاسته وغباوته ويقنعنا ان اللي بيحصل ده جد ..مش تمثيل .
إديني عقلك يا سيد رامز وامشي حافي .. يعني إيه تجيب واحد زي محمد فؤاد وتعمل عليه انك إرهابي وتهاجم العربية اللي راكب فيها .. والمفروض ان اللي معاه في العربية من طقم العمل بتاعك في الكاميرا الخفية .. وهاتك يا ضرب نار وكلاشنكوف وتغمي عين المسكين وتخطفه في الصحراء وهو ياحبة عين امه عملها على نفسه من الرعب .. وفي الأخر يكتشف انه وقع فريسة واحد زيك بيهزر معاه.
أبصم لك بالعشرة ان محمد فؤاد عارف اللعبة من أولها .. ولأنه ممثل انغمس في الدور ع الأخر .. لأني لو صدقت انه ميعرفش .. يبقى انت تستحق ضرب النار .. فببساطة ممكن الواحد يروح فيها بجد لو حصل وطلع له واحد زيك ملثم وماسك بندقية .. خاصة في الأيام السودا اللي احنا بنعيشها من خطف في عز الضهر وسرقة بنوك وتثبيت في الشارع .. وبلاوي زرقا مالهاش أخر .. طبعا كله تمثيل في تمثيل .. انت بتستهبل فيها وفؤاد بيستهبل هو كمان .. والمفروض اننا نضحك ونكركر من الضحك على شوية ناس هبلة ومهاطيل بيضحكوا علينا ويقبضوا فلوس.
نروح بقى على " دوس بنزين " في قناة المحور .. وواحد مجنون وجنبه ضيف او ضيفة وهاتك يا غرز وأمريكاني وحركات معفنة .. والاسم اننا بنتفرج على حاجة بترفه عن النفس .. وفي الأخر شوية دلع ماسخين من الضيفة اللي اتمرمطت في العربية .. وياوحش.. ياكخه .. يا ندل.. ياقليل ادب .. إخيييه عليك .. انا مخصماك .. ومش حالعب معا تاني. .. نبعد شوية عن الكاميرا الخفية ونروح على " كرسي في الكلوب " .. وشوية أسئلة " هبل اصلي " من لميس الحديدي لضيفها البلكيمي بتاع مجلس الشعب اللي عمل عملية تجميل عشان مناخير جنابه كبيرة حبتين .. وحوار غبي مالوش معنى غير استهلاك وقت ع الفاضي .. احنا نتفرج وتجينا نقطة .. ولميس تهبر كام الف على شوية العفانة اللي بتعملها .. وضيفها مادام جي يتهزأ وياخد على قفاه يبقى لازم ينوبه م الحب جانب .. كام الف هو كمان .. وادفع يا صاحب القناة مادام فيع اعلانات بتيجي ع السيرة العفشة وتملا الشاشة.
.. ولا مجدي الجلاد لما يستضيف النغة الكلبوظة عمرو افندي مصطفى ابو دمعة جنان .. ويقعد معاه نص ساعة في كلام فارغ لايودي ولا يجيب .. مجرد هرتلة مع واحد عبيط لسه عايش في وهم مبارك الاب والام والاخ والاخت وصورته لا يمكن تنزل من على الحيطة في غرفة الافندي وفوق سريره .. وكل مايبص لها يعيط ياحبة عين اللي خلفوه ويقوله : معلش يا ريس .. شعبك معندوش اصل .. اهىء اهىء اهىء.
.. لكن كله كوم والأخت سمر كوم تاني .. مين بقى الأخت سمر ؟ والله أول مرة أشوفها على قناة " القاهرة والناس " .. أول مرة اشوف مذيعة لابسه على راسها " مقشة معفنة " من الحجم الكبير اللي بنكسن بيها زبالة الشوارع .. والهانم اللي فاكرة نفسها حلوة .. ولما تضحك تفتح ميدان رمسيس لحد التحرير ، الهانم بتقدم برنامج اسمه " سمر والرجال " .. وأسئلة اقل ما يقال عنها أنها قذرة وغاية في قلة الأدب .. أسئلة غرف النوم والجنس .. وإيه أحلى حتة في الست اللي بتثيرك وتخليك لامؤاخذة " هايج " .. وكام مرة نمت مع واحدة بتحبها .. والحكاية دي - اقصد النوم مع حبيبتك - مش برضه مهمة وبتقوي العلاقة العاطفية .. ولا انت شايف ايه ؟ .. وايه علاقتك بالفياجرا وكام حبة تخليك زي الحصان وتعمل أحلي واجب في الدنيا؟
فيه مذيعة تبقى دي اسئلتها لضيفها .. ناقص تسأله عن الأوضاع الجنسية الأكثر متعة .. والجنس الفمي ، حلو ولا وحش .. ولو مرة جبت واحدة ولقيت نفسك مفيش.. ممكن تتصرف ازاى .. وهل في الحالة دي تدّيها فلوسها ولا تقول لها .. ماهو مفيش .. طيب حادفع ليه؟
هو ده رمضان .. وهو ده الشهر الفضيل .. وهى دي البرامج الترفيهية .. ياتكم ستين نيلة انتوا واللي مشغلينكم .. ناس فاضية بصحيح ومعندهاش ريحة الدم .. قسما بالله لو بإيدي ، لاحرقهم كلهم بجاز وسخ .. وقسما بالله كمان مرة خسارة فيهم تمن الجاز!!