بنت من الغربة ......

معقولة هاتنزلي مصر ؟ بعد أسبوع. أغلق الخط، أتذكرها، لم أرها منذ سنوات من آخر إجازة صيف قضيناها معا..
يمر أسبوع
- حمدلله علي سلامتك.. اتغيرتي كتير (ترد بمصري مكسر)
- لا مش كتير..
- احكي لي إيه اللي فكرك تنزلي مصر ودي لا إجازات ولا أعياد وكمان لا خالتي معاكي ولا أي حد من إخواتك ؟
- أبدا كبرت وخالتك اللي هي أمي بتقول لازم أتجوز مصري..!
- مصري.. يعني عايزين كل حاجة جنسية أمريكية وكمان شبابنا تاخدوه ومش مهم البنات اللي هنا ... واضح إنها مفهمتش .. طيب وأنتي هاتعرفي تعيشي معاه؟
- معرفش أنا شايفة إن مفيش فرق بين أمريكا وهنا، يمكن هنا الناس سايبة أكتر حتي أفلامكم اللي بنشوفها حاجة صعبة خالص.. من إمتي بقيتم كده ..!
وبدأت بنت خالتي في الفرجة علي العرسان اللي بيحلموا بأمريكا والجنسية إلا أنني فوجئت بها بعد أسبوع من مقابلات وخروجات تقرر السفر لشرم الشيخ دون الاهتمام بإنهاء المهمة الأساسية وهي الحصول علي زوج ؟! وسألتها: إيه نسيتي موضوع الجواز. ضحكت وبصوت عال جدا! - الناس هنا كذابة أوي، أنا هاحكي لك عن آخر واحد، أصل التانيين مش مهمين.
أول مرة خرجت معاه اتكلم في مواضيع غريبة: الحرية وأن الرجل زي الست كلام كده فاكر إنه في أمريكا بيشغلنا ..! بعد كده قال: لازم آكل قلت له: لا أنا عايزة أشرب نسكافيه وخلاص لكن هو قال لازم نتعشي ومقدرتش أخلص أكلي، فقلت ناخده معانا مرضاش أبدا... مع إن في ناس كتير عملوا كده
- آه رجل كريم (ده أنا اللي بقول)
- لا مش بيعرف يعني إيه فلوس .. المهم تاني مرة سألني: انتي بتدخني عرفتي ولاد قبلي.. بترقصي بتلبسي مايوه.... وحاجات كده غبية ده غير إنه مرضاش يقولي ميزانية الغدا إيه وبصراحة أنا طلبت أكل غالي وهو كان خايف أوي .....
- وبعدين حصل إيه؟ - رديت عليه وقلت له إنه مجنون. معقولة أنا اتولدت وعشت في أمريكا وعندي 25 سنة محدش اتعرف علي ولا حبيت ولا اتحبيت وأكيد جربت السجاير وأكيد رقصت لأن دي حاجة في المدرسة.
- أكيد الرجل جاله ذهول (ده أنا اللي بقول)
- معرفش مين اللي جاله لكن هو بقي مش عارف يقول إيه لكن أنا قلت حقيقي لابس أحدث موضة وبتتكلم إنجليزي لكن دماغك عايزه تتغير من جوه..؟ وإن في حاجات أهم كتير من اللي عملته، المهم اللي هاعمله.
- وبعدين حصل إيه؟
- أبدا ناديت الويتر ودفعت حسابي لأنه مينفعش يدفع لي.. ومشيت بس تعرفي أنتم بتحبوا الكذب هو كان عايز أقول: لا مش ممكن عمري ماحبيت ولا كنت بشوف ولاد وإنه أول رجل أتكلم معاه لكن مش ممكن أعرف أعمل كده؟ عشان كده أنا هاسافر بس علي فكره أنا إديته تليفونك يمكن يبقي شريك كويس وابقوا تعالوا أمريكا بس أنا هاسافر شرم عشان أعمل حاجة لها معني ..!