الفتنة الكبرى ..المواطنون : إحنا خلاص بقينا فضيحة وسط الدول

"انقسمنا طوائف وشيع ،وجاء اليوم الذى نتناحر فيه وولدت الفتنة الكبرى من رحم الثورة ،وشقشق الفجر عن كابوس ينتظرنا جميعاً ؛فالوطن يترنح على حبال خلافاتنا ،ولا يوجد رجل رشيد ينهى هذه المهزلة فالإخوان ومعهم تيارات الإسلام السياسي يؤججون مشاعر المعارضين لحكمهم ..وهم كثرة ..ومازالوا يغنون على أوتار الدين ..الذى هو برىء مما يفعلون ..والمعارضة تستغل أخطاء الإخوان والتيارات الإسلامية ،والتائه الوحيد هو الشعب الذى ضج بالاثنين ،ويتراءى أمامنا مشهد الإمام "على ومعاوية" .
"الزمان المصرى" ترصد حال المصريين قبيل 30 يونيه ،وما سيسفر عنه .
فى البداية تقول منى المتولى حجازى 35عاماً (ربة منزل) أنا مواطنة عادية ماليش أى توجه سياسى وهشارك.. إحنا لينا الحق إننا ننزل بوضع البلد اللى احنا شايفينه ده ،البلد فعلاً باظت ..احنا خلاص مبقناش شايفين فيها أى حاجة كويسة ،وعشان كدا أحنا نازلين نطالب باستقرار البلد ،وبكل اللى أحنا مش لا قينه من بنزين ،وكهرباء ،وميه ،وعيش ،وغلاء أسعار ،نازلين نقول له أرحل يا مرسى أنت وجماعتك ..احنا خلاص بقينا فضيحة قدام العالم ؛هو احنا عملنا ثورة عشان منلقيش رغيف العيش على الأقل ،وأسعار تغلى وبلطجة تزيد ..وأنا بقول له قبل 30 يونيه ياريت يرحمنا ،ويرحل قبل ما يحدث مالا يتحمله هو وجماعته من عقاب ممكن يقع عليهم نتيجة لسقوط ضحايا أو غيرها ..أيوه أرحل بدل ما أنت وجماعتك بتخططوا أزاى تنهوا علينا فى الميادين .
وتضيف أم محمود 45 عاماً (ربة منزل)أنا البلد كلها مش عجبانى وأنا بعتبر أن مصر خلاص ملهاش رئيس أسمه مرسى ؛لأن فعلاً البلد كلها خربت ..هسأل سؤال لجماعته ..إيه اللى عندنا فى البلد متوفر ،وعاجب الشعب ده !؟ ..النهارده رغيف العيش جايباه ميتاكلش ..إيه اللى عملته لينا يا مرسى عشان مننزلش ضدك فى 30يونيه.
ويستطرد جمال حسانين السيد الشرقاوى 52 عاماً (سائق) "مصر" اللى حاكمها لا يفهم شيئاً فى إدارتها ،وكفايه عليه كدا بقا ،ولازم يرحل ..أنا من أول الناس اللى هتنزل فى يوم 28 يونيه
ومش هنتظر يوم 30 يونيو ..أنا مهنتى (سائق) وبنام فى الشارع علشان أمول السيارة ؛بقضى 12 ساعة على "البنزينه" ده غير أن أنا بضع فى عربيتى 3 صفائح "جاز" الصفيحة ب 50 جنيهاً ..نازل أقول أرحل يا مرسى أنت وجماعتك طالما مش عارفين تديروا البلد ..قاعدين ليه .
وبحماس شديد تقول راضية النبوى إبراهيم 35 عاماً أنا عن نفسى هنزل يوم 30 يونيه ؛لأن اللى بيحصل فى البلد كل يوم ده خلاص زهقنا منه ..أحنا مبقناش شايفين احنا رايحين على فين ..كل اللى عارفينه إن البلد رايحة فى دمار ..إيه اللى عمله "المرسى" وجماعته من يوم ما مسكوا البلد !؟ راح جاب لنا نكسة "سد النهضة" على النكسات اللى احنا عايشين فيها ..هى "مصر" قائمة على إيه غير "المياه ،والزراعة" ..أنا نازلة أطالب بجذر مرسى نهائياً ..أحنا عايزين تغيير ..عايزين نشوف بكره صح ،وللأمام مش لورا ؛جماعة الإخوان شعارها إلنهارده بيقول "أوعى تقتل شيخ كبير أو طفل رضيع ..المطلوب شاب فى عمر الربيع" ،وعشان كدا أنا نازلة أقول ارحل ،ومش هنسيب الميدان حتى لو فيها موتنا .
ويرى محمود الغمرى 55 عاماً (موظف إداري) بشركة القطاع العام أنا عاوز أسأل اللى نازل يوم 30 يونيه هدفه إيه ..الهدف المطلوب تغيير النظام ،ولا مطالب شعب ،ولا نظام جمهرة وتعطيل مصالح ..وأنا شايف البلد بقا فيها جانب عايز كل حاجة ما بين يوم وليلة ،لكن المرة دى مختلفة ..لأن مش بس "المعارضة" هى اللى نازلة ..لأ دا "الشعب ،والمعارضة" نازلين الميادين .
ويؤكد حسام عبد الله 50 عاماً صاحب (محل بقالة) أنا مع نزول الناس فى 30 يونيه ..وهنزل الميدان فى محافظتى "الدقهلية" ..لأن خلاص مبقناش شايفين أى حاجة مظبوطة فى البلد ..الإخوان ومرسى خربوا البلد خلاص ،وفى الآخر طالع فى مؤتمر يقول لنا "تعالوا نحارب مع شعب سوريا" ..واحنا محتاجين اللى يحررنا ..الإسلام اللى هما بيتكلموا عنه بيقول "اللى يحتاجه البيت يحرم على الجامع" ..يعنى اللى البلد محتاجاه يحرم على غيرها ،وبعدين مش هروح بعيد ،وهعطى أبسط مثال ليا أنا ..أنا من كام سنة كنت بكسب من "المحل" بتاعى وليكن 2 جنيه النهارده مبقتش بكسب غير نصف جنيه ..احنا كمصريين وصل بينا الحال أن احنا بنقطع بعض عشان "رغيف العيش" ،وبنقتل بعض عشان "لتر جاز" ..النهارده بقينا بنخاف نمشى فى شوارعنا من البلطجية بعد أما كانت مصر "بلد الأمن والأمان" ،والحمد لله كل حاجة فى البلد باقت بايظة ،ونازل أقول "لمرسى" رحل دول لازم يرجعوا السجون تانى ..أنا عاوز أرد عليهم وأقول لهم "أنتم اللى صح ..الشعب المصرى ده كله هو اللى غلط" ..عشان كدا احنا هنكمل غلطنا وهننزل الميدان ،ومش هنرجع منه تانى ..احنا كلنا مسلمين وموحدين بالله مش بس هما اللى مسلمين .
ويتفق فى الرأى أم صلاح 50 عاماً ،وأم ممدوح (بائعات خضار) أن الناس معاها حق ولازم تنزل ..هو احنا عمرنا أشترينا الكيلو"الباذنجان" ب خمس جنيهات ،وبقول لمرسى أرحل كل حاجة باقت غالية ومبقناش عارفين نأكل عيالنا ..ومش بس احنا نازلين يوم 30 يونيه وعيالنا كمان نازلين يقولوا له أرحل وسيب البلد بقا عشان تتعدل ،ونعرف نعيش .
ويرى مجدى عبد المطلب 45عاماً (كشير) فى سوبر ماركت لازم كلنا نشارك فى يوم 30 يونيه عشان الرئيس "مرسى" لازم يرحل لأن وضع البلد خلاص مبقاش متحمل ،والظروف المعيشية باقت صعبة جداً ..دا الكهرباء والمية ،وغير "سد النهضة" ،والوظائف . كل الوعود اللى وعدونا بيها مفيش حاجة أتحققت ،والإخوان فى رأيى لا يصلحون لإدارة دولة كمصر ،وبقول لمرسى وجماعته أن أحنا نازلين الميدان ومش هنرجع غير لما تسيب البلد ،ومش هنخاف المرة دى .
ويضيف محمد محمود رشاد 64 عاما على المعاش أنا مع 30 يونيه ولكن مش هقدر أنزل لأنى رجل مريضمفيش حاجة فى البلد كويسه وبقولهم حاولوا تحسنوا الأوضاع قبل فوات الأوانوترجعوا تتحسروا ..يا ريت يا مرسى تبطل عناد وكفايه خسائر .
أما صابر عبد الله 43 عاما فيقول الحياة فى مصر سيئة ..لا الحكومة قادرة تصلح ولا المعارضة قادرة تخلصنا واقتصادنا كل يوم فى النازل ..واحنا مش عارفين رايحين على فين .
ويستنكر سامى رامى عبد العال 36 عاما ما يقوله الإخوان أن هذه مرحلة انتقالية ..ومرسى مسك البلد ومقيش حاجة اتغيرت.
وبنظرة تشاؤمية يؤكد إبراهيم سعد 56 عاما (بائع)الله يلعن أبو السياسة إن شا الله يولعوا فى بعض ..أن عايز أجيب المم للعيال لا الإخوان هينفعونى ولا المعارضة حاسة بى ..احنا بلنسبة لهم مش موجودين أصلا ،والإخوان معروف إنهم مبيخدوش غير حبايبهم بس ..المهم لقمة العيش والسياسة تيجى على مهلها.