ديالوج

SAMIRELGAMEL@YAHOO.COM
فى ظل هذه الظروف التى تعيشها بلادنا.. وحالة الضياع والأسى.. وربما التشفى والغيظ والتربص التى نبدو عليها جميعا.. التقى الحق والباطل على مقهى «الصبر طيب» والذى تغير اسمه مؤخرا إلى «فاضل على الحلو دقة».
الحق: اخيرا شفتك يا أستاذ باطل؟
الباطل: يا سيدى ما تشوفش وحش!!
الحق: حضرتك طبعا بتكلمنى من مناخيرك ما أنت دلوقت شغال ميه ميه.. ولك فى كل خرابة عفريت من أمثالك.
الباطل: إذا كنت هتتكلم باحترام أهلا وسهلا.. هاتغلط هيكون لى معاك تصرف تانى خالص.
الحق: لا وعلى إيه.. سيادتك عملت غسيل مخ للناس.. وفهمتهم أن أنت الصح وأنا الغلط.
الباطل: أصل أنت متعب وكل حاجة عندك حرام وعيب وما يصحش.. لكن أنا فى اللذيذ.. سكتى سهله واسهمى فى العلالي.. ولو نزلت انتخابات ضدك.. هتلاقى نفسك يدوب واخد صوتك وبالعافية.
الحق: معلوم.. لأن الدهب بالجرام لكن الزبالة بالطن!!
الباطل: ما تبطل بقى الدنيا اتغيرت وكل واحد بيدور على مصلحته والناس مخنوقة.
الحق: اللى مخنوق يقول يارب.
الباطل: كلنا بنقول يارب.
الحق: ما هى دى المصيبة السوده.. الحرامى وهو طالع يسرق بيقول توكلت عليك يارب.. والست البطالة آخر الليل بتعد الغلة وتقولك ربنا رزقنا.
الباطل: عشان ربنا رحمن رحيم على عباده.
الحق: فى الرزق كرمه مع الكل لكن الفرق بين الحلال والحرام زى الضلمة والنور والجهل والعلم.
الباطل: يا عم بطل صداع.. وخلينا ندلع المسائل ونعيش.. الكلام بتاع سيادتك بقى موضة قديمة.. وعلى رأى اللى قال تبات وطنى تصح سلفي.. وتكون علمانى وتغير النمر ويلا قوك إخواني.
الحق: الحاجات دى يعملها الابالسة اللى زى حضرتك.
الباطل: طيب أنا كخه وعندى عيوب الدنيا كلها.. شاورلى على حد كويس وميه ميه.
الحق: لمؤاخذة ده جهل منك لأن الكويس .. بيعامل ربنا.. لكن فيه ناس بتصلى عشان يطلع لها زبيبه.. وناس بتبقى إخوان عشان تدخل البرلمان وناس تبقى شفيق لزوم شغل الصناديق.
الباطل: معنى كده أنك فرحان بنفسك على الوضع التعيس اللى أنت فيه!
الحق: الشاعر القديم قال:
إذا قل ماء الوجه قل حياؤه ولا خير فى وجه إذا قل ماؤه حياءك فاحفظه عليك إنما يدل على فعل الكريم حياؤه.
الباطل: هتكلمنى بالأغانى أو الشعر أنا هارد عليك بمثله.
الحق: هتقول إيه!
الباطل: الهانص فى الدنص .. يا اكسلانس!!