عبدالرحمن رشاد يلغي الدراما من الإذاعة

فاكرين لما كنا نتلم بعد أخبار الساعة خمسة لنسمع تمثيلية العصر.. فاكرين لما نجري في الشارع عشان نلحق سمارة واللا العسل المر.. فاكرين المهندس
وشويكار ومدبولي وأبو لمعة وبيجو والمعلم شكل وحسين رياض وزوزو نبيل وهى بتقول لشهريار بدلع مولاي.. فاكرين الدقن ونجيب محفوظ والثلاثية ياسلام علي أحسن القصص في رمضان واللا توفيق العياءة بتاع الدندورمة واللا عوف الأصيل يا عكر وكما من وراء القضبان ياعيني على حلقات في بيتنا رجل للعظيم احسان عبدالقدوس.. حقول إيه واللا إيه؟ زمن كان فعلاً جميل بناسه ونخبته المحترمين.. ما معني الغاء الدراما يا عبدالرحمن.. والله أنا بحبك بس أفضل استقيل وروح بيتكم عيب هي مصر ناقصة خراب.. مين مسلط مين علي مين؟.. اسمع وشوف المصري أصبح عشوائى في الكلام والسلام وفقد الحوار والاحساس وحتى القبح ملا الأيام واستولى علي الشارع وعلى كل مكان. يا سلام ع الاذاعة يا سلام.
ناس هايصة والفقرا لايصة:
المواطن المصري زعلان وقرفان.. الفقرا فوضوه والأغنيا لما طلبهم يساعدوه غرقوه.. الغلابة المطحونين نزلت عليهم القوانين خليتهم تايهين ولايصين.. هوه الدعم والاصلاح على الفقير والمحتاج بس؟!.. كنت خد ال 52 مليار من حرامية البلد اللي هايصة.. إيه فيه توازنات؟!! كلنا حبناك وعايزين نحبك كمان بس إبعد عن تجربة ربط الحزام على الغلبان والله أنا عارف أن الحمل تقيل لكن الفقر والجوع والحرمان ومصاريف المدارس أتقل وأتقل.. مش غريبة أن يكون في مصر ناس تايهة ولايصة ومعاهم عايشين ناس هايصة؟!!
فلول وعلول.. وفقر وجهل مجدول
يا عالم ثورتين طيط؟؟.. لم نُفعل الشريعة الثورية.. ونحاسب على الفساد السياسي.. حطناهم في السجن وبنأكلهم من دافعي الضرائب الغلبانين.. وهات يا براءات واحد وراء التاني وحتى زعيم العصابة وأولاده في الطريق خارجين.. أصلهم أفضل من الاخوان!!.. يا سلام خربوا وسرقوا مصر وهمه أحسن الوحشين؟!.. خليهم ربنا يبارك فيهم ويتمتعوا بفلوسنا.. وفلوسنا في الخليج وأوروبا مستخبية لحد ما يطلع مبارك بسلامته ويصرفهم مع البرنسات والولية سيدة القصر.. والمصيبة بيخططوا ليستولي على مجلس النواب القادم.. ما هم فلول وعلول والشعب خلاص ثار وهاج وماج وخاف من الاخوان وركب الكنبة وعلق همه على السيسي وتاه ونام وبيخلف عيال.
والله ده حرام.. ولادنا ضاعت.. زي عمرنا ما ضاع.. ياريتني كنت هاجرت حتى بالاعدادية كان زماني عايش على الأقل محترم.. بلا شهادات بلا نيلة.. يا قلبي لا تحزن وكفاية خوف وحيرة عايزين بقى نرتاح.. تصدق عزيزي القارئ الغلبان.. علمتني الدنيا أحب وأعيش لبكرة وعلموني بالاعلام والنصب والكلام أنسي اللي فات وراح.. لكن عمر الشعوب ما يقاس بالندم والدموع ولكن ثورة الجياع ستقضي على الأخضر واليابس وياخوفي أقوم الصبح ألاقي داعش قاعدة وواقفة على الأبواب.
بقول إيه يا قلبي.. عايزين بقى نرتاح
دخلت علينا.. تصدق وشها نور.. سامع الضحكة ملعلعة يا وله.. لأ لأ دي شفايفها زي الورد.. عينيها بتقولنا كفاية خوف وحيرة.. إتغيرتي فعلاً!! هو اده الهوى؟.. شفتوا الهوى.. دقتوا الهوى.. يا سلام ع الهوى.. والنبي مش حلو الهوى؟!
تصدقوا إحنا أحباب وقلوبنا شباب.. طب حاولي وروح يا عذاب.. لأ لأ لأ مقدرش!! إزاي؟؟ الدمع في العين!! خليك يا عذاب.. تعبت.. تعبت.. بصي شوفي قمر الحب كله ليالي إزاي.. لا خوف ولا دمع.. ولا رغبة ولا انكسار.. شجاعتها طلعت شعاع النور من عينيها وطارت زي الفراشة وهاصت.. وغمضت أنا الجفون وسرحت وتهت وصرخت وقلت هو العمر فاضل فيه كام يوم يا قلبي؟!!
المنسق العام لحزب الوفد