أحمد عفيفي يكتب: أميرة .. يا « حبي انا » .. متخفيش!!

انا وعدتها اني اكتب عنها مقال .. ولمّا أميرة تؤمر ,, يبقى أمرها حكم واجب النفاذ .. بالضبط زي حكم امبارح اللي هز الدنيا هز بحتمية محاكمة محمد مرسي " رئيسنا المنتخب !! " بتهمة التخابر مع دولة أجنبية .. بس قبل ما تقروا المقال .. وتفتكروا انه مجرد حوار عادي مع طفلة عمرها 14 سنة .. أقولكم لأ .. حاقولكم الأخطر .. انا كتبت لحد النهارده يمكن 500 مقال .. بس المقال ده بالذات بال 500 مقال اللي سبقهم .. لأنه إنساني بالدرجة الأولى .. فاللي بتتكلم معايا طفلة في تانية إعدادي .. مش حاقول بقى كلام إنشاء .. انها مثلا بنت بميت راجل ، أو اكتب على لسانها كلام أكبر منها ومن إدراكها .. انا حاكتب اللي قالته .. وحالخصه ليكم في خمس كلمات كلمتين بس .. " أميرة خايفة من يوم 30 ".
مش بقولكم حاكون صادق معاكم ومش " حزوّق الكلام " .. أيوه خايفة .. تخيل انت بقى ان أميرة دي بنتك او اختك الصغيرة .. وشافت المشهد القذر في رأينا احنا كناس كبار فاهمين .. اللي كان في رابعة العدوية الجمعة اللي فاتت .. بس هى مش قادرة تدرك انه مشهد قذر بكل ما تحمله الكلمة من معان .. اللي وصلها من المشهد ده كطفلة .. انها خافت .. بلاش خافت حاقولها زي ماسمعتها منها بالضبط " انا مرعوبة ياعمو"!!
... طيب حاقولكم من هى أميرة وبعدين نرجع لكلمتها العفوية المضطربة " انا مرعوبة يا عمو " .. بنوتة صغيرة .. مكنتش اعرف سنها .. بس لفت نظري على الفيس اسمها .. " أميرة حبي انا " .. وحاطه صورة سعاد حسني .. بس البوستات بتاعتها على الصفحة لفتت نظري جدا .. أحلاها وأبرزها صورة قلب ملفوف في علم مصر في حضن كف ايد سمرة .. خشنة .. عرقانة وقوية .. فبعت لها رسالة : عايز اتكلم معاكي .. ممكن ؟ .. فردت : اتفضل .. سألتها : اسمك اميرة ؟ ردت : ايوه .. وعندك كام سنة ؟ .. ردت : 14 سنة .. قلت : ده انتي صغنتوتة اوي .. فكتبت : وحضرتك ؟ .. قلت : لا .. انا أد بابا ويمكن كمان جدو .. فأرسلت ابتسامة جميلة زيهّا وقالت : اهلا وسهلا ياعمو .. فقلت لها : بوستاتك حلوة أوي يا أميرة .. وواعية أوي .. لدرجة اني افتكرتك بنت كبيرة على الأقل عندها 25 سنة .. فردت : طيب ما انا كبيرة برضه ، وفاهمة كل حاجة بتحصل في البلد .. سألتها : فاهمة إيه؟ .. ردت بعفوية شديدة : الحاجات الوحشة اللي بتحصل .. سألتها : زي إيه يا قمر ؟ .. ردت : مش حضرتك يا عمو شفت المؤتمر اللي في الاستاد .. وشفت يوم الجمعة اللي فاتت المظاهرة اللي في مدينة نصر عند رابعة العدوية؟ .. قلت : ايوه شفت دي وشفت دي .. انتي بقى شفتي إيه؟ .. فكتبت : انا خفت اوي يا عمو .. وعايز اقولك إني مرعوبة!!!
.... اقسم بالله زلزلتني كلمتها وشعرت لحظتها أنها ابنتي ، وقد ارتمت في أحضاني ترتعش مما رأته على شاشات التليفزيون في اليوم الأسود .. قاتم السواد في الاستاد وعند جامع رابعة .. فكتبت لها : أميرة يا حبيبتي .. اكتبي لي رقم موبايلك .. فكتبته .. قلت لها : عايز أكلمك .. ممكن ؟ .. فردت بأدب : طيب اسأل ماما الأول .. بعد إذن حضرتك .. قلت : اسأليها يا حبيبتي .. ثم بعد دقيقة كتبت : اطلبني يا عمو .. فطلبتها فردت علي أمها .. وبأدب شديد أيضا سألت : مين حضرتك ؟ .. عرفتها بنفسي .. فردت اسم حضرتك مش غريب .. بشوف مقالات لك كتير متشيرة على الفيس .. فقلت ده شرف ليا يامدام .. فقالت : الله يعّزك .. ثم قالت : الشقية بنتي دوشت دماغك ؟ .. فقلت لها : الشقية بنتك دي زلزلت كياني .. فسألت : ليه يا استاذ احمد .. هى قالت لك ايه العفريتة ؟ .. قلت : قالت لي انها خايفة ومرعوبة م اللي شافته .. فردت الام : صحيح .. معلش طفلة ومش فاهمة ومن حقها تخاف .. عموما خد كلمها براحتك .. أميرة زي بنتك .. انا اتشرفت بحضرتك.
.. واعطت الموبايل لأميرة .. ودار بيني وبينها هذا الحوار العفوي المؤثر لمدة حوالي 20 دقيقة .. كلفتني تقريبا 10 دينار كويتي .. بس مش خسارة في حبيبة قلبي أميرة الأمراء.
سألتها : قلتيلي يا قمر خايفة ومرعوبة .. من ايه بالضبط؟
قالت بشقاوة جميلة : انا مش بخاف على فكرة .. بس ياعمو الناس اللي شفتهم شكلهم وحش اوي
قلت : عشان دقونهم طويلة يعني ؟
قالت : لأ .. خالص .. ده فيه واحد صاحب بابا دقنه بيضة وطويلة .. بس تحس انه بتاع ربنا وطيب اوي
قلت : أمال خفتي من ايه يا أميرة بالضبط؟
قالت : الراجل المتعصب ده اللي بيقول اللي يرش مرسي بالميه حنرشه بالدم .. وواحد تاني متعصب اكتر منه ويقول حنسحق اللي حينزلوا يوم 30 .. هو فيه يا عمو .. هما رايحين يحاربوا اسرائيل؟
قلت : تخيلي بقى يا مرمر .. بيقولوا علينا كفرة ومش بتوع ربنا
ردت : والله العظيم يا عمو انا بحب ربنا اوي وسيدنا محمد عليه الصلاة والسلام .. وبابا بيصلي وماما وانا واخويا الكبير .. بس بصراحة اول مرة اصوم رمضان كله السنة اللي فاتت بس.
قلت : والسنة دي حتصوميه كله؟
قالت : اه طبعا ما انا كبرت سنة اهه .. بس يارب يبقى رمضان السنة دي حلو والعيد كمان
قلت : انشاء الله حيبقى حلو وحتعيدي احلى عيد .. بس انتي عايزاه حلو ازاى؟
قالت : الناس اللي في الحكم دول يمشوا .. دول مش شبهنا خالص يا عمو
قلت : مش شبهنا ازاى؟
قالت : يعني مش زي بابا وعمو وخالو وجدو .. بيصرخوا على طول .. ودايما " مبرّقين " عنيهم .. وبعدين بابا قاللي انهم قتلوا ناس كتير أوي .. زمان .. وبيقولوا ان هما بتوع ربنا .. هما بتوع ربنا ممكن يقتلوا ناس مسلمين وموحدين بالله؟
قلت : ممكن يا أميرة .. لما الغشاوة تغمّي عنيهم وتعميهم
قالت : بس ربنا مقلش كده .. انا لسه وانا بقرا قرآن امبارح قريت أية بتقول " ولو كنت فظا غليظ القلب لانفضوا من حولك " .. بصراحة يا عمو مفهمتش المعنى .. بس سألت ماما وقالت لي ان ربنا قالها عن سيدنا محمد
قلت : طيب ايه رأيك في الرئيس بتاعنا؟
ردت وقد أحسست فجأة انها كبرت 20 سنة : حضرتك متأكد انه الرئيس بتاعنا؟
قلت : أمال بتاع مين.. مش هو رئيس مصر؟
قالت : ايوه بس هو مش بيحب مصر خالص .. بيحب الناس بتوعه بس
قلت : ماشي .. بس إيه رأيك فيه؟
قالت : بصراحة بصراحة .. مش بحبه
سألت : ليه ؟
قالت : عشان بيكدب
سألت : وهو كدب عليكي في ايه يا أميرة ؟
قالت : مش عليا انا طبعا .. علينا كلنا .. حلف انه حيبقى رئيسنا كلنا ومحصلش .. وقال انه حيجيب حق اللي ماتوا ومحصلش .. وبعدين عايزة اسأل حضرتك سؤال ممكن؟
قلت : اتفضلي يا حبيبتي
قالت : مش الناس اللي بيهددونا دول هو يعرفهم ؟
قلت : طبعا
قالت : طيب وسايبهم ليه يخوفونا ويقولوا انهم حيقتلوا اللي ينزل وحيملوا الشوارع دم ؟
قلت : لأنه واحد منهم .. زيهم بالضبط
قالت : طيب ما دام هو كده وزيهم .. احنا مش عايزينه
قلت : ماهو عشان كده .. كل الناس حتنزل يوم 30
قالت : طيب وافرض بقى قتلوا ناس من اللي نازلين اللي مش معاهم سلاح أساسا؟
قلت : ممكن جدا .. بس لو لقوا الأعداد كبيرة .. حيخافوا ويكشوا
قالت بعفوية " كأن الفريق السيسي سمعها " : طيب .. مش الجيش ده بتاع مصر .. يبقى أكيد حيقف معانا .. على فكرة يا عمو انا بحب اوي القائد بتاع الجيش بتاعنا .. بطمن لمّا بسمعه .. وكمان على فكرة .. بتوع الشرطة بقوا كويسين اوي .. شكلهم اتغير كتير .. بقوا زينا بالضبط ومش ممكن يضربونا
قلت : اكيد .. على كده بقى ناوية تنزلي ولا لأ؟
قالت : اصل انا ساكنة في الكوربة جنب القصر .. ثم وهى تضحك .. يعني كده كده نازله .. انشا الله حتى قصاد البيت
قلت : ولسه خايفة يا حبيبتي؟
قالت : عايز الصراحة ولا اعمل جدعة واضحك عليك؟
قلت وعيني تدمع : الصراحة يا مرمر
قالت : خايفة طبعا ..دي وشوشهم مليانة شر .. وشكلهم مش بيعرفوا ربنا خالص
قلت وقد سالت دموعي : لا عاش ولا كان اللي يمس شعرة من راسك .. لاعاش ولا كان اللي يخلّي القمر يخاف ويترعب .. لا عاش ولا كان اللي يسرق منك ضحكتك .. عشانك انتي يا أميرة .. يا حبي انا .. كل مصر حتنزل .. انزلي معاهم ومتخفيش .. حتلاقي 10 مليون حضن فاتح لك صدره .. وممكن كلهم يموتوا .. بس .. عشان انتي تعيشي .. انتي البلد يا أميرة .. انتي بكره وبعده وكل السنين الحلوة اللي جاية .. انتي الاميرة يا أميرة .. اللي انتظارك مش حيطول.
قالت وقد أحست بحشرجة صوتي : عمو .. انا مش فاهمة حاجة
قلت وصوتي مخنوق لكن صدري يغلي : مع السلامة يا أميرة .. يا حبي انا.. حاكلمك بعدين.