مهندسون انا شايف ان الناس مصممه على النزول فى يوم 25 يناير بل وإحداث تغيير حقيقى، خصوصا بعد الأحداث اللى حصلت فى الايام اللى فاتت ، ولكنى مستبعد تماما ان مرسى يمشى من الحكم ومتوقع كالعادة ان فيه ناس هتموت وناس هتتصاب، وطبعا الاخوان هيقولوا عليهم دول بلطجية. «هيكون فيه مظاهرات كثيرة وبالليل هيحصل اشتباكات مع الشرطة وبعدها بيومين الإخوان هينزلوا يدافعوا عن مرسى وهيحصل اشتباكات كثيرة بين الطرفين وشهداء كتير هتموت وبعدين الموضوع هيتلم وكأن شيئا لم يكن».
«الميادين هتتملى بالناس وهيحصل مليونية كبيرة بس هتبقى زى أى مليونية حصلت بعد الثورة لكن مكنش ليها أى أثر بعد كده.. الناس فرحانة باليوم علشان تستعيد ذكريات الثورة.. الناس لسه عايشه فى الحالة الثورية الجميلة اللى كانت فى 25 يناير 2011». صحفيون
الثورة ليست حدثا يحدث وينتهي، ولكنها كموجات البحار، تكبر وتصغر، تقوى وتضعف، لكنها لا تنتهى، الخامس والعشرين من يناير القادم سوف يكون موجة أخرى من موجات الثورة، يعلم الله مدى قوتها. الميدان والثورة عندى معناهما الوحدة مش ناس تنزل ضد ناس، اللى عايز ينزل ضد الاخوان يتفضل يروح لهم المقطم، واللى عايز ينزل ضد مرسى يروح الاتحادية، اما التحرير فهو رمز للوحدة الثورية اللى جمع كل اطياف الشعب. «هيكون فيه مظاهرات سلمية ومش هيحصل شغب لأن الشعب المصرى مسالم بطبعه، بس أهم حاجة النظام يحاول ولو مره للمطالب الشعبية لأنها مشروعة.. احنا معملناش ثورة علشان السلطة تتجاهل مطالب الشعب.
«هيحصل مظاهرات اعتقد هتكون سلمية وهيحصل بعض التجاوزات واشتباكات زى أحداث محمد محمود لكن مش هيحصل تغير نظام زى المرة اللى فاتت.. والنظام لن يستجيب للمطالب لو كان فى نية للاستجابة كان استجاب فيه الحاجات اللى حصلت من قبل.
أطباء وصيادلة
من المتوقع حدوث اشتباكات بين بعض التيارات المدنية والاسلامية داخل الميدان، تحسبا للحكم فى قضية مذبحة بورسعيد.
احساس الثوار بسرقة الثورة منهم، خلق شعورا بكتابة نهاية للأسف مأساوية، وهذا ما لا يقبلونه، الأمر الذى سيؤدى الى حالة من الاحتقان فى تلك الذكرى. سوء الاحوال الاقتصادية وارتفاع الاسعار، احد التناقضات لمطالب الشعب المصرى فى ثورته والتى كان ينادى ب«عيش – حرية – عدالة اجتماعية»، الامر الذى من المتوقع احداث المزيد من الاضطرابات أثناء ذلك اليوم وفى اعقابه .
«انا نازل من تانى يا مصر احاول ارجع حق ولادك» لن يمر اليوم مرور الكرام، يجب أن يمتثل الرئيس وجماعته لمطالب الشعب.
محاسبون
والله انا شايف انه هيبقى يوم زى احداث محمد محمود الاخيرة وناس هتحاول تعمل اى حاجة عشان الناس زهقت، لكن للاسف مش هنقدر نعمل حاجة، لأن الإخوان دول ماصدقوا يقعدوا على الكراسى، وابقى قابلنى لو مشيوا.
«مش هيحصل حاجة علشان الإخوان مسيطرين على كل حاجة والناس جالها إحباط من كل حاجة.. عملنا ثورة وشلنا نظام وفى الآخر الناس محستش بالتغيير».
«يوم 25 أتوقع أن المظاهرات هتبدأ كمسيرات كبيرة فى أرجاء الجمهورية بس الإخوان مش هيبقى ليهم دور فيها.. واليوم هيعدى من غير احتكاكات من الإخوان علشان هما عايزين يحافظوا على وصولهم للسلطة ومش مستعدين لخسارة الكرسى الرئاسى تحت أى ظرف».
مصممو جرافيك
«اليوم ده هيكون يوم عادى زيه زى اى يوم ومليونية عادية زى اى مليونية حصلت بعد الثورة ومش هيحصل أى عنف والشرطة هتحمى الناس». مش هيحصل حاجة، شويه مظاهرات وخلاص، علشان احنا مبقناش واحد فى خمسين حزب، وخمسين طايفة، و50000000000000000 مليون رأى.
مبرمجون
أنا نازل 25 يناير عشان اجيب حق الشهداء، اللى ماتوا عشان خاطر البلد دى يبقى فيها عيش وحرية وكرامة انسانية، وللأسف ولا حاجه اتحققت منها «اما هما ماتوا ليه بقى»، اما الشىء الوحيد اللى مخوفنى هو ان البلطجية يندسوا وسطينا ويخلونا نموت بعض.
«أتوقع ان 25 يناير سينقسم ما بين احتفالات ومظاهرات لناس متصوره انها ستعيد امجاد الثورة هاتكون فى ميدان التحرير واحتفالات ستقوم بها جماعة الاخوان والحرية والعدالة فى محافظات او فى مناطق من القاهرة احياء لذكرى الثورة وبين هذا وذاك يجلس الشعب ليشاهدهم على التلفاز ولا مانع من بعض المناوشات هنا او هناك وكان الله بالسر عليمًا.
احتفالية تبدأ بمظاهرات فى شارع محمد محمود والاتحادية ستنتهى بمناوشات مع الشرطة واعادة بناء حائط جديد بواسطة الجيش، وممكن شوية شهداء كالعادة وكلام عن مؤامرات خارجية وداخلية وفضائية عابرة للقارات وينتهى الاحتفال بظهور الرئيس ليلقى خطابًا عاطفيًا دينيًا سياسيًا لا يستمع اليه احد. إسلاميون
«أتوقع مظاهرات لاسقاط الحكومة ومحاولات لإحراق مقرات الإخوان اللى فى الوقت ده هيكون فيها فاعليات على مستوى الجمهورية..وسقوط ضحايا فى مقرات الإخوان مش من الإخوان واليوم هيخلص دون أى إنجاز للجهات الداعية للمظاهرات ولا للحرية والعدالة». مترجمون
«الشعب كله هينزل اليوم ده، وهيبقى سلمى الا فى حالة لو حد اعتدى على الميدان واقصد بالتحديد «الاخوان» ساعتها هيبقى فيها دم كتير ومقدرش احدد بعدها هيحصل ايه هيحصل مناوشات فى اماكن تانية غير التحرير حاجات كده متفرقة».
محامون
«توقعاتى ان الوقت اللى احنا فيه النهارده «شحن بطاريات ناس كتيرة اوووى والناس ابتدت تصرخ تانى وهتطلع اللى جواها»، بس مش هيحصل حاجه، غير ان ممكن يكون فى شويه يقفوا فى التحرير ويقولوا كلمتين ويروحوا يناموا.. وخلاص.
طلبة
«اعتقد ان 25 يناير المقبل سيعبر بكل قوة وحماس عشان الشعب المصرى معندوش حاجة يقدمها دلوقتى غير الحماس وشوية ضرب فى شوية مناطق وتخلص الحدوتة كلاكيت 3 مرات عشان الناس مش هتستحمل تعيد الفيلم من الأول وعشان لسه الفيلم الاولانى مخلصش وعشان الاخوان مش هيسبوها بالساهل ونبكى دمعتين وتيجى غنوه تجمعنا وماتش يوقعنا وافكار كتيره تفرقنا وننسى.
البلد ممكن تولع بعد النحس اللى احنا فيه اليومين دول وربنا يستر على اللى جاى.
انا راى ان هيكون فى ثورة تانية بس الثورة دى هتكون ثورة الناس اللى تحت الفقر والناس التعبانة واكيد هيكون فى شباب الثورة بس اكيد الناس اللى تحت خط الفقر دى هنزل اكيد وهتكون ان شاء الله ضد الاخوان، بس اكيد هيبق فى ضحايا كتير.
أخرى
هو يوم خارج التوقعات إلا أن الاحداث قد تصل لمؤشرات خطيرة مثل حادث البدرشين وحادث مزلقان باب اللوق. الاحداث الاخيره ستكون حاضره فى هذا اليوم طبعاً ومزيد من هذه الاحداث المؤسفة التى تمر بها مصر قد تسقط شرعية الرئيس مرسى بتهمة الاهمال. مهندسون صحفيون اطباء وصيادلة محاسبون مصممون جرافيك
