شيلي النضارة المكبرة.. وشوفي الحقيقة

أنا حبيت أشارك معكم وأحكي لكم عن مشكلتي أنا تعبانة جدا أنا حبيت إنسان ودي أول مرة أعرف يعني إيه حب.. أنا بحبه أوي وماعنديش أي استعداد أخسره، بس مش عارفة هو كمان بيحبني ولا لا.. هو بيخاف عليّ جداً، وكمان حصل مشاكل كتير بعد ما عرفت حاجات كتير عنه، بس دي كانت حكايات قديمة، وهو قال لي كل حاجة واعترف لي عن كل حاجة حصلت زمان ومش بيخبي عني حاجة، بس أنا باغير أوي عليه ومش عاوزة أبيّن قدامه، بس ساعات كتير مشاعري وغيرتي بتفضحني، مش باعرف أخبي..
هو كمان مش بيحب أعمل حاجة غير لما أقول له عليها، بس بعد آخر مشكلة حصلت بيني وبينه برده بسبب الغيرة وأنا فقدت أعصابي معاه وقلت له إنه كداب، بس كان غصب عني، رد عليّ بعدها بيومين وقال لي إننا مش مخطوبين ومش هيخطبني، وإن هو خلاص قفل من ناحيتي رغم إنه رجع يكلمني تاني، بس أنا مش عارفة هو بيحبني ولا لا.. أنا بجد تعبانة، مع العلم إن أهله كلهم بيحبوني جداً.
Rasha

صديقتي العزيزة.. لازم تقدري كل شيء وكل إنسان حق قدره؛ لأن المبالغة والمغالاة مش هيكونوا أبداً لصالحك صدقيني، فالحب الأول مش معناه إنه الحب الأخير، وزعل بسيط مش معناه إنكم افترقتم، وحكاياته القديمة مش معناها إنه كداب، وارتباطكم الغير رسمي مش معناه إنكم بقيتم مخطوبين.
عاوزاكي تغيّري النضارة المكبرة اللي إنتي لابساها، وتشوفي كل حاجة بمقاسها الحقيقي، مش بس عشان تحافظي على حبك، لكن عشان تحافظي على نفسك وحياتك ومستقبلك.
وبعد ما تراجعي نفسك وتبطلي تتعاملي مع الأمور بمشاعرك، وتبتدي بجد تفكري فيها بعقلك الواعي، وتراجعي نفسك وتحللي مواقفك ومواقفه، هتعرفي إنك لو فعلا ما عندكيش استعداد تخسريه وعاوزة علاقتكم تمشي صح يبقى لازم تخلوها في النور على قد ما تقدري عشان ما تبقيش في حياته مجرد علاقة سابقة، هيحكيها لبنت هتدخل حياته بعدك.
لازم تقعدي معاه وتتكلموا وتتفاهموا أكتر حوالين المستقبل وتبطلوا تتكلموا وتفكروا في أوهام الماضي وعلاقاته اللي مش هتعمل حاجة غير إنها هتزرع شكوك كتيرة جواكي وجواه.
لأن زي ما إنتي هتقولي إنه كداب وهتغيري عليه، هو هيخاف الارتباط من إنسانة غيورة ونكدية، وكمان مش بتحترمه، لكن لو كداب فعلا فده موضوع تاني، وما افتكرش إن ممكن أي إنسان عاقل يربط حياته بحد كداب.
بتقولي أهله بيحبوكي ده معناه إن علاقتك بيهم كويسة، يبقى لو عاوزة تعرفي إذا كان بيحبك ولا لأ، ابعدي عنه، وبطّلي تكلميه، ولما يحاول يتصل بيكي قولي له: إن أهلك إنتي كمان عاوزين يقابلوه، لو وافق واتشجع وسألك عن التفاصيل وازاي يقابلهم ويعمل إيه؟ يبقى بيحبك وشاريكي ولو كبّر دماغك وبعد، وبطّل يكلمك أو يتصل بيكي يبقى مش بيحبك، وكان بيلعب بيكي وما يستاهلش كل تعبك وزعلك ده علشانه، ويبقى كداب فعلا، زي ما اتعرفتي على أهله، لازم هو كمان يتعرف على أهلك، حتى لو كان مش جاهز، مقابلته لأهلك هتحسسه بالمسئولية وهتعرّفك قد إيه هو بيحبك.

لو عايز تفضفض لنا دوووس هنا