حلم في المدرسة

ياريت التعليم بالمجان غير بالفلوس
والضرب كمان الطلاب دايما بيجيب إصابات
والمدرسين براءة من الاتهامات والتعليم بقى حاجة جنان تاخد عاهة بالمجان
قص الشعر للحجاب والهواء وقع الباب
والمدرس الظريف قالك عين الطالب مش خسارة
ولا كبل الكهربة دى ياخويا حكاية معقربة
والاعتداء الجنسى دى مادة إضافية والمدرس فيها بياخد الدرجة النهائية
وبقت التربية والتعليم هات أبوك وأمك فين والحكاية في كلمتين
أنت عارف بتكلم مين رد عليّ يا ابن الإيه لأخلى يومك عاليه واطيه
مدرسة بس تعمل طابور والحصص نط من فوق السور والمدرس ولا البيه
قاعد يشرب شاى في الكافيه
والأستاذة الجميلة بتشرح عمل التتبيلة
المدارس بايظة والطلاب هايصة والأهالي لايصة
هي مش قضية إحنا بس محتاجين قعدة عرفية
واللى بيشربها سادة ممكن نخليها سكر زيادة
الحل مش عصايا ولا مشرط وموس
الحل أن تتغير النفوس
الحل مش في المدير ولاحتى في الغفير
الحل أن يكون عندك ضمير
عملية التعليم محتاجة عملية يمكن خطيرة
بس هاتحسم القضية
أنا خلاص فاض بيا مش كل يوم هايكون فيه ضحية
إحنا بس مش محتاجين غير نكون قد المسئولية