بكاء أم ثكلي

ارتحت ياعمر
ارتحت يا بن بطني
ارتحت يا عمري
ارتحت يا يوم شايلاه سندي
ارتحت يا امل في بكرة
لما يتحني ضهري
...مستعجل ليه ياعمر
ده لسة بدري
لسة ما جاش الربيع
اللي علي جبينك هيندي
لسة ياعمر
لسة بكرة اللي كان نفسك فيه مستني
...
تعبت يا عمر
تعبت من ناس عينيها عليك قاسيين
وبهوات مستخصرين كلمتين حلوين
معلش يا عمر
اهو السما كلها بيك محتفلين
و الرحمن الرحيم
هيقعدك جنب رحمة العالمين
و الملايكة ياعمر
عنيهم كلها طيبة و حنية بتناديك
بقيت عريس ياعمر
و الحور اللي في السما
كلها متشرفه بيك
ايوه فاكره يا عمري
اما كنت باقولك بكره تبقي عريس
فاكرة اما كنت بتقولي و مين يتشرف بيك
اهوه يا قلبي حور الجنة كلها متشرفة بيك
......
شوفت ياعمر
كنت شايله لك ايه للعيد
ترنج الاهلي جديد
انت مش بتحب تريكة و العمدة
مش كنت بتقولي نفسي يا امه
العب كورة زي العيال التانيين
و ارتاح شوية من هم الشيل
مش يوم يا امه دول بس ساعتين
اهو انت ارتحت ياعمري
مش بس ساعة او ساعتين
ارتحت يا عمري من ظلم السنين
من ناس قاسية و جاحدة علي البني ادمين
بيدوسوا علينا ما احنا فقرا ياقلبي
و الفقرا في البلد دي مش بني أدمين
=====
القاهره : 13-02-2013
محمد عباده