إهئ.. إهئ.. أهؤ....!

زمان علمونا إن الكدب عكس الصدق وإن الصدق منجى وإنه ملوش رجلين حتى لو مشى ألف كيلو..!!! لكن أنا كنت شايفة غير كده خالص ..!!! كنت بشوفه منجى وبيفتح أبواب كتيره أوى وإنه عنده مليون رجل ... ولاقيت الناس مش بتحب إلا الشخصية غير العادية أما الشخص السوى فلا يلفت انتباه أحد.. وأنا لا أحب أن أكون مهمشه بل أعشق بؤرة الأحداث وبمجرد ما أبدأ الكدبة الأولى لا أجد أى صعوبة لا فى التانية ولا المليون..!!! المهم اتخرجت من الجامعة واتعينت فى بنك بواسطة أنكل زهير جوز خالتى ومن أول يوم عرفت إن حجمى فى البنك مش هيزيد عن طولى.. بالمناسبة أنا أنتمى للقامة القصيرة... ولايوجد ما يميزنى عن أى حد غير إنى لامؤاخذة حمارة شغل... آه نسيت أقولكم إنى من طنطا ومعرفش ليه أهل مصر مهما لبسنا شبههم واتكلمنا زيهم بيعرفوا إننا مش من القاهرة..!!!
وفى يوم سألت زميلة لى: إنتى عرفتى منين إنى مش من القاهرة؟ لقيتها بتشاور على جزمتى البيضا ... ولما سألتها ودى كمان فيها إيه ؟ قالت لى: أصل محدش بيلبس جزم بيضا الصبح غير أهل البلاد.. وبعد ستة أشهر من الشغل المتفانى لازلت مهمشة فى هذا البنك وهنا قررت أن أعود لموهبتى فى تغيير الأحداث وسرد حكايات وهمية أصل بصراحة كلمة الكدب دى تقيلة...!!! المهم نزلت تانى يوم الشغل وكآبة الدنيا على وجهى بعد ارتدائى لفستان أسود ولميت شعرى بشريط أسود ووضعت قلب بصلة فى منديل لزوم الدموع ... ودخلت عليهم المكتب دون أن أنظر لأحد وكل علامات الحزن على وجهى واقتربوا منى واحد تلو الأخرى: إيه مالك؟! إهئ إهئ ... والدى مستحملش فراق والدتى اللى توفيت من ستة أشهر وبقيت لوحدى ...إهئ إهئ إهئ..!!!
لاحول ولاقوة إلا بالله وأصبح الكل يهتم بى... إلا أنه سرعان ما هدأت القصة.. وقررت أن أجبس يدى,,!! ولاداعى لسؤالى إزاى جبست إيدى 20 جنيه يجبسوا أى حاجة!! وبمجرد مادخلت جه الأستاذ صلاح ليطمئن على (أخيرا نطق)
أبدا اهىء اهىء أصل جوزى ضربنى رغم أنى بخدمه خدمة العبد للسيد إهئ إهئ لا سلامتك ألف سلامة هابقى أطمن عليكى..
بعد شهر جبست رجلى !!! إهئ إهئ منه لله جوزى ... واقترب الأستاذ صلاح أكتر وأكتر وقال لى إنه كان يتمنى أقابله من زمان وإنه بيكره جوزى اللى مش مقدر قيمتى وإنه قلبه بيتقطع عشانى.. وياريت كان يقدر يرتبط بى..
بعد أسبوع
صلاح أنا اتطلقت خلاص ممكن نرتبط ببعض,,! ابتعد عنى ولم يعد يكلمنى ؟ ولا أعرف لماذا نقلنى فرع البنك فى إسكندرية. بعد شهر ارتديت فستان أسود أصل خالتى ماتت حزنا على ماما و بابا اهئ اهئ اهئ....