لا هيتقدم ولا حتى هيتكلم.. بس مش قادرة أنساه وأركّز مع خطيبي

السلام عليكم ورحمه الله وبركاته.. أنا بصراحة أول مرة أشارك في الموقع؛ بس أنا مخنوقة أوي ومحتاجة أفضفض.
الحكاية من الأول إني كنت مرتبطة بإنسان وبحبه حب جنون، وهو كمان كان بيحبني أوي، وقضينا مع بعض أجمل سنتين، وفهمنا بعض جداً، كنت أنا وهو حاجة واحدة، وكان بيخاف عليّ لأبعد الحدود، وكنا متّفقين على الخطوبة؛ بس حصلت له مشاكل، وإمكانيته ماتسمحش بحاجة خالص، وأنا فضلت معاه لأبعد الحدود، وهو كمان عمل حاجات كتير عشاني؛ بس النصيب ماجمعناش.
وفي الآخر وصلنا إن كل واحد مننا يسيب التاني عشان مانعذّبش بعض، وسيبنا بعض، وأنا قلبي بيموت فيه، وهو اللي أقنعني إني أتخطب، وكان بيبكي بالدموع، وقال لي: أنا مافيش في إيدي حاجة أعملها.
عدّت علينا سنة، واتقدم لي واحد، وفعلاً اتخطبت، وماكنتش حاسة بأي فرحة، ولا الحياة كان ليها معنى، ووعدنا بعض إننا مانتكلّمش تاني؛ بس كان ممكن يتطمّن عليّ من وقت للتاني.
دلوقتي أنا بقالي سنة مخطوبة، وأنا وخطيبي علاقتنا كويسة؛ بس المشكلة إني لسه بافكّر فيه، وهو خلاص نسيني وبقى عايش حياته.. أنا عارفة إنه هو صح وإني غلط؛ بس بجد أنا غصب عني.
أنا مخنوقه أوي، ومش عارفة إيه اللي أنا فيه ده؛ مع إني متأكدة إن عمره ما هيقدر يتقدم، أو حتى يتكلم؛ بس خايفة أظلم خطيبي أو أظلم نفسي، وهو إنسان كويس.. معلش أنا طوّلت كتير؛ بس بجد أنا محتاجة حد ينصحني لأني مخنوقة أوي.
noor


صديقتي العزيزة، رسالتك قليلة التفاصيل؛ يعني مثلاً لم تذكري أسباب انفصالكم أو الظروف اللي تمنعه إنه يتقدم لك، هل هي ظروف مادية فقط أم هناك ظروف أخرى، وعلى العموم فكل التفاصيل دي مالهاش أي لازمة دلوقتي؛ لسبب بسيط جداً؛ إنك مخطوبة.
صديقتي عليك الوقوف مع نفسك لفترة، والتفكير جيداً، إنتِ وافقتِ على خطيبك بإرادتك، ماحدش في زماننا بيتخطب دون موافقة.
اسمحي لي أن أتحدث معك بصراحة أكتر، ليه متأكدة إنه سابك عشان ظروفه؟ وبعدين ماعتقدش إنه حتى لو ظروفه صعبة إنه يضحّي بيكِ بالسهولة دي؛ على الأقل كان حاول مع أهلك إن يكون فيه خطوبة لفترة؛ لحد ما يكون قادر على خطوة الزواج.. وإزاي يكون بيحبك وتكوني معاه بقالك سنتين من عمرك، وبمنتهى البساطة يقول لك اتخطبي لواحد تاني بدون حتى أي محاولات منه.. ده بتسميه إيه من وجهه نظرك؟ حب مثلاً؟!
صديقتي، الحب يعني تضحية، ويعني تمسّك، وأنا مش باقول لك إنه لو كان أهلك رفضوا ظروفه إنك ماتسمعيش كلامهم؛ لكن على الأقل يكون عمل اللي عليه، ومع الأسف ده ماحصلش.
ولو هو حتى بيحبك زي إنتِ ما بتقولي، وإنه كان بيعيّط بالدموع -مع إن ده مش صح تماماً لأن الراجل مهما كان حبه فمش صح إن ده يحصل منه خاصة قدامك- فماذا قدّم من أجل هذا الحب؟ إيه المواقف اللي إنتِ تفتكريها له إنه عملها عشانك؟ على الأقل كان مفروض يتقدم لك ويتكلم مع أهلك ويقنعهم بظروفه؛ بس مافيش أي حاجة حصلت تثبت إنه شخص قادر على تحمّل المسئولية.
صديقتي الموضوع ده لازم تقفليه تماماً، وطبعاً ما تتكلميش معاه، ولا حتى تفكّري فيه.
تعالي بقى نتكلم عن خطيبك وأد إيه إنتِ بتظلميه معاكِ، وإن ربنا هيحاسبك عليه.. عليك الوقوف مع نفسك لفترة والتفكير جيداً، وحاولي إنك تقرّبي منه وتفهميه، وتبتدي صفحة جديدة معاه، وتنسي كل اللي فات.
ادعي ربنا في كل صلاة إنه يهديكِ، وإنك تنسي وماتفكّريش، وابدئي صفحة جديدة مع خصيبك اللي دخل بيتك في النور، وكلّم أهلك.. وإنتِ بتقولي إن علاقتكم كويسة، وإنه شخص كويس؛ يبقى احمدي ربنا على اللي إنتِ فيه؛ لأن ربنا عوّضك بعد هذه التجربة، وإن إنتِ في إيدك نعمة، ولو ماعرفتيش قيمتها، بعد فترة مش هتلاقيها.

لو عايز تفضفض لنا دوس هنا