حوارات متكررة جداً

- (هو) مش معقول! أيمن الجندى! يا سلااااام، معقولة يا راجل نكون زمايل فى المدرسة وما نشوفش بعض عشرين سنة (وكلام فارغ من هذا النوع).
- (أنا) حبيبى، روح قلبى. ده أنت واحشنى بشكل (مع إنى مش فاكر اسمه)، ده أنا ما بانمش الليل من حبك (كلام هجص من هذا القبيل).
- (هو) الواحد يا أخى عامل زى اللى بيلف فى ساقية وما بيرتاحش أبدا، فين أيام المدرسة الحلوة؟
- (أنا متصعباً) أيوه يا سيدى. كانت أحلى أيام (مع إننا كنا بننضرب كل يوم) إنما يرضيك حال البلد كده! (مشيراً إلى كوم الزبالة جنبنا) ده إحنا عايشين فى مزبلة يا راجل.
- (فى حماس رهيب) أعوذ بالله. هى دى بلد، ولاّ ده شعب ولاّ ده نظام. عمرك شُفت حد يحكم تلاتين سنة، وعاوز يترشح تانى، وفى الآخر يورثها لابنه.
- (أنا متأثراً) والله شعبنا ده غلبان بشكل!
- (فى غضب هائل) ما تقولش غلبان. دى اسمها سلبية. شعب عاوز يتركب، يبقى ما يركبوش ليه؟
- (فى سعادة غامرة لاتفاق الميول) طيب إيه رأيك فى موضوع البرادعى؟
- (فى تهليل) هو ده الكلام. أى تغيير مطلوب. المهم النظام الفاشل ده يزول (فى حماس ثورى) بجد كفاية لحد هنا. لازم الشعب يتحرك ويقول لأ. عاوزين نعيش، عاوزين نقب على وش الدنيا.
- (فى تأثر شديد) تصدق بجد! أنا فرحان إنى قابلتك.
- (مندفعاً) كل حاجة ولها نهاية يا أيمن. الأمور وصلت لدرجة لا يمكن السكوت عليها. الشعب قرّب ينفجر ولو حصلت ثورة الجياع احنا اللى حندفع التمن مش همه، لأنهم مش حيعرفوا يوصلوا لهم وحيمسكوا فينا احنا.
- (وأنا أمسح الدمعة) برافو عليك، طب إنت ناوى تعمل إيه؟
- (فى بساطة شديدة) ولا حاجة!
- (مذهولا) ولا حاجة إزاى؟! أمال إيه كل الكلام اللى كنت بتقوله
- (وقد انقلب مائة وثمانين درجة) أصل أنا ماعنديش بطاقة انتخابية. هههههه ما طلعتهاش. يا عم خلينا ماشيين جنب الحيطة هههه (متهلل الوجه وهو يقبلنى) بس بجد يا أيمن أنت واحشنى بشكل! أيام المدرسة دى كانت أحلى أيام! فاكر لما... (وكثير من الكلام الفارغ).